കോണ്ഗ്രസ് നേതാക്കന്മാരെയും പ്രവര്ത്തകരെയും കസ്റ്റഡിയിലെടുത്ത് ഡല്ഹി പൊലീസ്. ചെങ്കോട്ടയില് ആരംഭിക്കാനിരുന്ന ‘ജനാധിപത്യം സംരക്ഷിക്കുക’ എന്ന മാര്ച്ചില് പങ്കെടുക്കാന് എത്തിയവരെയാണ് പൊലീസ് കസ്റ്റഡിയിലെടുത്തത്.
ഇന്ന് രാത്രി ഏഴ് മണിക്ക് മാര്ച്ച് തുടങ്ങനിരിക്കെയാണ് നേതാക്കളെ കസ്റ്റഡിയിലെടുക്കുന്നത്. മുതിര്ന്ന കോണ്ഗ്രസ് നേതാവും ഉത്തരാഖണ്ഡ് മുന് മുഖ്യമന്ത്രിയുമായ ഹരീഷ് റാവത്തിനെയടക്കം പൊലീസ് കസ്റ്റഡിയിലെടുത്തു. പി ചിദംബരത്തെ ചെങ്കോട്ടയിലേക്ക് പോകുന്നതില് നിന്ന് തടഞ്ഞതായും റിപ്പോര്ട്ടുണ്ട്. ഡല്ഹിയിലെ ടൗണ് ഹാളില് സമാപിക്കുന്ന മാര്ച്ചില് എല്ലാ കോണ്ഗ്രസ് എംപിമാരും നേതാക്കളും പങ്കെടുക്കുമെന്ന് കോണ്ഗ്രസ് നേതാവ് ജയറാം രമേശ് നേരത്തെ പ്രഖ്യാപിച്ചിരുന്നു.
