അമേരിക്കന് മുന് പ്രസിഡന്റ് ഡോണള്ഡ് ട്രംപ് ന്യൂക്ലിയര് വിവരങ്ങള്ടക്കമുള്ള അമേരിക്കയുടെ രഹസ്യ രേഖകള് അശ്രദ്ധമായി കൈകാര്യം ചെയ്തതായി കുറ്റപത്രം. യുദ്ധ രഹസങ്ങൾ ഉൾപ്പെടുന്ന മിലിട്ടറി പ്ലാനുകള് അടക്കമുള്ള ക്ലാസിഫൈഡ് ഗണത്തിലുള്ള രേഖകള് ട്രംപ് കുളിമുറിയിലും ഹാളിലും സൂക്ഷിച്ചതായി വരെ കണ്ടെത്തിയതായി കുറ്റപത്രം പറയുന്നു. വസതിയിലെ കുളിമുറിയിലും ഹാളിലുമായാണ് ക്ലാസിഫൈഡ് സ്വഭാവമുള്ള രേഖകള് സൂക്ഷിച്ചത്. എന്നാൽ ഇത് സംബന്ധിച്ച് അന്വേഷണ ഉദ്യോഗസ്ഥരോടെ നുണ പറഞ്ഞു. ഇതിനു മേലുള്ള അന്വേഷണം തടസപ്പെടുത്താനും ട്രംപ് ശ്രമിച്ചുവെന്നും കുറ്റപത്രം വിശദമാക്കുന്നു.
എഫ്ബിഐയില് നിന്ന് രഹസ്യ രേഖകള് ഒളിച്ച് വച്ചതിന് ട്രംപിന്റെ സഹായി വാള്ട്ട് നോട്ടയ്ക്ക് എതിരെയും കുറ്റങ്ങള് ചുമത്തിയിട്ടുണ്ട്. പ്രസിഡന്റ് പദവിയൊഴിഞ്ഞ ട്രംപ് ക്ലാസിഫൈഡ് സ്വഭാവമുള്ള 300 രേഖകള് പാം ബീച്ചിലെ മാര് എ ലാഗോ എന്ന ആഡംബര വസതിയിലേക്ക് മാറ്റി. ഇതൊരു സ്വകാര്യ ക്ലബ്ബ് കൂടിയാണ്. അമേരിക്കയുടെ മുന് പ്രസിഡന്റിനെതിരെ ഫെഡറല് കുറ്റകൃത്യങ്ങള് ചുമത്തിക്കൊണ്ടുള്ള ആദ്യ കുറ്റപത്രമാണ് ഇത്. ആയിരക്കണക്കിന് അതിഥികളും ക്ലബ്ബ് അംഗങ്ങളും പങ്കെടുക്കുന്ന പരിപാടികള് നടക്കുന്ന ഇടത്താണ് ക്ലാസിഫൈഡ് സ്വഭാവമുള്ള രേഖകള് അലക്ഷ്യമായി സൂക്ഷിച്ചത്.
2024ലെ തെരഞ്ഞെടുപ്പില് വീണ്ടും മത്സരിക്കാനുള്ള ശ്രമത്തിലാണ് ട്രംപ്. ഇതിനിടയിൽ തെറ്റൊന്നും ചെയ്തിട്ടില്ലെന്നാണ് വാദിക്കുന്നത്.
