സ്കൂള് ക്യാമ്പസിലും ക്ലാസ് മുറിയിലും വിദ്യാര്ഥികള് മൊബൈല്ഫോണ് ഒഴിവാക്കണമെന്ന് വിദ്യാഭ്യാസമന്ത്രി വി.ശിവന്കുട്ടി. വിദ്യാര്ഥികളുടെ അമിതമായ ഫോണ് ഉപയോഗം അധ്യാപകരും രക്ഷിതാക്കളും ശ്രദ്ധിക്കണമെന്നും മന്ത്രി പത്രസമ്മേളനത്തിനിടെ ആവശ്യപ്പെട്ടു.
സ്കൂള് കുട്ടികളെ ക്ലാസ് സമയത്ത് മറ്റ് പരിപാടികള്ക്ക് കൊണ്ടുപോകരുത്.
മൊബൈല് ഫോണ് നിരോധനവുമായി ബന്ധപ്പെട്ട സര്ക്കുലര് വിദ്യാഭ്യാസ വകുപ്പ് നേരത്തേ പുറത്തിറക്കിയിട്ടുണ്ട്.
കോവിഡ് കാലത്ത് സ്കൂളുകള് പ്രവര്ത്തിക്കാതായപ്പോള് ഓണ്ലൈന്പഠനത്തിനായി മൊബൈല് ഫോണുകളാണ് വിദ്യാര്ഥികള് ആശ്രയിച്ചത്. അധ്യാപകരുമായും വിദ്യാര്ഥികളുമായുള്ള ആശയവിനിമയത്തിനും ക്ലാസുകള്ക്കും അത് അത്യാവശ്യവുമായിരുന്നു. വിദ്യാര്ഥികള്ക്കിടയില് മൊബൈല് ഉപയോഗം വ്യാപകമായത് ഈ സമയത്താണ്.
എന്നാൽ ഇത് പഠനത്തിനപ്പുറം നിരവധി ആരോഗ്യപ്രശ്നങ്ങള്ക്കും, സ്വഭാവ വൈകല്യങ്ങള്ക്കും വഴിവെച്ചതായി മന്ത്രി വാര്ത്താസമ്മേളനത്തില് പറഞ്ഞു. സാമൂഹ്യജീവിതത്തിലെ അനാരോഗ്യകരമായ പ്രവണതകള് വിദ്യാര്ഥികള്ക്കിടയില് വളരുന്നതില് മൊബൈല്ഫോണിന്റെ പങ്കും മന്ത്രി ചൂണ്ടിക്കാട്ടി. ഇത് സംബന്ധിച്ച കാര്യങ്ങള് ചര്ച്ച ചെയ്യാന് എ.ഇ.മാരടക്കമുള്ളവരുടെ മേഖലാ യോഗം ചേരുമെന്നും മന്ത്രി അറിയിച്ചു. ഓഗസ്റ്റ് നാലിന് തിരുവനന്തപുരത്തും ഒന്പതിന് തൃശൂരുമാണ് യോഗം
