അപകടത്തിലായ വാഹന ഉടമയിൽ നിന്നും കൈക്കൂലിയായി പണവും മദ്യവും കൈപ്പറ്റിയ ഗ്രേഡ് എസ്.ഐ. അറസ്റ്റില്. ഗാന്ധിനഗര് സ്റ്റേഷനിലെ എസ്.ഐ. വി.എച്ച്. നസീറിനെയാണ് വിജിലന്സ് സംഘം അറസ്റ്റ് ചെയ്തത്. കോട്ടയം മെഡിക്കല് കോളജ് ആശുപത്രിക്ക് സമീപമുള്ള സ്വകാര്യ ലോഡ്ജില്നിന്ന് വിജിലന്സ് എസ്.പി. വി.ജി.വിനോദ് കുമാറിന്റെ നേതൃത്വത്തിലായിരുന്നു അറസ്റ്റ്. ഇയാളില്നിന്ന് 2000 രൂപയും ഒരു കുപ്പി മദ്യവും പിടിച്ചെടുത്തു.
കഴിഞ്ഞദിവസം ആര്പ്പൂക്കര തൊണ്ണംകുഴിയില് പരാതിക്കാരൻ്റെ വാഹനം അപകടത്തില്പ്പെട്ടിരുന്നു. 10,000 രൂപ നല്കി ഈ കേസ് ഒത്തുതീര്പ്പാക്കി. അപകടത്തില്പ്പെട്ട വാഹനത്തില് അരലിറ്റര് വിദേശമദ്യം ഉണ്ടായിരുന്നത് മുൻ നിർത്തി വീണ്ടും വിലപേശി കൈക്കൂലി ആവശ്യപ്പെട്ടു.
തൃക്കൊടിത്താനം സ്റ്റേഷനില്നിന്ന് നടപടിക്ക് വിധേയനായി ഗാന്ധിനഗറില് സ്ഥലം മാറിയെത്തിയതായിരുന്നു നസീര്.
