ഊട്ടി സ്വദേശിയായ കാര്ത്തികി ഗോണ്സാല്വസ് സംവിധാനം ചെയ്ത് ഗുണീത് മോംഗ നിര്മിച്ച ‘ദ എലഫന്റ് വിസ്പറേഴ്സ്’ ഷോർട് ഫിലിം വിഭാഗത്തില് ഇന്ത്യയില്നിന്ന് ഓസ്കാര് നേടുന്ന ആദ്യചിത്രമാണ്. ദക്ഷിണേന്ത്യയില്നിന്നുള്ള സിനിമകളാണ് ഇത്തവണ ഓസ്കാറിൽ തിളങ്ങിയവ രണ്ടും.
ഇതിൽ എലിഫൻ്റ് വിസ്പറേഴ്സ് കേരളത്തോടു ചേര്ന്നുകിടക്കുന്ന മുതുമലൈ നാഷണല് പാര്ക്ക് പശ്ചാത്തലമായി വരുന്ന ചിത്രമാണ്. നാട്ടിൽ എങ്ങും കേൾക്കുന്ന ഒരു ആനക്കഥ. പറഞ്ഞു പറഞ്ഞ് സിനിമയായി ലോകത്തിൻ്റെ അംഗീകാരത്തിൻ്റെ നെറുകയിലെത്തി.
ബെല്ലിയും രഘുവും തമ്മിലുള്ള ശക്തമായ അമ്മ-മകന് ബന്ധത്തിലാണ് ഡോക്യുമെന്ററി ഊന്നുന്നത്. പരിക്കേറ്റ് ദുര്ബലനായ ഒരു കുട്ടിയാനയില്നിന്ന്, നിര്വ്യാജസ്നേഹവും പരിചരണവും പങ്കുവെക്കലും കൊണ്ട് രഘുവിനെ ആരോഗ്യവാനായ ഒരാനയാക്കി മാറ്റുന്ന ബെല്ലിയുടെ, പ്രകൃതിയുടെ കാരുണ്യസ്പര്ശമാണ് ഡോക്യുമെന്ററി പങ്കുവെക്കുന്നത്.
പ്ലോട്ട്
മുതുമല വന്യജീവി സങ്കേതത്തിന്റെ ഭാഗമായ തെപ്പക്കാട് ആന പരിശീലനകേന്ദ്രത്തിലെ പരിശീലകരായ ബൊമ്മന്, ബെല്ലി ദമ്പതിമാരുടേയും അവിടെ എത്തിപ്പെട്ട രഘു എന്ന കുട്ടിയാനയുടെയും ജീവിതമാണ് എലഫന്റ് വിസ്പറേഴ്സ്. 2017 ൽ ശരീരത്തിലാകെ പരിക്കേറ്റ് കാട്ടില് ഒറ്റപ്പെട്ടുപോയ 11 മാസം പ്രായമുള്ള ആനക്കുട്ടിയെ വനപാലകര് ആണ് കാട്ടുനായ്കര് വിഭാഗത്തില്പ്പെട്ട ആദിവാസി ദമ്പതിമാരുടെ അടുത്തെത്തിക്കുന്നത്. പിന്നീട് ബെല്ലിയും ബൊമ്മനും ചേര്ന്ന് കുട്ടിയാനയെ പരിശീലിപ്പിക്കുന്നു, വളര്ത്തുന്നു, ഒരു കുടുംബമായി ഒരുമിച്ച് ഒരു വീട്ടിൽ ജീവിക്കുന്നു. രഘു അവരെ വിട്ട് ആനവളർത്തു കേന്ദ്രത്തിലേക്ക് പോകുമ്പോൾ പകരം, രഘുവിന്റെ സ്ഥാനത്ത് അമ്മു എന്ന കുട്ടിയാന വരുന്നു.
ആനക്കുട്ടിയുടെ വളര്ച്ചയുടെയും അവനുചുറ്റിലുമുള്ള മനുഷ്യ-പ്രകൃതി ജീവിതത്തിന്റെയും വിവിധ ഘട്ടങ്ങള് വര്ഷങ്ങളെടുത്ത് ചിത്രീകരിച്ചാണ് സംവിധായിക കാര്ത്തികി ഗോണ്സാല്വസ് സിനിമ പൂർത്തിയാക്കിയത്. മൂന്നുമാസം മാത്രം പ്രായമുള്ളപ്പോഴാണ് രഘുവിനെ താന് കാണുന്നതെന്ന് കാര്ത്തികി ഗോണ്സാല്വസ് പറഞ്ഞിട്ടുണ്ട്. ഒന്നര വര്ഷത്തോളം അവനൊപ്പം ചെലവഴിച്ചതിനു ശേഷമാണ് ഡോക്യുമെന്ററി ആരംഭിച്ചത്. അത് പൂര്ത്തിയാക്കിയപ്പോഴേക്കും അഞ്ചുവര്ഷമെടുത്തു. ആനകള് മാത്രമല്ല, മുതുമല വന്യജീവി സങ്കേതത്തിലെ നിരവധി മൃഗങ്ങളും പ്രകൃതിയുമെല്ലാം ചേരുന്ന ആവാസവ്യവസ്ഥയുടെ ചിത്രീകരണംകൂടിയായി സിനിമ മാറിയിട്ടുണ്ട്.
