ബി.എ.എം.എസ്. വിദ്യാര്ഥിനി വിസ്മയ ആത്മഹത്യ ചെയ്യാനിടയായ കേസില് ഭര്ത്താവ് കിരണ്കുമാര് കുറ്റക്കാരന് എന്നു കണ്ടെത്തി. വിവാദമായ കേസിൽ കൊല്ലം ഒന്നാം അഡീഷണല് സെഷന്സ് കോടതിയാണ് കുറ്റം കണ്ടെത്തിയത്. ശിക്ഷ ചൊവ്വാഴ്ച പ്രഖ്യാപിക്കും. കുറ്റക്കാരനാണെന്ന് കണ്ടെത്തിയതോടെ കിരണിന്റെ ജാമ്യം കോടതി റദ്ദാക്കി.
ജാമ്യം റദ്ദാക്കിയ സാഹചര്യത്തില് കിരണ് കുമാറിനെ ജയിലേക്ക് മാറ്റും. വിധി പ്രസ്താവം കേള്ക്കുന്നതിനായി വിസ്മയയുടെ അച്ഛനും കോടതി മുറിയിലെത്തിയിരുന്നു.
അസിസ്റ്റന്റ് മോട്ടോര് വെഹിക്കിള് ഇന്സ്പെക്ടറായിരുന്നു കിരണ് കുമാര്. നാല് മാസത്തോളം നീണ്ട വിചാരണയ്ക്ക് ശേഷമാണ് വിധി. കിരണ് കുമാറും അച്ഛനും കോടതിയിലെത്തിയിരുന്നു.
ഭര്ത്താവ് കിരണ് കുമാര് ശാരീരികമായും മാനസികമായും പീഡിപ്പിച്ചതിനെ തുടര്ന്ന് 2021 ജൂണ് 21-ന് ഭര്ത്തൃഗൃഹത്തില് വിസ്മയ ആത്മഹത്യ ചെയ്തെന്നാണ് കേസ്. സ്ത്രീധനമായി നല്കിയ കാറില് വാഗ്ദാനം ചെയ്ത നിലവാരത്തിലല്ല, പറഞ്ഞുറപ്പിച്ച സ്വര്ണം നൽകിയില്ല എന്നിങ്ങനെയുള്ള പ്രശ്നങ്ങളിലായിരുന്നു പീഡനം
2020 മേയ് 30-നാണ് ബി.എ.എം.എസ്. വിദ്യാര്ഥിനിയായിരുന്ന വിസ്മയയെ മോട്ടോര്വാഹനവകുപ്പില് എ.എം.വി.ഐ. ആയിരുന്ന കിരണ്കുമാര് വിവാഹം കഴിച്ചത്. സ്ത്രീധനപീഡനം, ആത്മഹത്യാപ്രേരണ, പരിക്കേല്പ്പിക്കല്, ഭീഷണിപ്പെടുത്തല്, സ്ത്രീധനം ആവശ്യപ്പെടല് എന്നീ കുറ്റകൃത്യങ്ങൾ ശരിയാണെന്ന് കോടതി കണ്ടെത്തി.
പ്രോസിക്യൂഷന്റെ ഭാഗത്തുനിന്ന് 41 സാക്ഷികളെ വിസ്തരിക്കുകയും 118 രേഖകള് തെളിവില് അക്കമിടുകയും 12 തൊണ്ടിമുതലുകള് നല്കുകയും ചെയ്തു. പ്രതിയുടെ പിതാവ് സദാശിവന് പിള്ള, സഹോദരപുത്രന് അനില്കുമാര്, ഭാര്യ ബിന്ദുകുമാരി, പ്രതിയുടെ സഹോദരി കീര്ത്തി, ഭര്ത്താവ് മുകേഷ് എം.നായര് എന്നീ അഞ്ച് സാക്ഷികള് വിസ്താരത്തിനിടെ കൂറുമാറിയിരുന്നു.
കിരണ്കുമാറിന്റെ ഫോണ് സൈബര് പരിശോധനയ്ക്കയച്ചതില് റെക്കോഡ് ചെയ്തിരുന്ന സംഭാഷണങ്ങള് കണ്ടെത്തിയിരുന്നു. സ്ത്രീധനം സംബന്ധമായി നടത്തിയതുള്പ്പെടെ വിസ്മയയുമായുള്ള സംഭാഷണങ്ങള് കോടതിയില് തെളിവായി ഹാജരാക്കി.
