എൽ.പി. സ്കൂൾ അധ്യാപക റാങ്ക് പട്ടിക ജൂൺ ഒന്നിന് പ്രസിദ്ധീകരിക്കാൻ പി.എസ്.സി. യോഗം നിർദേശം നൽകി. റിപ്പോർട്ടുചെയ്ത ഒഴിവിലേക്ക് ഈ മാസം അവസാനം തന്നെ നിയമനശുപാർശ അയക്കും.
2019 ഡിസംബറിൽ വന്ന വിജ്ഞാപനത്തിന്റെ റാങ്ക്പട്ടികയാണ് ഇപ്പോൾ തയ്യാറാക്കുന്നത്. എൽ.പി. റാങ്ക്പട്ടികയ്ക്ക് പിന്നാലെ യു.പി. അധ്യാപകരുടേതും പ്രസിദ്ധീകരിക്കും. ചില ജില്ലകളിലെ യു.പി. അധ്യാപക അഭിമുഖം പൂർത്തിയായിട്ടില്ല എന്നതാണ് വൈകാൻ കാരണം.
കോവിഡിനുമുമ്പാണ് അധ്യാപക നിയമനം നടന്നത്. ഒരുവർഷത്തിലേറെയായി പട്ടിക നിലവിലില്ല. സ്കൂളുകൾ തുറക്കുന്നത് പരിഗണിച്ച് ഒഴിവുകളിൽ അധികൃതർ താത്കാലികനിയമനം നടത്തുകയാണ്. സ്ഥിരം ഒഴിവുകൾ വേഗം നികത്തണമെന്ന് വിദ്യാഭ്യാസവകുപ്പും ആവശ്യപ്പെട്ടിരുന്നു.
പ്രകൃതിചികിത്സ മെഡിക്കൽ ഓഫീസർ, ഒക്കുപ്പേഷണൽ തെറാപ്പിസ്റ്റ് തുടങ്ങി 43 തസ്തികകളിലേക്കുള്ള പുതിയ വിജ്ഞാപനം അംഗീകരിച്ചു.
ജൂൺ 15-ന്റെ ഗസറ്റിൽ പ്രസിദ്ധീകരിക്കും. അതിനുശേഷം ഓൺലൈനിലൂടെ ജൂലായ് 20 വരെ അപേക്ഷിക്കാം.
മോട്ടോർ മെക്കാനിക്, ഇൻവെസ്റ്റിഗേറ്റർ, കംപ്യൂട്ടർ അസിസ്റ്റന്റ്, ജൂനിയർ അസിസ്റ്റന്റ്, ഡ്രൈവർ കം ഓഫീസ് അറ്റൻഡന്റ്, ചീഫ് സ്റ്റോർ കീപ്പർ തുടങ്ങിയവയാണ് മറ്റു തസ്തികകൾ.
