ദേശീയ ചലച്ചിത്ര പുരസ്കാരത്തിൽ വീണ്ടും അഭിമാന മികവുമായ് മലയാളം. മികച്ച സംവിധായകനും സഹനടനും ഗായികയ്ക്കും ഉൾപ്പെടെ 11 പുരസ്കാരങ്ങൾ സ്വന്തമാക്കി.
ബിഗ് ബജറ്റുകളും കോടികളുടെ താരനിരയുമല്ല പുതു സിനിമ എന്ന പ്രഖ്യാപനം കൂടിയാണ് 68 ാമത് ചലച്ചിത്ര പുരസ്കാരത്തിലെ മലയളത്തിൻ്റെ നേട്ടങ്ങൾ
‘അയ്യപ്പനും കോശിയും’ ഒരുക്കിയ സച്ചിയാണ് മികച്ച സംവിധായകൻ. മരണാനന്തര ബഹുമതിയായാണ് പുരസ്കാരം.
തമിഴ് താരം സൂര്യ (സൂററൈ പോട്ര്)യും ഹിന്ദി സ്റ്റാർ അജയ് ദേവ്ഗണും (തനാജി, ഭുജ്) ഏറ്റവും നല്ല നടനുള്ള പുരസ്കാരം പങ്കിട്ടു. മലയാളിയായ അപർണ ബാലമുരളി(സൂററൈ പോട്ര്)യാണ് മികച്ച നടി.
ബിജു മേനോൻ അയ്യപ്പനും കോശിയും എന്ന ചിത്രത്തിലെ തന്നെ അഭിനയത്തിന് മികച്ച സഹനടനുള്ള പുരസ്കാരം നേടി. ഇതേ സിനിമയിലെ ഫോക് ഗാനം പാടിയ നഞ്ചിയമ്മ മികച്ച ഗായികയ്ക്കുള്ള പുരസ്കാരം സ്വന്തമാക്കി
‘തിങ്കളാഴ്ച്ച നിശ്ചയ’മാണ് മികച്ച മലയാള സിനിമ
മികച്ച സംവിധായകൻ, മികച്ച ഗായിക, മികച്ച സഹനടൻ. മികച്ച സംഘട്ടന സംവിധാനം എന്നീ നാല് പുരസ്കാരങ്ങളാണ് ‘അയ്യപ്പനും കോശിയും’ സ്വന്തമാക്കിയത്.മാഫിയാ ശശി, സുപ്രീം സുന്ദർ, രാജശേഖർ എന്നിവരാണ് സംഘട്ടന സംവിധായകർ.
നോണ് ഫീച്ചര് വിഭാഗത്തില് മികച്ച ചിത്രം ശോഭ തരൂര് ശ്രിനിവാസന് സംവിധാനം ചെയ്ത ‘റാപ്സഡി ഓഫ് റയിന്സ്.- ദ മണ്സൂണ് ഓഫ് കേരള’ നേടി. ഇതേ വിഭാഗത്തില് മികച്ച ഛായാഗ്രാഹക പുരസ്കാരം നിഖില് എസ്. പ്രവീണി(ശബ്ദിക്കുന്ന കലപ്പ) നാണ് .കാവ്യപ്രകാശ് സംവിധാനം ചെയ്ത വാങ്കിന് പ്രത്യേക ജൂറി പരാമർശം കരസ്ഥമാക്കി.
ബിഗ് ബജറ്റ് ചിത്രങ്ങളുടെ ഉച്ചയൂണിന് ചെലവാക്കുന്ന പണം കൊണ്ട് മികച്ച സിനിമയെടുക്കാമെന്ന് മലയാള സിനിമ തെളിയിച്ചുവെന്ന് ചലച്ചിത്ര അക്കാദമി ചെയർമാൻ രഞ്ജിത് പ്രതികരിച്ചു.
പ്രധാന പുരസ്കാരങ്ങൾ
- ഫീച്ചർ സിനിമ: സൂററൈ പോട്ര്
- സംവിധാനം : സച്ചി (അയ്യപ്പനും കോശിയും)
- നടൻ: സൂര്യ, അജയ് ദേവ്ഗൺ
- നടി: അപർണ ബാലമുരളി
- സഹനടൻ : ബിജു മേനോൻ
- സഹനടി- ലക്ഷ്മിപ്രിയ ചന്ദ്രമൗലി (സിവരഞ്ജിനിയും ഇന്നും സില പെൺകളും)
- ഗായിക: നഞ്ചിയമ്മ (അയ്യപ്പനും കോശിയും)
- ഗായകൻ: രാഹുൽ ദേശ്പാണ്ഡെ
- തിരക്കഥ: സുധ കൊങ്കാര, ശാലിനി(സൂററൈ പോട്ര്)
- ക്യാമറ: സുപ്രതിം ബോൽ(അവിജാത്രിക്)
- എഡിറ്റിങ്: ശ്രീകർ പ്രസാദ് (ശിവരഞ്ജിനിയും സില പെൺകളും)
- സംഗീതസംവിധാനം: തമൻ (അല വൈകുണ്ഠപുരം ലോ), ജി.വി. പ്രകാശ് (സൂററൈ പോട്ര്)
- പശ്ചാത്തല സംഗീതം: ജി.വി. പ്രകാശ്(സൂററൈ പോട്ര്)
- സംഘട്ടനസംവിധാനം: മാഫിയാ ശശി, രാജശേഖർ,സുപ്രീം സുന്ദർ (അയ്യപ്പനും കോശിയും)
- പുതുമുഖ സംവിധായകൻ: മഡോണ അശ്വിൻ(മണ്ടേല)
- ജനപ്രിയ ചിത്രം: താനാജി ദ് അൺസങ് വാരിയർ (സംവിധായകൻ: ഓം റൗത്)
- കുട്ടികളുടെ ചിത്രം: സുമി സിനിമ
- ഗാനരചന: മനോജ് മുൻതാഷിർ
- നൃത്തസംവിധാനം: സന്ധ്യ രാജു(നാട്യം)
- ചമയം: റാം ബാബു(നാട്യം)
- മികച്ച പ്രൊഡക്ഷൻ ഡിസൈൻ- അനീസ് നാടോടി (കപ്പേള)
- മലയാള ചിത്രം: തിങ്കളാഴ്ച നിശ്ചയം
- തമിഴ് ചിത്രം: ശിവരഞ്ജിനിയും സില പെൺകളും
- തെലുങ്ക് ചിത്രം : കളർ ഫോട്ടോ
- സിനിമാ സംബന്ധിയായ പുസ്തകം: ദ ലോങ്ങസ്റ്റ് കിസ് (കിശ്വർ ദേശായി)
- മികച്ച വിദ്യാഭ്യാസ ചിത്രം-ഡ്രീമിങ് ഓഫ് വേർഡ്സ് (മലയാളം, സംവിധായകൻ നന്ദൻ)
സിനിമാ സൗഹൃദ സംസ്ഥാനമായി മധ്യപ്രദേശ് തിരഞ്ഞെടുക്കപ്പെട്ടു.ഈ വിഭാഗത്തിൽ പ്രത്യേക പുരസ്കാരം ഉത്തരാഖണ്ഡ്, ഉത്തർപ്രദേശ് എന്നീ സംസ്ഥാനങ്ങൾ സ്വന്തമാക്കി.
വിപുല് ഷായാണ് ജൂറി ചെയര്മാന്. കേരളത്തില് നിന്ന് വിജി തമ്പി ജൂറിയിലുണ്ട്.
