കൂടത്തായി കൊലപാതക പരമ്പര കേസിൻ്റെ ഗതിമാറ്റി നാല് മൃതദേഹ ഭാഗങ്ങൾ എടുത്ത് പരിശോധിച്ചതിൽ വിഷാംശം കണ്ടെത്താനായില്ല. ഇതു സംബന്ധിച്ച ദേശീയ ഫൊറന്സിക് ലാബ് റിപ്പോര്ട്ട് പുറത്തു വന്നു. 2002 ൽ നടന്ന കൊലപാതകമാണ്. 2019 ലാണ് അവശിഷ്ടങ്ങൾ പരിശോധിക്കുന്നത്.
കൊല്ലപ്പെട്ടവരില് നാലുപേരുടെ മൃതദേഹാവശിഷ്ടങ്ങളിലും സയനൈഡിന്റെ അംശമോ മറ്റു വിഷാംശങ്ങളോ കണ്ടെത്താനായില്ലെന്നാണ് ഫൊറന്സിക് റിപ്പോര്ട്ട്. അന്നമ്മ തോമസ്, ടോം തോമസ്, മഞ്ചാടിയില് മാത്യു, ആല്ഫൈന് എന്നിവരുടെ മൃതദേഹാവശിഷ്ടങ്ങളാണ് ദേശീയ ഫൊറന്സിക് ലാബില് പരിശോധിച്ചത്.
റിട്ട. വിദ്യാഭ്യാസ വകുപ്പ് ഉദ്യോഗസ്ഥന് കൂടത്തായി പൊന്നാമറ്റം ടോം തോമസ് (66), ഭാര്യ റിട്ട. അധ്യാപിക അന്നമ്മ തോമസ് (58) മകന് റോയ് തോമസ് (40), അന്നമ്മയുടെ സഹോദരന് എം.എം. മാത്യു മഞ്ചാടിയില് (68), ടോം തോമസിന്റെ സഹോദരന്റെ മകനായ ഷാജു സ്കറിയയുടെ മകള് ആല്ഫൈന് (2), ഷാജു സ്കറിയയുടെ ഭാര്യ സിലി (44) എന്നിവരാണു കൊല്ലപ്പെട്ടത്.
കൊല്ലപ്പെട്ട സിലിയുടെ ശരീരത്തില് സയനൈഡിന്റെ അംശമുണ്ടെന്നു ശാസ്ത്രീയ പരിശോധനയില് കണ്ടെത്തിയിരുന്നു. സയനൈഡ് ഉള്ളില് ചെന്നാണ് റോയ് തോമസിന്റെ മരണമെന്ന് പോസ്റ്റ്മോര്ട്ടം റിപ്പോര്ട്ടില് വ്യക്തമായിരുന്നു.ബാക്കി നാലു പേരുടെ മൃതദേഹാവശിഷ്ടങ്ങള് പരിശോധനയ്ക്കായി അയച്ചതിലാണ് ഇപ്പോൾ റിപ്പോർട്ട് വന്നിരിക്കുന്നത്.
പരിശോധിച്ചത് 15 വർഷത്തിലധികം പഴക്കമുള്ള മൃതാവശിഷ്ടങ്ങൾ
2019-ലാണ് കൂടത്തായി കേസില് മൃതദേഹങ്ങള് പുറത്തെടുത്തത്. തുടര്ന്ന് മാസങ്ങള്ക്ക് ശേഷമാണ് മൃതദേഹാവശിഷ്ടങ്ങള് ഫൊറന്സിക് ലാബില് പരിശോധനയ്ക്ക് അയച്ചത്. ആദ്യം കോഴിക്കോട് റീജിയണല് കെമിക്കല് എക്സാമിനേഴ്സ് ലബോറട്ടറിയിലും പിന്നീട് ദേശീയ ഫൊറന്സിക് ലാബിലുമായിരുന്നു പരിശോധന.
2002-ല് അന്നമ്മ തോമസിനെ ആട്ടിന്സൂപ്പില് ‘ഡോഗ് കില്’ എന്ന വിഷം കലര്ത്തി നല്കിയും മറ്റു മൂന്നുപേരെ സയനൈഡ് നല്കിയും കൊലപ്പെടുത്തിയെന്നായിരുന്നു പ്രോസിക്യൂഷന് കേസ്. അന്നമ്മയെ കൊല്ലാന് ഉപയോഗിച്ച വിഷം ജോളി മൃഗാശുപത്രിയില്നിന്ന് വാങ്ങിയതിന്റെ രേഖകളും തെളിവുകളും അന്വേഷണസംഘം കണ്ടെത്തിയിരുന്നു. അതേസമയം, മറ്റുമൂന്നുപേരെ കൊലപ്പെടുത്തിയത് സയനൈഡ് നല്കിയാണെന്നത് ജോളിയുടെ കുറ്റസമ്മത മൊഴിയാണ്.
14 വര്ഷത്തിനിടെ കുടുംബത്തിലെ ആറുപേരെ ജോളി വിഷം നല്കിയും സയനൈഡ് നല്കിയും കൊലപ്പെടുത്തിയെന്നതാണ് കൂടത്തായി കൊലപാതക പരമ്പര കേസ്. ഭര്ത്താവ് റോയ് തോമസ്, ഭര്തൃമാതാവ് അന്നമ്മ തോമസ്, ഭര്തൃപിതാവ് ടോം തോമസ്, അന്നമ്മയുടെ സഹോദരന് മാത്യു മഞ്ചാടിയില്, ജോളിയുടെ രണ്ടാംഭര്ത്താവ് ഷാജുവിന്റെ ആദ്യഭാര്യ സിലി, മകള് ആല്ഫൈന് എന്നിവരാണ് കൊല്ലപ്പെട്ടത്. വൻ കുടുംബ സ്വത്ത് തട്ടിയെടുക്കലായിരുന്നു പിന്നിൽ.
14 വര്ഷത്തിനിടെ ഒരു കുടുംബത്തിലെ ആറ് പേരുടെ കൊലപാതകം നടത്തി2019 ഒക്ടോബര് അഞ്ചിനായിരുന്നു മുഖ്യപ്രതി ജോളി പൊന്നാമറ്റം വീട്ടില് നിന്ന് അറസ്റ്റിലായത്. 2002 മുതല് 2016 വരെയുള്ള കാലയളവിലാണ് ഒരേ കുടുംബത്തിലെ ആറു പേര് സമാന സാഹചര്യത്തില് മരിച്ചത്.
കേസിനെ ബാധിക്കില്ലെന്ന് അന്വേഷണ ഉദ്യോഗസ്ഥൻ
കൂടത്തായി കൊലപാതക പരമ്പര കേസിലെ ദേശീയ ഫൊറന്സിക് ലാബ് റിപ്പോര്ട്ട് തിരിച്ചടിയല്ലെന്ന് മുന് അന്വേഷണ ഉദ്യോഗസ്ഥന് കെ ജി സൈമണ്. കാലപ്പഴക്കം കൊണ്ട് മരണകാരണത്തില് വ്യക്തത കിട്ടണമെന്നില്ല. സംസ്ഥാനത്തെ ഫൊറൻസിക്ക് ലാബിൽ പരിശോധിച്ചപ്പോഴും 4 മൃതദേഹങ്ങളിൽ നിന്ന് വിഷത്തിന്റെയോ സൈനൈഡിന്റെയോ സാന്നിധ്യം കണ്ടെത്തിയിരുന്നില്ല. കാലപ്പഴക്കം കൊണ്ട് സംഭവിക്കുന്നതാണത്. തുടര്ന്ന് നാല് പേരുടെയും മരണം സംബന്ധിച്ച് പരിശോധിക്കാൻ ഡോക്ടറുമാരുടെ പാനൽ തയ്യാറാക്കുകയും അവരുടെ റിപ്പോർട്ട് ലഭ്യമാക്കുകയും ചെയ്തിട്ടുണ്ട്. സംസ്ഥാനത്ത് നടത്തിയ പരിശോധ ഫലം കൂടുതൽ ഉറപ്പിക്കുന്നതിന് വേണ്ടിയാണ് കേന്ദ്ര ലാബിലേയ്ക്ക് അയച്ചതെന്നും കെ ജി സൈമൺ പറഞ്ഞു.
