ജനറൽ വിഭാഗത്തിന് ഗോത്ര പദവി നൽകാനുള്ള സംവരണ രാഷ്ട്രീയക്കളി സംഘർഷ ഭൂമിയാക്കിയ മണിപ്പൂരിൽ ഏറ്റുമുട്ടൽ തുടരുന്നു. കഴിഞ്ഞ ദിവസവും തുടർന്ന കലാപത്തിൽ ഒമ്പതു പേർ കൊല്ലപ്പെട്ടു. നിരവധി പേര്ക്ക് പരിക്കേല്ക്കുകയും വീടും വ്യാപാര സ്ഥാപനങ്ങളും നശിപ്പിക്കപ്പെടുകയും ചെയ്തു. ഇംഫാൽ താഴ് വരയിലു ഖമൻലോങ് മേഖലയിലാണ് സംഘര്ഷം പൊട്ടിപ്പുറപ്പെട്ടത്.
ഇരുവിഭാഗങ്ങള് തമ്മിലുണ്ടായ വെടിവെപ്പിലാണ് ഒമ്പതുപേരും കൊല്ലപ്പെട്ടതെന്ന് സൈന്യത്തിൻ്റെ വിശദീകരണം. പരിക്കേറ്റ പലരും ഗുരുതരാവസ്ഥയില് തുടരുന്നു. മേഖലയിൽ കർഫ്യൂ കർശനമാക്കി.
മണിപുരില് മെയ്തി, കുകി സമുദായാംഗങ്ങള് തമ്മില് മാസങ്ങളായി തുടരുന്ന സംഘര്ഷമാണ്. സമാധാനശ്രമങ്ങള് നടക്കുന്നതിനിടെയാണ് വീണ്ടും സംഘര്ഷം പൊട്ടിപ്പുറപ്പെട്ടിരിക്കുന്നത്. സംഘര്ഷത്തില് ഇതുവരെ നൂറോളം പേര് മരിച്ചതായാണ് റിപ്പോര്ട്ട്. സംഘർഷത്തെ തുടർന്ന് നിരവധി പേര്ക്ക് പരിക്കേല്ക്കുകയും ആയിരക്കണക്കിനുപേര്ക്ക് പലായനം ചെയ്യേണ്ടിവരികയും ചെയ്തിട്ടുണ്ട്.
ചെറിയ ജനസംഖ്യയുളള വികസനത്തിലേക്ക് എത്താൻ തുടങ്ങിയ സംസ്ഥാനത്തിന് ഉണക്കാനാവാത്ത മുറിവുകൾ നൽകി സംഘർഷ ഭൂമിയാക്കി തീർത്തിരിക്കയാണ്. ഗോത്രവർഗ്ഗങ്ങൾ മലകളിലേക്ക് പലായനം ചെയ്യേണ്ടി വന്നു. 40,000 പേർക്ക് എങ്കിലും വീടും താമസ സ്ഥലവും നഷ്ടപ്പെട്ടു.
താഴ് വരയിൽ അവശേഷിക്കുന്ന സ്ഥലങ്ങളിൽ നിയന്ത്രണമില്ലാത്ത ആക്രമണം തുടരുന്നു. അയൽ സംസ്ഥാനങ്ങളിലും ഇതുമൂലം അസ്വസ്ഥത പടരുന്നു. അഭയാർഥി പ്രവാഹം ഗോത്ര വർഗ്ഗങ്ങളെ ആശങ്കയിലാക്കുന്നുണ്ട്.
