കായംകുളം കറ്റാനത്ത് യുവതിയെ മന്ത്രവാദത്തിന് ഇരയാക്കി ശാരീരിക പീഡനം. ഐ.ടി. ജീവനക്കാരിയായ 25 വയസ്സുകാരിയെയാണ് മന്ത്രവാദം നടത്തി ഭര്ത്താവും ബന്ധുക്കളും ചേര്ന്ന് മര്ദിച്ചത്. യുവതിയുടെ ഭര്ത്താവ് അനീഷ്, ബന്ധുക്കളായ ഷിബു, ഷാഹിന, മന്ത്രവാദം നടത്തുന്ന കുളത്തൂപ്പുഴ സ്വദേശി സുലൈമാന്, ഇയാളുടെ സഹായികളായ അന്വര് ഹുസൈന്, ഇമാമുദ്ദീന് എന്നിവരെ നൂറനാട് പോലീസ് അറസ്റ്റ് ചെയ്തു.
ഭരണിക്കാവ് സ്വദേശിയായ അനീഷുമായി യുവതിയുടെ രണ്ടാംവിവാഹമായിരുന്നു. കഴിഞ്ഞമൂന്നുമാസമായി ഭര്ത്താവും ഇയാളുടെ ബന്ധുക്കളും മന്ത്രവാദം തുടങ്ങിയിട്ട്. കഴിഞ്ഞദിവസമാണ് സഹികെട്ട യുവതി ഇക്കാര്യം പോലീസില് അറിയിച്ചത്.
ഭര്ത്താവ് കടുത്ത അന്ധവിശ്വാസത്തിന് അടിമയാണ്. വിവാഹത്തിന് ശേഷം ദിവസവും ഭാര്യയുടെ അടുത്തെത്തി ചെവിയില് മന്ത്രങ്ങള് ചൊല്ലും. ഇതിനെ എതിര്ത്തതോടെ ഭാര്യയുടെ പേരിൽ സംശയമായി. ശരീരത്തില് ജിന്ന് ബാധിച്ചതാണ് അന്ധവിശ്വാസം സ്വീകരിക്കാൻ വിസമ്മതിക്കുന്നത് എന്നായുന്നു ഭർത്താവിൻ്റെ കണ്ടെത്തൽ. ഈ അവസരം മന്ത്രവാദി തട്ടിപ്പു സംഘം മുതലാക്കി. കുളത്തൂപ്പുഴ സ്വദേശിയായ സുലൈമാനെ ദുര്മന്ത്രവാദത്തിനായി വീട്ടിലെത്തിക്കയായിരുന്നു.
ജിന്നിനെ ഒഴിപ്പിക്കാനായി അടച്ചിട്ട മുറിയിലാണ് മന്ത്രം നടത്തിയത്. ഇതിന് വഴങ്ങാതിരുന്നതോടെ കയര് കൊണ്ടും മറ്റും ക്രൂരമായി മര്ദിച്ചു. പിന്നീട് വാള് ഉപയോഗിച്ചും കത്തി ഉപയോഗിച്ചും ശരീരത്തില് മുറിവേല്പ്പിച്ചു രക്തം വാർത്തി. ഏകദേശം മൂന്നുമാസത്തോളം ദുര്മന്ത്രവാദത്തിന്റെ പേരില് മര്ദനം തുടര്ന്നതായും പരാതിയില് പറയുന്നുണ്ട്.
