സംവിധായകയും ഗായികയുമായ ഐശ്വര്യ രജനികാന്തിൻ്റെ വീട്ടിൽ മോഷണം. ലക്ഷങ്ങൾ വിലമതിക്കുന്ന നിരവധി സ്വർണാഭരണങ്ങളും രത്നങ്ങളും വീട്ടിൽ നിന്നും കാണാതായതായി ഇവർതെയ്നാമ്പേട്ട് പൊലീസ് സ്റ്റേഷനിൽ ഇത് സംബന്ധിച്ച പരാതി നൽകി.
പ്രതികളെന്ന് സംശയിക്കുന്നവരുടെ പേര് വിവരങ്ങൾ ഐശ്വര്യ പൊലീസിന് കൈമാറി. രണ്ടു പേർ വീട്ടിൽ ജോലി ചെയ്തിരുന്നവരാണ്.
ഡയമണ്ട് സെറ്റുകൾ, അൺകട്ട് ഡയമണ്ട്, ടെംപിൾ ജ്വല്ലറി കളക്ഷൻ, ആന്റിക് ഗോൾഡ് പീസുകൾ, നവരത്നം സെറ്റ്, അറം നെക്ക്ലേസ്, 60 പവന്റെ വളകൾ എന്നിവയാണ് ഐശ്വര്യയുടെ വീട്ടിൽ നിന്ന് കാണാതായിട്ടുള്ളത്. എഫ്ഐആറിൽ 3.6 ലക്ഷം രൂപയുടെ മോഷണമാണ് രേഖപ്പെടുത്തിയിരിക്കുന്നത്.
2019 ൽ സഹോദരി സൗന്ദര്യയുടെ വിവാഹത്തിൽ പങ്കെടുത്ത ശേഷം ഈ ആഭരണങ്ങളെല്ലാം വീട്ടിലെ ലോക്കറിൽ വച്ചതായിരുന്നു. സെന്റ് മേരീസ് റോഡിലെ അപ്പാർട്ട്മെന്റിലായിരുന്നു സ്വർണം. കഴിഞ്ഞ ഏപ്രിൽ ഒൻപതിന് ഈ ലോക്കർ രജനികാന്തിന്റെ പയസ് ഗാർഡൻ വീട്ടിലേക്ക് മാറ്റിയിരുന്നു. ലോക്കറിന്റെ താക്കോൽ സെന്റ് മേരീസ് അപ്പാർട്ട്മെന്റിലെ അലമാരയിൽ തന്നെയാണ് സൂക്ഷിച്ചിരുന്നത്. ഇക്കാര്യം വീട്ടിലെ സഹായികൾക്ക് മാത്രമേ അറിയാമായിരുന്നുള്ളു എന്നതാണ് സംശയങ്ങൾക്ക് ഇടയാക്കിയത്.
