ആലപ്പുഴ മെഡിക്കൽ കോളേജിൽ പ്രസവത്തിന് പിന്നാലെ അമ്മയും കുഞ്ഞും മരിച്ച സംഭവത്തില് സീനിയര് ഡോക്ടര് തങ്കു തോമസ് കോശിക്ക് രണ്ടാഴ്ച നിര്ബന്ധിത അവധി. സിസേറിയന് സമയത്ത് സ്വകാര്യ പ്രാക്ടീസ് നടത്തുകയായിരുന്ന തങ്കു കോശിക്കെതിരെ നടപടി സ്വീകരിക്കാതെ മൃതദേഹങ്ങള് ഏറ്റുവാങ്ങില്ലെന്ന ബന്ധുക്കളുടെ നിലപാടിനെ തുടര്ന്നാണ് സര്ക്കാരിന്റെ തീരുമാനം. സംഘർഷം തണുപ്പിക്കാനായിരുന്നു നടപടി. ചികിത്സാപിഴവ് മൂലമാണ് മരണം സംഭവിച്ചതെന്ന് ബന്ധുക്കൾ പറയുന്നു.
കൈനകരി കുട്ടമംഗലം കായിത്തറ ശ്യാംജിത്തിന്റെ ഭാര്യ അപര്ണ (21) ബുധനാഴ്ച പുലര്ച്ചെയാണ് മരിച്ചത്. പ്രസവ ശസ്ത്രക്രിയയെ തുടര്ന്ന് നവജാത ശിശു ചൊവ്വാഴ്ച വൈകീട്ട് മരിച്ചിരുന്നു. ഡോക്ടറുടെ അനാസ്ഥയാണ് മരണത്തിന് കാരണമെന്ന് ആരോപിച്ച് ബന്ധുക്കള് നേരത്തെ പോലീസില് പരാതി നല്കിയിരുന്നു. പ്രസവസമയത്ത് ഡോക്ടര് ഉണ്ടായിരുന്നില്ലെന്നും വിദ്യാര്ഥികളാണ് ഓപ്പറേഷന് നടത്തിയതെന്നും ബന്ധുക്കൾ ചൂണ്ടികാട്ടി.
രണ്ട് പേരുടെയും ഹൃദയമിടിപ്പ് 20 ഗതമാനത്തിൽ താഴെയായിരുന്നുവെന്നും ഇതാണ് മരണകാരണം എന്നുമായിരുന്നു ആശുപത്രി അധികൃതരുടെ വിശദീകരണം. എന്നാല്ചികിത്സാ പിഴവ് ചൂണ്ടികാട്ടി ബന്ധുക്കളും നാട്ടുകാരുടെ രംഗത്തെത്തി. ഇതോടെ മെഡിക്കല് കോളേജ് സംഘര്ഷഭരിതമായി.
