മഹീന്ദ്രയുടെ ഫ്ളാഗ്ഷിപ്പ് എസ്.യു.വിയായ XUV700-ന്റെ തുടക്കം വിപണിയിലെ റെക്കോഡ് . അവതരിപ്പിച്ച് നാല് മാസം പിന്നിടുമ്പോൾ ഈ വാഹനം സ്വന്തമാക്കാന് എത്തിയവരുടെ എണ്ണം ഒരുലക്ഷം. മൂന്ന് മണിക്കൂറില് 50,000 ബുക്കിങ്ങ് എന്ന റെക്കോഡ് സ്വന്തമാക്കിയാണ് തുടക്കമിട്ടത്.
വാഹനങ്ങളില് ഉപയോഗിക്കുന്ന സെമി കണ്ടക്ടര് ചിപ്പുകളുടെ ക്ഷാമം തുടരുകയാണ്.നിര്മാണത്തെ ബാധിക്കുന്നതിനാല് XUV700, ഥാര് പോലുള്ള വാഹനങ്ങളുടെ ബുക്കിങ്ങ് കാത്തിരിപ്പ് ഉയരുമെന്നും, നിലവിലുള്ള കാത്തിരിപ്പ് കാലയളവ് ഉടന് കുറയുമെന്ന് പ്രതീക്ഷിക്കുന്നില്ലെന്നും മഹീന്ദ്ര ഗ്രൂപ്പ് മേധാവി കേരളപോസ്റ്റിനോട് പറഞ്ഞു.
മഹീന്ദ്ര XUV700-ന്റെ വിതരണത്തില് പെട്രോള് മോഡലിനാണ് കൂടുതല് പ്രാധാന്യം നല്കിയിരുന്നത്. പെട്രോള് എന്ജിന് മോഡല് ഒക്ടോബര് അവസാനത്തോടെ ഉപയോക്താക്കള്ക്ക് കൈമാറി തുടങ്ങിയിരുന്നു. എന്നാല്, ഒരു മാസത്തിന് ശേഷം നവംബര് അവസാനത്തോടെയാണ് ഡീസല് മോഡലുകള് ലഭ്യമാക്കിയത്. ഉയര്ന്ന വേരിയന്റുകള്ക്ക് ഇപ്പോള് ഏകദേശം ഒരു വര്ഷം വരെ കാത്തിരിക്കേണ്ടി വരുന്നുണ്ടെന്നാണ് സൂചന. താഴ്ന്ന വേരിയന്റുകള് ആറ് മാസത്തില് ലഭ്യമാകും.
MX, AX3, AX5, AX7 എന്നീ നാല് വേരിയന്റുകളില് ഓട്ടോമാറ്റിക്-മാനുവല് ട്രാന്സ്മിഷനുകളില് 11 മോഡലുകളായാണ് XUV700 വില്പ്പനയ്ക്ക് എത്തുന്നത്. MX-ന് 12.49 ലക്ഷം രൂപയിലാണ് വില ആരംഭിക്കുന്നത്. ഉയര്ന്ന വകഭേദമായ AX7 ലക്ഷ്വറിക്ക് 21.29 ലക്ഷം രൂപയാണ് എക്സ്ഷോറും വില. അതേസമയം, MX ഡീസലിന് 12.99 ലക്ഷം രൂപയിലാണ് വില ആരംഭിക്കുന്നത്. ഏറ്റവും ഉയര്ന്ന പതിപ്പായ AX7 ലക്ഷ്വറി ഓള് വീല് ഡ്രൈവ് മോഡലിന് 22.89 ലക്ഷം രൂപയും എക്സ്ഷോറും വിലയാക്കിയിട്ടുണ്ട്.
മഹീന്ദ്രയുടെ W601 മോണോകോക്ക് പ്ലാറ്റ്ഫോമിലാണ് എക്സ്.യു.വി. 700 ഒരുങ്ങിയിരിക്കുന്നത്. 2.0 ലിറ്റര് പെട്രോള്, 2.2 ലിറ്റര് ഡീസല് എന്നീ എന്ജിനുകളാണ് ഈ വാഹനത്തിന് കരുത്തേകുന്നത്. പെട്രോള് എന്ജിന് 197 ബി.എച്ച്.പി. പവറും 380 എന്.എം.ടോര്ക്കുമാണ് നല്കുന്നത്. ഡീസല് എന്ജിന് 153, 182 ബി.എച്ച്.പി. പവറും 360, 420 എന്.എം. ടോര്ക്കുമാണ് .
