ദേശീയതലത്തിൽ കോൺഗ്രസുമായി സഖ്യംവേണമെന്ന് സി.പി.ഐ. പാർട്ടി കോൺഗ്രസിൽ കേരളാഘടകം ആവശ്യമുന്നയിച്ചു. ബിജെപി വിരുദ്ധ ബദൽ സഖ്യത്തിൻ്റെ കാര്യത്തിൽ വ്യക്തത വേണമെന്നും ആവശ്യപ്പെട്ടു. രാഷ്ട്രീയ റിപ്പോർട്ട് അവതരിപ്പിച്ചുള്ള ചർച്ചയിൽ കേരളത്തെ പ്രതിനിധീകരിച്ച് രാജാജി മാത്യു തോമസ് ആണ് ആവശ്യം ഉന്നയിച്ചത്.
ഈ നിലപാട് തിങ്കളാഴ്ച നടക്കുന്ന പൊതുചർച്ചയിലും സംവാദ വിഷയമാവും.
കോൺഗ്രസിനെ ഒഴിവാക്കി ബിജെപിക്കെതിരെ ദേശീയ ബദൽ സാധ്യമല്ല. ബിജെപിയെ താഴെയിറക്കണം. ഇതിന് രാജ്യത്തുടനീളം വേരോട്ടമുള്ള കോൺഗ്രസിനെ കൂടെ കൂട്ടിയാൽ മാത്രമേ സാധിക്കൂ.
കേരളത്തിൽ പ്രതിപക്ഷത്തും ഭരണപക്ഷത്തും ഇരിക്കുമ്പോൾ ദേശീയതലത്തിൽ ഇക്കാര്യത്തിൽ ഒരു സഖ്യം വേണം. തിരഞ്ഞെടുപ്പിന് ശേഷമുള്ള സഖ്യമല്ല വേണ്ടത്. അതിന് മുമ്പേതന്നെ സഖ്യം വേണം എന്നിങ്ങനെയാണ് കേരളാ ഘടകത്തെ പ്രതിനിധീകരിച്ച് സംസാരിച്ച രാജാജി മാത്യു തോമസ് ആവശ്യപ്പെട്ടത്.
