മാധ്യമപ്രവര്ത്തകന് കെ.എം. ബഷീര് വാഹനം ഇടിച്ച് മരിച്ച കേസില് പ്രതികള്ക്കെതിരായ മനഃപൂര്വമായ നരഹത്യാക്കുറ്റം കോടതി ഒഴിവാക്കി. ഒന്നാംപ്രതിയും ഐ.എ.എസ്. ഉദ്യോഗസ്ഥനുമായ ശ്രീറാം വെങ്കിട്ടരാമന്, രണ്ടാംപ്രതി വഫ ഫിറോസ് എന്നിവരെയാണ് വാഹനം ഇടിപ്പിച്ച് കൊലപ്പെടുത്തി എന്ന കുറ്റത്തിൽ നിന്നും കോടതി ഒഴിവാക്കിയത്. കേസിലെ പ്രതികളായ രണ്ടുപേരും സമര്പ്പിച്ച വിടുതല് ഹര്ജിയിലാണ് തിരുവനന്തപുരം അഡീഷണല് ജില്ലാ സെഷന്സ് കോടതി വിധി പറഞ്ഞത്.
മനഃപൂര്വമല്ലാത്ത നരഹത്യ, മദ്യപിച്ച് വാഹനമോടിച്ചു, അലക്ഷ്യമായി വാഹനമോടിച്ചു തുടങ്ങിയ കുറ്റങ്ങള് മാത്രമേ ശ്രീറാമിനെതിരേ നിലനില്ക്കുമെന്ന് കോടതി വ്യക്തമാക്കി. രണ്ടാംപ്രതിയായ വഫ ഫിറോസിനെതിരേ മോട്ടോര് വാഹന നിയമത്തിലെ കുറ്റം മാത്രമേ നിലനില്ക്കുകയുള്ളൂവെന്നും കോടതി പറഞ്ഞു. കേസിന്റെ വിചാരണ സെഷന്സ് കോടതിയില്നിന്ന് മജിസ്ട്രേറ്റ് കോടതിയിലേക്ക് മാറ്റുകയും ചെയ്തു. ജൂലായ് 20-ന് പ്രതികള് വിചാരണയ്ക്കായി മജിസ്ട്രേറ്റ് കോടതിയില് ഹാജരാകണമെന്നും കോടതി നിര്ദേശിച്ചിട്ടുണ്ട്.
തനിക്കെതിരേ ചുമത്തിയ നരഹത്യാക്കുറ്റം നിലനില്ക്കില്ല, താന് മദ്യപിച്ച് വാഹനമോടിച്ചിട്ടില്ല തുടങ്ങിയ വാദങ്ങള് ഉന്നയിച്ചാണ് ശ്രീറാം വെങ്കിട്ടരാമന് വിടുതല് ഹര്ജി നല്കിയത്. ബഷീറിനെ തനിക്ക് മുന്പരിചയമില്ലെന്നും അതിനാല് വാഹനമിടിപ്പിച്ച് കൊലപ്പെടുത്തിയെന്ന വാദം നിലനില്ക്കില്ലെന്നുമായിരുന്നു ശ്രീറാം കോടതിയില് പറഞ്ഞത്. ശ്രീറാമിനോട് അമിതവേഗത്തില് വാഹനമോടിക്കാന് പറഞ്ഞിട്ടില്ലെന്ന് വഫയും കോടതിയില് വാദിച്ചിരുന്നു.
രണ്ടുപ്രതികളുടെയും വാദങ്ങളെ പ്രോസിക്യൂഷന് എതിര്ത്തു. സംഭവത്തിന് പിന്നാലെ ശ്രീറാം വെങ്കിട്ടരാമന് വൈദ്യപരിശോധന വൈകിപ്പിച്ചതും ആദ്യഘട്ടത്തില് വഫയാണ് വാഹനമോടിച്ചതെന്ന മൊഴി നല്കിയതും പ്രോസിക്യൂഷന് കോടതിയില് ചൂണ്ടിക്കാട്ടിയിരുന്നു.
