തയ്വാൻ പ്രതിരോധമന്ത്രാലയത്തിലെ ഉന്നതനെ മരിച്ച നിലയില് കണ്ടെത്തി. പ്രതിരോധ മന്ത്രാലയം ഗവേഷണ-വികസന വിഭാഗം ഉപമേധാവി ഔ യാങ് ലി ഹ്സിങ്ങ് ആണ് മരിച്ചത്. ശനിയാഴ്ച രാവിലെ ഹോട്ടല്മുറിയില് മരിച്ച നിലയില് കണ്ടെത്തുകയായിരുന്നു എന്ന് അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്തു.
മരണകാരണം വ്യക്തമല്ല. ചൈനയും അമേരിക്കയുമായുള്ള ബന്ധം തായ് വാൻ്റെ പേരിൽ വഷളായ സാഹചര്യത്തിലാണ് ദുരൂഹ മരണം.
സൈന്യത്തിന്റെ നിയന്ത്രണത്തില് പ്രവര്ത്തിക്കുന്ന നാഷണല് ചുങ് ഷാന് ഇന്സ്റ്റിറ്റ്യൂട്ട് ഓഫ് സയന്സ് ആന്ഡ് ടെക്നോളജി ഉപമേധാവിയാണ് ഹ്സിങ്. തെക്കന് പ്രവിശ്യയായ പിങ്ടങ്ങില് ബിസിനസ് ട്രിപ്പിന് എത്തിയതായിരുന്നു. മിസൈല് നിര്മാണ പ്രവര്ത്തനങ്ങള്ക്ക് മേല്നോട്ടം വഹിക്കാന് ഇക്കൊല്ലം ആദ്യമാണ് ഹ്സിങ് ചുമതലയേറ്റെടുത്തത്.
കഴിഞ്ഞ ദിവസം യു.എസ്. ജനപ്രതിനിധി സഭ സ്പീക്കര് നാന്സി പെലോസി തയ്വാന് സന്ദര്ശിച്ചിരുന്നു. ഇതിൻ്റെ പേരിൽ യുദ്ധാന്തരീക്ഷം സൃഷ്ടിക്കപ്പെട്ടു.
