ബലാത്സംഗക്കേസില് എല്ദോസ് കുന്നപ്പിള്ളിക്കെതിരെ കൂടുതല് വകുപ്പുകള് ചുമത്തി. വധശ്രമക്കേസും സ്ത്രീത്വത്തെ അപമാനിച്ചതിനുമാണ് കേസെടുത്തിരിക്കുന്നത്. 307, 354 എ വകുപ്പുകള് എംഎല്എക്കെതിരെ ചുമത്തി. പുതിയ വകുപ്പുകള് ചേര്ത്തുള്ള റിപ്പോര്ട്ട് ജില്ലാ ക്രൈംബ്രാഞ്ച് കോടതിയില് നല്കി.
യുവതിയുടെ മൊഴിയുടെ അടിസ്ഥാനത്തിലാണ് നീക്കം. സെപ്റ്റംബര് 14 ന് കോവളത്ത് വെച്ച് വധിക്കാന് ശ്രമിച്ചെന്ന് പരാതിക്കാരിയായ യുവതി മൊഴി നല്കിയിരുന്നു. കോവളം ആത്മഹത്യാമുനമ്പില് വെച്ച് താഴേയ്ക്ക് തള്ളിയിട്ട് കൊലപ്പെടുത്താന് കുന്നപ്പിള്ളി ശ്രമിച്ചെന്നാണ് യുവതിയുടെ മൊഴി. അന്വേഷണ ഉദ്യോഗസ്ഥനും മജിസ്ട്രേറ്റിനും മുന്നിലാണ് പരാതിക്കാരി മൊഴി നല്കിയത്.
ഒളിവില് കഴിയുന്ന എംഎല്എയെ പൊലീസിന് ഇതുവരെ കണ്ടെത്താനോ അറസ്റ്റ് ചെയ്യാനോ കഴിഞ്ഞിട്ടില്ല. കോൺഗ്രസ് അധ്യക്ഷ തിരഞ്ഞെടുപ്പിൽ വോട്ട് ചെയ്യാനും എത്തിയിരുന്നില്ല.
അധ്യാപികയെ മര്ദിച്ചപ്പോള് എല്ദോസ് കുന്നപ്പിള്ളി എംഎല്എ ധരിച്ചതായി പറയുന്ന വസ്ത്രം പൊലീസ് കണ്ടെടുത്തിട്ടുണ്ട്. പരാതിക്കാരിയുടെ വീട്ടില്നിന്നാണ് സംഭവ ദിവസം എംഎല്എ ധരിച്ചിരുന്ന ടീഷര്ട്ട് കണ്ടെടുത്തത്. മര്ദനമേല്ക്കുമ്പോള് യുവതി ധരിച്ച വസ്ത്രങ്ങളും പൊലീസ് തെളിവിനായി ശേഖരിച്ചു.
കഴിഞ്ഞ ദിവസം അന്വേഷക സംഘം എംഎല്എയുടെ പെരുമ്പാവൂരിലെ വീട്ടിലും കടവന്ത്രയിലെ കേന്ദ്രങ്ങളിലും പരിശോധനയ്ക്കെത്തിയിരുന്നു. വീട് അടഞ്ഞുകിടക്കുകയായിരുന്നു. എല്ദോസിന്റെ ഭാര്യ, പിഎ, ഡ്രൈവര് എന്നിവരെ വിളിച്ചുവരുത്തി മൊഴിയെടുത്തു. ചൊവ്വാഴ്ച പരാതിക്കാരിയുമായി എറണാകുളത്തെത്തി തെളിവുകള് ശേഖരിക്കും.
