മുതിര്ന്ന കോണ്ഗ്രസ് നേതാവ് ഗുലാം നബി ആസാദ് കോണ്ഗ്രസില് നിന്ന് രാജിവെച്ചു. പാര്ട്ടിയുടെ പുനരുജ്ജീവനം ആവശ്യപ്പെട്ട് വിമത ശബ്ദം ഉയര്ത്തിയ ജി-23 നേതാക്കളില് പ്രമുഖനുമായിരുന്നു അദ്ദേഹം.
ഏറെ നാളായി കോണ്ഗ്രസ് നേതൃത്വവുമായി ഭിന്നതയിലായിരുന്നു.
പാര്ട്ടി പ്രവര്ത്തക സമിതി ചേരാനിരിക്കെയാണ് രാജിയെന്നതും പ്രധാനമാണ്. ഇതോടെ എല്ലാ പദവികളും അദ്ദേഹം ഒഴിഞ്ഞിരിക്കുകയാണ്.
വിമര്ശനങ്ങള് ഉന്നയിക്കുന്നവരെ പാര്ട്ടിയില് നിന്ന് ഒറ്റപ്പെടുത്തുന്നു, നേതൃത്വത്തിന്റെ ഗുരുതരമായ വീഴ്ച എന്നിവയടക്കമുള്ള വിമര്ശനങ്ങള് അദ്ദേഹം ഉന്നയിച്ചിരുന്നു. ജി 23 സഖ്യം കോണ്ഗ്രസിനെ സംബന്ധിച്ച് പ്രധാന തീരുമാനങ്ങളിലേക്കെത്തുകയാണെന്നാണ് സൂചനകള്.
ജമ്മു കശ്മീരില് പാര്ട്ടി പദവികളില് നിന്ന് കഴിഞ്ഞ ദിവസം രാജിവെച്ചിരുന്നു. ഇതിന് പിന്നാലെയാണ് കോണ്ഗ്രസ് അംഗത്വം രാജിവെച്ച് ഒഴിഞ്ഞത്.
ജമ്മു കശ്മീരിലെ കോണ്ഗ്രസ് പ്രചാരണ സമിതി അധ്യക്ഷസ്ഥാനം ചുമതലപ്പെടുത്തി മണിക്കൂറുകള്ക്കകം രാജിവെച്ചത് വാർത്തയായിരുന്നു
കോണ്ഗ്രസ് കേന്ദ്ര രാഷ്ട്രീയകാര്യ സമിതിയില് അംഗമായ ഗുലാം നബി ആസാദിനെ സംസ്ഥാന ഘടകത്തിൻ്റെ പ്രചാരണ സമിതി അധ്യക്ഷസ്ഥാനത്ത് നിയമിക്കയാണുണ്ടായത്. ഇത് തരംതാഴ്ത്തലായാണ് വ്യാഖ്യാനിക്കപ്പെട്ടത്.
