ആര്എസ്എസുമായി അടച്ചിട്ട മുറയിൽ രഹസ്യ ചര്ച്ച നടത്തിയെന്ന് സമ്മതിച്ച് ജമാഅത്തെ ഇസ്ലാമി. ജനുവരി 14ന് ന്യൂഡല്ഹിയില് വെച്ചായിരുന്നു രഹസ്യ ചര്ച്ചയെന്ന് ജമാഅത്തെ ഇസ്ലാമി ജനറല് സെക്രട്ടറിയും കേരള മുന് അമീറുമായ ടി ആരിഫ് അലി “ദി ന്യൂ ഇന്ത്യന് എക്സ്പ്രസി’ന് നല്കിയ അഭിമുഖത്തില് പറഞ്ഞു. ചര്ച്ചകള് ഇനിയും തുടരുമെന്നും നിലവില് നടന്നത് പ്രാഥമിക ചര്ച്ചയാണെന്നും അദ്ദേഹം പറഞ്ഞു.
ജനുവരി 14ന് ദില്ലിയില് നടന്ന ചര്ച്ചയില് ആള്ക്കൂട്ട ആക്രമണം അടക്കമുളള വിഷയങ്ങള് ചര്ച്ചയായെന്ന് ജമാ അത്തെ ഇസ്ളാമി ജനറല് സെക്രട്ടറി ടി. ആരിഫ് അലി വെളിപ്പെടുത്തി. കേന്ദ്ര സര്ക്കാരിന് നേതൃത്വം നല്കുന്ന സംഘടനയെന്ന നിലയിലാണ് ആര്എസ്എസുമായി ചര്ച്ച നടത്തിയതെന്നും ആരിഫ് അലി പറയുന്നു.
മുസ്ലി സംഘടനകളും ആര്എസ്എസുമായുളള ചര്ച്ചകള്ക്ക് വേദിയാെരുക്കുക എന്ന ലക്ഷ്യത്തോടെ മുഖ്യ തെരഞ്ഞെടുപ്പ് കമ്മീഷണറായിരുന്ന എസ്.വൈ ഖുറേഷിയുടെ നേതൃത്വത്തില് നടത്തിയ ശ്രമങ്ങളുടെ തുടര്ച്ചയായായിരുന്നു ജനുവരി 14ന് ദില്ലിയില് നടന്ന ചര്ച്ച.
അഖിലേന്ത്യാ നേതൃത്വമാണ് ചര്ച്ചയില് പങ്കെടുക്കാമെന്ന തീരുമാനം കൈക്കൊണ്ടതെന്ന് ടി ആരിഫ് അലി പറയുന്നു. മാത്രമല്ല, ആര്എസ്എസുമായി ചര്ച്ച ചെയ്യുന്ന കാര്യം താഴെത്തട്ടിലെ അണികളെ അറിയിക്കുകയും ചെയ്തിരുന്നു. കേന്ദ്ര സര്ക്കാറിനെ നയിക്കുന്ന ഒരു സംഘടനയുമായി ചര്ച്ച നടത്തരുത് എന്ന നിലപാട് സ്വീകരിക്കുന്നത് ബുദ്ധിപരമല്ലെന്നും ആരിഫലി പറഞ്ഞു. ഈ ചര്ച്ചയിലൂടെ ആര്എസ്എസാണ് കേന്ദ്ര സര്ക്കാറിനെ നയിക്കുന്നതെന്ന് തെളിഞ്ഞു. സമൂഹത്തിലെ ഏതെങ്കിലും വിഭാഗവുമായി ഇടപഴകുന്നതില് യാതൊരു പ്രതിബന്ധവും ഉണ്ടാകരുതെന്ന നിലപാടുള്ളവരും ചര്ച്ചയില് വിശ്വസിക്കുന്നവരുമാണ് തങ്ങള്.
ആര്എസ്എസുമായി ഒത്തുതീര്പ്പുണ്ടാക്കുക ചര്ച്ചകളുടെ ലക്ഷ്യമല്ലെന്നും ആരിഫ് അലി വ്യക്തമാക്കി. എസ്വൈ ഖുറേഷി, മുന് ദില്ലി ലഫ്റ്റനനന്റ് ഗവര്ണര് ലഫ്റ്റനന്റ് ഗവര്ണര് നജീബ് ജംഗ്, ഷാഹിദ് സിദ്ദീഖി, സയ്യീദ് ഷെര്വാണി എന്നിവരുടെ നേതൃത്വത്തില് കഴിഞ്ഞ ഓഗസ്റ്റില് ആര്എസ്എസ് അധ്യക്ഷന് മോഹന് ഭാഗവതുമായി നടത്തിയ ചര്ച്ചയെത്തുടര്ന്നാണ് ആര്എസ്എസ് നേതൃത്വം തുടര് ചര്ച്ചകള്ക്കായി നാല് നേതാക്കളെ ചുമതലപ്പെടുത്തിയത്.
ചർച്ച തുടരും
ആള്ക്കൂട്ട ആക്രമണം, മുസ്ലിം മേഖലകളില് അനധികൃത നിര്മാണങ്ങളുടെ പേരു പറഞ്ഞ് ഇടിച്ചു നിരത്തുന്ന ബുള്ഡോസര് രാഷ്ട്രീയം, നിരപരാധികള്ക്കെതിരായ കേസുകള് തുടങ്ങിയ വിഷയങ്ങള് ചര്ച്ച ചെയ്തതായി ജനറല് സെക്രട്ടറി ടി ആരിഫ് അലി പറഞ്ഞു. കാശിയിലെയും മധുരയിലെയും മോസ്കുകളുമായി ബന്ധപ്പെട്ട വിഷയം ആര്എസ്എസ് നേതൃത്വവും ചര്ച്ചയില് ഉന്നയിച്ചതായാണ് ലഭിക്കുന്ന വിവരം. ആര്എസ്എസ്സിന്റെ രണ്ടാം നിര നേതാക്കളുമായുളള പ്രാഥമിക ചര്ച്ചകള് മാത്രമാണ് നടന്നതെന്നും തുടര് ചര്ച്ചകള് ഈ വിഷയത്തിലുണ്ടാകുമെന്നും ആരിഫ് അലി എക്സ്പ്രസിന് നല്കിയ അഭിമുഖത്തില് വ്യക്തമാക്കി.
എന്ത് ഉറപ്പാണ് നിങ്ങൾക്ക് ലഭിച്ചത്, വെളിപ്പെടുത്തണമെന്ന് കെ ടി ജലീൽ
ആർഎസ്എസ്സുമായി സംസാരിച്ചതിൻ്റെ വിശദാംശങ്ങൾ ജമാഅത്തെ ഇസ്ലാമി വെളിപ്പെടുത്തണമെന്ന് കെ ടി ജലീൽ എംഎൽഎ ആവശ്യപ്പെട്ടു. ചർച്ചകൾക്കൊടുവിൽ ആർക്കാണ് മാനസാന്തരം സംഭവിച്ചതെന്നറിയാൻ ജനങ്ങൾക്ക് താൽപര്യമുണ്ട്. ഈ ചർച്ച എന്തിനാണ് ഇരുകൂട്ടരും രഹസ്യമാക്കി വെച്ചത്? മീഡിയാവണ്ണോ മാധ്യമമോ തത്സംബന്ധമായ വാർത്ത കൊടുക്കാതിരുന്നത് എന്തു കൊണ്ടാണ്?. എവിടെയായിരുന്നു കൂടിക്കാഴ്ച? എന്നായിരുന്നു? മദ്ധ്യസ്ഥർ വല്ലവരും ഉണ്ടായിരുന്നോ?.
പൗരത്വ നിയമം മരവിപ്പിക്കാമെന്ന ഉറപ്പ് മോഹൻ ഭാഗവതിൽ നിന്ന് കിട്ടിയോ? മുത്തലാഖ് നിയമം പിൻവലിക്കുമെന്ന് RSS നേതാക്കൾ പറഞ്ഞോ? കാശ്മീരിൻ്റെ പ്രത്യേക പദവി പുനസ്ഥാപിക്കുമെന്ന് ഭരണം നിയന്ത്രിക്കുന്നവർ വാക്ക് നൽകിയോ? ബാബരി മസ്ജിദ് പൊളിച്ചതിൽ സംഘ് പരിവാരങ്ങൾ ക്ഷമാപണം നടത്തിയോ? ഗുജറാത്തിലെ മുസ്ലിം കൂട്ടക്കൊലയിൽ ബി.ജെ.പി മാപ്പപേക്ഷിച്ചോ? ബീഫ് വിവാദത്തിൽ അതിക്രൂരമായി കൊലചെയ്യപ്പെട്ട മുഹമ്മദ് അഖ്ലാഖ് ഉൾപ്പടെയുള്ള അൻപതോളം മനുഷ്യരുടെ മരണത്തിൽ “ഗോ സംരക്ഷണ സേന” ഖേദം പ്രകടിപ്പിച്ചോ? സ്ഥല നാമങ്ങൾ മാറ്റുന്ന നയം അവസാനിപ്പിക്കാമെന്ന് യു.പി മുഖ്യമന്ത്രി യോഗി ആദിത്യനാഥ് സമ്മതിച്ചോ? NDA സഖ്യത്തിൽ വെൽഫെയർ പാർട്ടിയെ ചേർക്കാമെന്ന വല്ല ഉറപ്പും ലഭിച്ചോ? ഈ ചോദ്യങ്ങൾക്ക് മറുപടി പറയാതെ ജമാഅത്തെ ഇസ്ലാമിക്ക് മുന്നോട്ട് പോകാനാവില്ല. പഴമൊഴി: “നായയുടെ വാല് പന്തീരാണ്ടു കാലം കുഴലിലിട്ടാലും അത് വളഞ്ഞ് തന്നെ ഇരിക്കും” വളഞ്ഞ വാൽ ഓടക്കുഴലിട്ട് നിവർത്താൻ ശ്രമിക്കുന്നവരെ എന്ത് പേരിട്ടാണ് വിളിക്കുക? – ജലീൽ ഫെയ്സ്ബുക്ക് കുറിപ്പിൽ പറഞ്ഞു.
