ലോകത്തെ ഞെട്ടിച്ച് ന്യൂസിലാന്ഡ് പ്രധാനമന്ത്രി ജസീന്ത ആര്ഡേണിൻ്റെ അപ്രതീക്ഷിത രാജിപ്രഖ്യാപനം. അടുത്ത മാസം ഏഴിന് രാജിവയ്ക്കും.കാലാവധി തീരാന് പത്തുമാസം ശേഷിക്കെയാണ് പ്രധാനമന്ത്രി പദത്തില് നിന്ന് മാറുന്നതായി പ്രഖ്യാപിച്ചത്. ഒരു തിരഞ്ഞെടുപ്പില്ക്കൂടി മത്സരിക്കാൻ ഊര്ജം ഇല്ല. പ്രധാനമന്ത്രി പദത്തില് നിന്ന് ഒഴിയുന്നതിനൊപ്പം തന്നെ പാര്ട്ടിയിലെ സ്ഥാനവും ഒഴിയുമെന്നും വ്യക്തമാക്കി.
ലേബര് പാര്ട്ടിയുടെ വാര്ഷിക യോഗത്തിലാണ് അപ്രതീക്ഷിത രാജി പ്രഖ്യാപനം. ഈ വര്ഷം ഒക്ടോബര് 14-ന് തിരഞ്ഞെടുപ്പ് നടക്കാനിരിക്കയൊണ് രാജി പ്രഖ്യാപനം. ഫെബ്രുവരി ഏഴിന് ന്യൂസിലാന്ഡ് പ്രധാനമന്ത്രി സ്ഥാനവും ലേബര് പാര്ട്ടിയുടെ നേതൃസ്ഥാനവും ഒഴിയുമെങ്കിലും പൊതുതിരഞ്ഞെടുപ്പ് വരെ എം.പി. സ്ഥാനത്ത് തുടരുമെന്നും അവര് അറിയിച്ചു.
ജസീന്ത ആർഡന്റെ ജനപ്രീതി തന്നെയാണ് ന്യൂസിലാന്ഡില് ലേബര് പാര്ട്ടി വീണ്ടും അധികാരത്തിലെത്തിച്ചത്. രണ്ടാം മന്ത്രിസഭയിലും പുതുമയാർന്ന നിരവധി കാര്യങ്ങളാണ് ജസീന്ത നടപ്പാക്കിയത്. ചരിത്രത്തിൽ ആദ്യമായി ഗേ വിഭാഗത്തിൽപ്പെട്ട ഒരാളെ ഉപപ്രധാനമന്ത്രിയാക്കി ന്യൂസിലാന്ഡ് ലോകത്തെ തന്നെ ഞെട്ടിച്ചിരുന്നു. ഗ്രാന്ഡ് റോബേര്ട്ട്സണാണ് ഉപപ്രധാനമന്ത്രി.
ആർത്തിയില്ല അധികാരത്തിൽ കടിച്ചു തൂങ്ങലില്ല
ഇത്തരത്തില് അധികാരമുള്ളൊരു പദവി വലിയ ഉത്തരവാദിത്വമാണ്. എപ്പോള് നയിക്കണമെന്ന് അറിയണമെന്നത് പോലെ തന്നെ എപ്പോള് പിന്മാറണമെന്ന് അറിയുന്നതും ഉത്തരവാദിത്വമാണ്. ഈ പദവി എന്താണെന്ന് എനിക്ക് നന്നായി അറിയാം. പദവിയോട് നീതിപുലര്ത്താനുള്ള വിഭവങ്ങള് ഇപ്പോള് എന്റെ കയ്യില് ഇല്ല. അതിനാല് പദവി ഒഴിയാന് സമയമായെന്നും ജസിന്ത ആര്ഡേണ് യോഗത്തില് അറിയിച്ചു.
‘ഞാന് മനുഷ്യനാണ്, രാഷ്ട്രീയക്കാര് മനുഷ്യരാണ്. കഴിയാവുന്നിടത്തോളം നമ്മള് എല്ലാം നല്കുന്നു. എന്നാല്, എനിക്കിപ്പോള് സമയമായി’- ജസിന്ത പറഞ്ഞു. കഴിഞ്ഞ വേനലവധിയില് തനിക്ക് ഇനിയും സ്ഥാനത്തിരിക്കാനുള്ള ഊര്ജ്ജമുണ്ടോയെന്ന് വിലയിരുത്തിയിരുന്നു. എന്നാല്, അതില്ലെന്നാണ് മനസ്സിലായതെന്നും അവര് പറഞ്ഞു.
മന്ത്രിസഭയിലെ മലയാളി വനിതയുടെ സന്നിധ്യത്തിലൂടെ ഇന്ത്യക്കാർക്കും പ്രത്യേകിച്ച് കേരളീയർക്കും അഭിമായിരുന്നു. പ്രിയങ്കാ രാധാകൃഷ്ണനാണ് ജസീന്ത ആര്ഡേണ് മന്ത്രിസഭയില് ഇടംനേടിയത്. എറണാകുളം പറവൂര് സ്വദേശിയാണ് പ്രിയങ്ക. പ്രിയങ്കക്ക് മൂന്ന് വകുപ്പുകളുടെ ചുമതലയാണ് നൽകിയിരുന്നത്. സാമൂഹികം, യുവജനക്ഷേമം, സന്നദ്ധ മേഖല. 0 അംഗ മന്ത്രിസഭയില് ഗോത്ര വര്ഗക്കാര്ക്കും സ്ത്രീകള്ക്കും ഒരു പോലെ പ്രാധാന്യം നൽകിയിരുന്നു.
120 അംഗ പാർലമെന്റിൽ ജസീന്തയുടെ ലിബറൽ ലേബർ പാർട്ടി 64 സീറ്റുകൾ ഉറപ്പാക്കി ഒറ്റയ്ക്ക് ഭൂരിപക്ഷം നേടിയിരുന്നു. ജസീന്തയുടെ പാർട്ടി 49 ശതമാനം വോട്ടുകൾ നേടിയപ്പോൾ കൺസർവേറ്റിവ് നാഷണൽ പാർട്ടിക്ക് 27 ശതമാനം വോട്ടു മാത്രമാണ് ലഭിച്ചത്.
ലോകത്തെ ഏറ്റവും പ്രായം കുറഞ്ഞ പ്രധാനമന്ത്രി
2017ലാണ് ജസിന്ത ന്യൂസിലാന്ഡ് പ്രധാനമന്ത്രിയാവുന്നത്. സ്ഥാനമേറ്റടുക്കുമ്പോള് 37 വയസ്സായിരുന്ന ജസിന്ത ആര്ഡേണ് അന്ന് ലോകത്തെ ഏറ്റവും പ്രായം കുറഞ്ഞ പ്രധാനമന്ത്രിയായിരുന്നു. കോവിഡ് മഹാമാരിക്കാലത്തും ക്രൈസ്റ്റ് ചര്ച്ചിലെ രണ്ടു പള്ളികളില് ഭീകരാക്രമണം നടന്നപ്പോഴും വൈറ്റ് ഐലന്ഡ് അഗ്നിപര്വ്വത സ്ഫോടനമുണ്ടായപ്പോഴുമുള്ള ജസിന്തയുടെ ഇടപെടലുകള് ശ്രദ്ധപിടിച്ചുപറ്റിയിരുന്നു. വർണ്ണ വംശ വെറികൾ ഇല്ലാതെ വർഗ്ഗീയതയെ പുറത്ത് നിർത്തിയായിരുന്നു നിലപാടുകൾ.
അനുകമ്പ പ്രകടപ്പിച്ച ഒരാളായി വിലയിരുത്തപ്പെടുന്നതാണ് തനിക്ക് ഇഷ്ടമെന്ന് രാജ്യം നിങ്ങളെ എങ്ങനെ ഓര്മ്മിക്കണം എന്ന ചോദ്യത്തോട് പ്രതികരിക്കവെ അവര് പറഞ്ഞു.
