ബലാത്സംഗ കുറ്റങ്ങള് ചുമത്തുന്നതില് ലിംഗവിവേചനം പാടില്ലെന്ന് കേരള ഹൈക്കോടതി. വിവാഹമോചിതരായ ദമ്പതികള് തങ്ങളുടെ കുട്ടിയുടെ സംരക്ഷണത്തെ സംബന്ധിച്ച് നല്കിയ കേസിൽ തീര്പ്പ് കല്പ്പിക്കുമ്പോഴാണ് ജസ്റ്റിസ് എ.മുഹമ്മദ് മുഷ്താഖ് നിയമത്തിലെ വിവേചനം ഒഴിവാക്കേണ്ടുന്നതിനെ കുറിച്ച് പറഞ്ഞത്.
കേസിലെ ഭര്ത്താവ് ഒരിക്കല് ബലാത്സംഗക്കേസില് പ്രതിയാണെന്ന കാര്യം കോടതിയില് ഉന്നയിച്ചിരുന്നു. എന്നാൽ ഇയാള് ഇപ്പോള് ജാമ്യത്തിലാണെന്നും വ്യാജ വിവാഹ വാഗ്ദാനത്തില് ലൈംഗികാരോപണം ഉന്നയിച്ചതിൻ്റെ അടിസ്ഥാനത്തിലായിരുന്നു അന്നത്തെ കേസെന്നും ഭര്ത്താവിന്റെ അഭിഭാഷകന് വാദിച്ചു.
തുടര്ന്നാണ് ഇന്ത്യന് ശിക്ഷാനിയമത്തിലെ 376-ാം വകുപ്പിന് (ബലാത്സംഗത്തിനുള്ള ശിക്ഷ) ലിംഗ സമത്വമില്ലെന്ന് ഹൈക്കോടതി വാക്കാല് പരാമര്ശം നടത്തിയത്
‘376-ാം വകുപ്പില് ലിംഗ സമത്വമില്ല. വിവാഹ വാഗ്ദാനം നല്കി ഒരു സ്ത്രീ പുരുഷനെ കബളിപ്പിച്ചാല്, അവള്ക്കെതിരെ നടപടിയെടുക്കാന് കഴിയില്ല. എന്നാല് ഒരു പുരുഷന് സമാനമായ കുറ്റം ചെയ്താല് അയാളുടെ പേരില് കേസ് ചുമത്തപ്പെടും. ഇത് എന്ത് നിയമമാണ്. നിയമം ലിംഗ സമത്വമുള്ളതായിരിക്കണം’ ജസ്റ്റിസ് മുഹമ്മദ് മുഷ്താഖ് പറഞ്ഞു.
ബലാത്സംഗ കുറ്റത്തിന്റെ നിയമപരമായ വ്യവസ്ഥകള് ലിംഗവിവേചനമുള്ളതാണെന്ന് ഈ വര്ഷമാദ്യം മറ്റൊരു വിധിന്യാത്തിലും ജസ്റ്റിസ് മുഷ്താഖ് സൂചിപ്പിച്ചിരുന്നു.
ഒരു സ്ത്രീ, വിവാഹം കഴിക്കാമെന്ന തെറ്റായ വാഗ്ദ്ധാനത്തില് പരസ്പര സമ്മതത്തോടെ ഒരു പുരുഷനുമായി ലൈംഗിക ബന്ധത്തിലേര്പ്പെട്ടാല് ബലാത്സംഗത്തിന് ശിക്ഷിക്കാനാവില്ല. എന്നാല് ഒരു പുരുഷന്, ഒരു സ്ത്രീയെ വിവാഹം കഴിക്കാമെന്ന തെറ്റായ വാഗ്ദ്ധാനം ചെയ്യുകയും ആ സ്ത്രീയുമായി ലൈംഗിക ബന്ധത്തിലേര്പ്പെടുകയും ചെയ്യുന്നത് ബലാത്സംഗത്തിനുള്ള കേസ് നടപടികളിലേക്ക് കേസിലേക്ക് നയിക്കുന്നുവെന്നും അദ്ദേഹം ഇതിന് അടിസ്ഥനമായി ഉന്നയിച്ചു.
