കൊയിലാണ്ടിക്ക് അടുത്ത് ആനക്കുളം ഭാഗത്തായി റെയിൽവേ ട്രാക്കിൽ കണ്ടെത്തിയ യുവാവിൻ്റെ മരണം കൊലപാതകം. 30 വയസ്സുതോന്നിക്കുന്ന അജ്ഞാതനെ തീവണ്ടിയിൽ നിന്ന് വീണുമരിച്ചനിലയിൽ കണ്ടെത്തിയ സംഭവത്തിൽ പൊലീസ് അന്വേഷണത്തിലാണ് കൊലപാതകം സ്ഥിരീകരിച്ചത്. വാക് തർക്കത്തെ തുടർന്ന് ഇയാളെ സഹയാത്രികൻ ട്രെയിനിൽ നിന്നും തള്ളിയിട്ടതാണെന്നാണ് പൊലീസ് കണ്ടെത്തൽ.
സംഭവത്തിൽ സഹയാത്രികനായ തമിഴ്നാട് ശിവഗംഗ സ്വദേശി സോനമുത്തുവിനെ കോഴിക്കോട് റെയിൽവേ പോലീസ് അറസ്റ്റ് ചെയ്തു. മരിച്ച യുവാവിനെ ഇതുവരെ തിരിച്ചറിഞ്ഞിട്ടില്ല. സംഭവത്തിന് തൊട്ടുമുമ്പ് ട്രെയിനിന്റെ ഡോറിനടുത്ത് ഇരുവരും അപകടകരമാം വിധത്തിൽ നിൽക്കുന്നതിൻ്റെ ദൃശ്യങ്ങൾ പൊലീസിന് ലഭിച്ചിരുന്നു. വേറൊരു യാത്രക്കാരൻ പകർത്തിയ ദൃശ്യങ്ങളാണ് പോലീസിന് ലഭിച്ചിരിക്കുന്നത്. ഞായറാഴ്ച രാത്രി മംഗളൂരു-തിരുവനന്തപുരം മലബാർ എക്സ്പ്രസിൽ ആണ് ഇവർ സഞ്ചരിച്ചത്.
സംഭവത്തിന് മുമ്പ് മരിച്ച യുവാവും കസ്റ്റഡിയിലുള്ള സോനമുത്തുവുമായി വാക്കേറ്റം നടന്നിരുന്നു. കംപാർട്ട്മെന്റിന്റെ വാതിലിനരികിൽനിന്ന് ഇരുവരും സംസാരിക്കുന്നതിന്റെ വീഡിയോദൃശ്യം പോലീസിന് ലഭിച്ചിട്ടുണ്ട്. എന്നാൽ എന്തിനെ ചൊല്ലിയാണ് തർക്കം എന്നു വ്യക്തമല്ല. മാത്രമല്ല ഇവർ തമ്മിൽ നേരത്തെ പരിചയമുള്ളവരാണോ എന്നതും വ്യക്തമല്ല.
ഞായറാഴ്ച രാത്രി പതിനൊന്നുമണിയോടെയാണ് യുവാവ് പാളത്തിനരികിൽ വീണുകിടക്കുന്നത് പ്രദേശവാസികൾ കണ്ടത്. കൊയിലാണ്ടിയിൽനിന്ന് ഫയർ ഫോഴ്സും പോലീസുമെത്തി യുവാവിനെ താലൂക്കാശുപത്രിയിൽ എത്തിച്ചെങ്കിലും മരിച്ചിരുന്നു. മൃതദേഹം മെഡിക്കൽ കോളേജ് മോർച്ചറിയിൽ സൂക്ഷിച്ചിരിക്കുകയാണ്. അന്വേഷണം തുടരുകയാണെന്ന് കോഴിക്കോട് റെയിൽവേ പോലീസ് അറിയിച്ചു.
വീഡിയോ എടുത്തുതതുമായി ബന്ധപ്പെട്ടാണ് ഇരുവരും തർക്കിക്കുന്നത് എന്നാണ് വീഡിയോ ദൃശ്യങ്ങളിൽ നിന്ന് വ്യക്തമാകുന്നത്. എന്നാൽ എന്ത് വീഡിയോയാണ് എന്നത് സംബന്ധിച്ച് വിവരങ്ങളൊന്നും ലഭിച്ചിട്ടില്ല.
