അങ്കണവാടിയിൽ സ്വാതന്ത്ര്യ ദിനത്തിൽ കൊടി ഉയർത്താൻ എത്തിയ രക്ഷിതാക്കൾ മക്കളുടെ കുടിവെള്ളത്തില് കണ്ടത് പുഴുവും ചത്ത എലിയും. തൃശൂര് ചേലക്കര പാഞ്ഞാള് തൊഴുപ്പാടം അങ്കണവാടിയിലെ വാട്ടര് ടാങ്ക് പരിശോധിച്ചപ്പോഴാണ് ഞെട്ടിക്കുന്ന കാഴ്ചകള് കണ്ടത്. വെള്ളത്തിൻ്റെ നിറമാറ്റം കണ്ടാണ് വാട്ടർ ടാങ്ക് പരിശോധിച്ചത്. വാട്ടര്ടാങ്ക് മാസങ്ങളായി വൃത്തിയാക്കിയിട്ടില്ല. ഈ ടാങ്കില് നിന്നും കുട്ടികള് സ്ഥിരമായി വെള്ളമെടുക്കാറുണ്ട്.
വാട്ടര് പ്യൂരിഫയറിലെ വെള്ളം അഴുക്ക് അടിഞ്ഞ് ഇരുണ്ടനിറത്തിലായിരുന്നു. വെള്ളം കുടിച്ച് കുട്ടികള്ക്ക് അസ്വസ്ഥതയുണ്ടായെന്നും രക്ഷിതാക്കള് പരാതിപ്പെട്ടു.
പതാക ഉയര്ത്തലിനെത്തിയ രക്ഷിതാക്കളില് ചിലര്ക്ക് വാട്ടര് ടാങ്ക് കണ്ട് പന്തികേട് തോന്നിയപ്പോഴാണ് മുകളിലേക്ക് കയറി വാട്ടര്ടാങ്ക് പരിശോധിച്ചത്. ചത്ത പല്ലിയുടേയും എലിയുടേയും അവശിഷ്ടമുള്ള വെള്ളത്തില് പുഴു നുരയ്ക്കുന്നത് കണ്ടെത്തി.
കുട്ടികള്ക്ക് നിരന്തരം അസുഖങ്ങളുണ്ടാകുന്നതിന് കാരണം ഈ വെള്ളമാണെന്നും രക്ഷിതാക്കള് പറഞ്ഞു. സംഭവം അറിഞ്ഞ് സ്ഥലത്തെത്തിയ ആരോഗ്യവകുപ്പുദ്യോഗസ്ഥര് നടത്തിയ പരിശോധനയില് ഗുരുതര വീഴ്ച കണ്ടെത്തി. ശക്തമായ നടപടിയുണ്ടാകുമെന്ന് ഹെല്ത്ത് ഇന്സ്പെക്ടര് ബിനോയ് തോമസ് അറിയിച്ചു. രക്ഷിതാക്കളുടെ പരാതിയെത്തുടര്ന്ന് പഴയന്നൂര് പൊലീസും സ്ഥലത്തെത്തി
