രാഷ്ട്രീയപാര്ട്ടികളുടെ ആഭ്യന്തര കാര്യങ്ങളില് അന്വേഷണം നടത്താന് ലോകായുക്തയ്ക്ക് അധികാരമില്ലെന്ന് ഹൈക്കോടതി. തിരഞ്ഞെടുപ്പിലേക്കുള്ള സ്ഥാനാര്ഥികളെ തീരുമാനിക്കുന്നത് രാഷ്ട്രീയപാര്ട്ടികളുടെ ആഭ്യന്തര വിഷയമാണ്. ഇതില് അന്വേഷണം നടത്താന് ലോകായുക്തയ്ക്ക് അധികാരമില്ലെന്ന് ചീഫ് ജസ്റ്റിസ് അധ്യക്ഷനായ ബെഞ്ച് ചൂണ്ടികാട്ടി.
വിധി സി പി ഐ പേമെൻ്റ് സീറ്റ് കേസിൽ
2014-ലെ ലോക്സഭാ തിരഞ്ഞെടുപ്പില് തിരുവനന്തപുരം മണ്ഡലത്തില് സി.പി.ഐ. ഡോ. ജെ. ബെനറ്റ് എബ്രഹാമിന് സീറ്റ് നല്കിയതുമായി ബന്ധപ്പെട്ട് പേയ്മെന്റ് സീറ്റ് ആരോപണം ഉയര്ന്നിരുന്നു. ഈ വിഷയത്തില് ഒരു സ്വകാര്യവ്യക്തി പരാതിയുമായി ലോകായുക്തയെ സമീപിക്കുകയായിരുന്നു. ലോകായുക്ത അന്വേഷണത്തിന് ഉത്തരവിടുകയും അധികാര ദുര്വിനിയോഗവും അഴിമതിയും നടന്നിട്ടുണ്ടെന്ന് കണ്ടെത്തുകയും ചെയ്തിരുന്നു.
ഇതേത്തുടര്ന്ന് സി.പി.ഐയുടെ അന്നത്തെ സംസ്ഥാന സെക്രട്ടറി പന്ന്യന് രവീന്ദ്രന് പുനഃപരിശോധനാ ഹര്ജി നല്കി. എന്നാല് അത് ലോകായുക്ത അംഗീകരിച്ചില്ല. ഇതിന് പിന്നാലെ പന്ന്യന് രവീന്ദ്രന് ഹൈക്കോടതിയെ സമീപിക്കുകയായിരുന്നു.
