സംസ്ഥാനത്ത് ഡെങ്കിപ്പനി കേസുകൾ വർധിക്കുന്നു. 269 പേർക്കാണ് ഈ മാസം തുടങ്ങിയതോടെ മാത്രം ഡെങ്കിപ്പനി സ്ഥിരീകരിച്ചത്. ഇവരിൽ രണ്ടു പേർ മരിച്ചു. കഴിഞ്ഞ മാസം 408 പേർക്ക് ഡെങ്കിപ്പനി ബാധിച്ചു. 3 പേർ മരിച്ചു.
ഈ വർഷം ഇതുവരെ 3717 ഡെങ്കിപ്പനി കേസുകൾ റിപ്പോർട്ട് ചെയ്തിട്ടുണ്ട്. മരണം 26 ആയി. ഡെങ്കിപ്പനിയ്ക്കെതിരെ 7 ജില്ലകളില് പ്രത്യേക ജാഗ്രതാ നിര്ദേശം നിലവിലുണ്ട്. തിരുവനന്തപുരം, കൊല്ലം, ആലപ്പുഴ, എറണാകുളം, പാലക്കാട്, കോഴിക്കോട്, മലപ്പുറം ജില്ലകള്ക്കാണ് പ്രത്യേക ജാഗ്രതാ നിര്ദേശം.
ജില്ലകളുടെ സ്ഥിതി വിലയിരുത്താന് ആരോഗ്യമന്ത്രിയുടെ നേതൃത്വത്തില് യോഗം ചേര്ന്നു. എറണാകുളം ജില്ലയുടെ സ്ഥിതി പ്രത്യേകം വിലയിരുത്തി. വീടിന്റെ അകത്തോ പുറത്തോ വെള്ളം കെട്ടി നില്ക്കാതിരിക്കാന് പ്രത്യേകം ശ്രദ്ധിക്കണമെന്ന് ആരോഗ്യവകുപ്പ് അറിയിച്ചു.
