ഫൈവ് ജി നെറ്റ് വർക്ക് സേവനങ്ങൾ ഒരുങ്ങവെ എന്തൊക്കെയാവും മാറ്റങ്ങൾ വരാനിരിക്കുന്നത്. എല്ലാം സിം കാർഡിൽ ഒതുങ്ങുമ്പോൾ ഫോണിനകത്തെ കണക്ടിവിറ്റി സൌകര്യങ്ങൾ അപ്രവചനീയം ആയിരിക്കും.
സനിമ, മൂവി പ്ലാറ്റ് ഫോമുകളും ഗെയിമിങ്ങും മറ്റു ഡാറ്റാ സേവനങ്ങളും എല്ലാം പൂർണ്ണമായും വയർലെസ് ആയിതീരുന്ന സാഹചര്യമാവുമോ. എങ്കിൽ പഴയ എസ് ടി ഡി ബൂത്തുകളും ഫോൺ കിയോസ്കുകളും ഇല്ലാതായത് പോലെ കണ്ടുകൊണ്ടിരിക്കെ പലതും ഇല്ലാതാവും. പുതിയ മത്സര മേഖലകൾ വരും.
അണ്‍ലിമിറ്റഡ് ഡാറ്റ, ഒടിടി സേവനങ്ങള്‍, ഗെയിമിംഗ് എന്നിവ ഒന്നിച്ച് നല്‍കുന്ന ബണ്ടില്‍ പ്ലാനുകള്‍ ആവിഷ്‌കരിക്കാനുള്ള ശ്രമത്തിലാണ് കമ്പനികള്‍. ഉപഭോക്താവിനെ വലവീശാൻ ആദ്യം സൌജന്യങ്ങളുടെ മഴയാവും. സൌകര്യം ഒരിക്കൽ ഉപയോഗിച്ചാൽ അതിൽ നിന്നും വിട്ടു പോരിക എളുപ്പമാവില്ല.
തങ്ങളുടെ സി സീരീസ് മോഡലുകള്‍ക്ക് വേണ്ടി ഭാരതി എയര്‍ടെല്ലുമായി കമ്പനി സഹകരിച്ച് പ്രവര്‍ത്തിക്കുകയാണെന്ന് റിയല്‍മി ഇന്ത്യ മേധാവി മാധവ് ഷേത്ത് അടുത്തിടെ പറഞ്ഞിരുന്നു. കാഷ്ബാക്ക്, ആഡ്-ഓണ്‍ ഓഫറുകള്‍ എന്നിവ ഉള്‍പ്പെടുന്നതാണ് ബണ്ടില്‍ ഓഫറിലുണ്ടാവുക.
ഷാവോമി, ഓപ്പോ, വിവോ, സാംസങ് പോലുള്ള കമ്പനികള്‍ വിവിധ ടെലികോം സേവന ദാതാക്കളുമായി ചര്‍ച്ചകള്‍ തുടങ്ങി കഴിഞ്ഞിട്ടുണ്ട്.
റിലയന്‍സ് ജിയോ ഗൂഗിളുമായി സഹകരിച്ച് വില കുറഞ്ഞ 5ജി ജിയോഫോണുകള്‍ അവതരിപ്പിക്കുമെന്ന് കമ്പനി ചെയര്‍മാന്‍ മുകേഷ് അംബാനി അടുത്തിടെ കഴിഞ്ഞ വാര്‍ഷിക പൊതുയോഗത്തില്‍ പ്രഖ്യാപിച്ചിരുന്നു. 5ജി സേവനങ്ങള്‍ എത്തിക്കുന്നതുമായി ബന്ധപ്പെട്ട് വിവിധ ബ്രാന്‍ഡുകളുമായി ചര്‍ച്ചയിലാണെന്നും അദ്ദേഹം പറഞ്ഞു.
ഫോൺ തന്നെയും ഒരു ഇൻ്റർനെറ്റ് മോഡം പോലെ ആയിതീരന്ന അവസ്ഥയാവും. 2ജി, 3ജി, 5ജി എന്നിവയില്‍ നിന്ന് വ്യത്യസ്തമായി 5ജി ഓഫറുകള്‍ കൂടുതലും ബണ്ടിലുകളായാവും നല്‍കുകയെന്നാണ് വിദഗ്ദര്‍ പറയുന്നത്. ഒടിടി, ഗെയിമിങ് പോലുള്ളവ മാത്രമാവില്ല. ബിസിനസ് കണക്ഷനുകളെടുക്കുന്നവര്‍ക്ക് മൈക്രോസോഫ്റ്റ് ഓഫീസ് സബ്‌സ്‌ക്രിപ്ഷന്‍ പോലുള്ള ആഡ് ഓണ്‍ ഓഫറുകളും അതിലുണ്ടാവും.
പ്രീമിയം നിരക്കുകളിലായിരിക്കും 5ജി താരിഫുകള്‍ ഉണ്ടാവുക. അണ്‍ലിമിറ്റഡ് ഡാറ്റ, ഓടിടി സേവനങ്ങള്‍, ഗെയിമിങ് എല്ലാം അടങ്ങുന്ന പ്ലാനുകള്‍ക്ക് വലിയ തുക നല്‍കേണ്ടി വരും. ഇത് സ്വാഭാവികമായും നെറ്റിസൺമാരിൽ പുതിയ വർഗ്ഗത്തെ സൃഷ്ടിക്കും.
ഫോണിന്റെ വില കുറയ്ക്കാനുമുള്ള ശ്രമങ്ങള്‍ നടക്കുന്നുണ്ട്. നേരത്തെ സൂചിപ്പിച്ച ജിയോ, ഗൂഗിള്‍ സഹകരണം അതിനൊരു ഉദാഹരണമാണ്.
നിലവില്‍ 5ജി ഫോണുകള്‍ക്ക് കുറഞ്ഞത് 13000 രൂപ വിലയുണ്ട്. ഈ വര്‍ഷം തന്നെ അത് 11000 ലേക്കും അടുത്ത വര്‍ഷത്തോടെ 10000 ലേക്കും കുറയ്ക്കാനുള്ള ശ്രമങ്ങളാണ് കമ്പനികള്‍ നടത്തിവരുന്നത്.
നിലവില്‍ ഫീച്ചര്‍ ഫോണുകളില്‍ നിന്ന് സ്മാര്‍ട്‌ഫോണുകളിലേക്കുള്ള മാറ്റം മന്ദഗതിയിലായിരുന്നു. ഈ സാഹചര്യത്തില്‍ 5ജി ഫോണുകളിലേക്കുള്ള മാറ്റം എത്രത്തോളം വേഗത്തിലാവും എന്ന് കണ്ടറിയേണ്ടി വരും. എന്നാൽ കേരളത്തിൽ ഇതിനുള്ള സാധ്യത കൂടുതലാണ്.
