നടിയെ പീഡിപ്പിച്ച കേസില് വിജയ് ബാബുവിന്റെ അറസ്റ്റ് താത്കാലികമായി തടഞ്ഞ് ഹൈക്കോടതി. വ്യാഴാഴ്ച മുന്കൂര് ജാമ്യഹര്ജി വീണ്ടും പരിഗണിക്കുന്നതുവരെയാണ് അറസ്റ്റ് തടഞ്ഞത്. വിമാനത്താവളത്തിലെ എമിഗ്രേഷന് വിഭാഗത്തെ ഇക്കാര്യം അറിയിക്കണമെന്നും കോടതി നിര്ദേശിച്ചിട്ടുണ്ട്.
പ്രോസിക്യൂഷന്റെ ധാരണകള്ക്കൊപ്പമല്ല കോടതിയെന്നും നിയമം നടപ്പാക്കാനാണ് കോടതിയെന്നും ജഡ്ജി പറഞ്ഞു. എന്തുകൊണ്ട് ഇത്രയുംനാള് വിജയ് ബാബുവിനെ അറസ്റ്റ് ചെയ്യാന് കഴിഞ്ഞില്ലെന്നും കോടതി ചോദിച്ചു. പ്രതി തിരിച്ചെത്തുന്നത് തടയുകയല്ല വേണ്ടതെന്നും അന്വേഷണ ഉദ്യോഗസ്ഥര് വിജയ്ബാബുവുമായി ഒത്തുകളിക്കുകയാണോ എന്നുപോലും സംശയിക്കുന്നതായും കോടതി പറഞ്ഞു. വിജയ് ബാബു ചിലര്ക്ക് താരമായിരിക്കാം. എന്നാല് കോടതിക്ക് ഒരു സാധാരണക്കാരന് മാത്രമാണെന്നും കോടതി വ്യക്തമാക്കി. തുടര്ന്നാണ് അറസ്റ്റ് തടയുന്നതായി ഉത്തരവിട്ടത്.
ചൊവ്വാഴ്ച വിജയ് ബാബുവിന്റെ മുന്കൂര് ജാമ്യഹര്ജി പരിഗണിച്ചപ്പോള് നാട്ടിലെത്തിയാല് ഉടന് അറസ്റ്റ് പാടില്ലെന്ന് ഹൈക്കോടതി നിര്ദേശിച്ചിരുന്നു. പ്രതി നാട്ടിലെത്തുകയാണ് പ്രധാനമെന്നും ഉടന് തിരിച്ചെത്തിയാല് അറസ്റ്റ് തടയുന്നത് പരിഗണിക്കാമെന്നും കോടതി പറഞ്ഞു. എന്നാല് ഇതിനെ പ്രോസിക്യൂഷന് ശക്തമായി എതിര്ത്തു. ഇതോടെയാണ് പ്രോസിക്യൂഷനെതിരേ കോടതിയുടെ പരാമര്ശങ്ങളുണ്ടായത്
വിജയ്ബാബു തിരിച്ചെത്തിയാല് അന്വേഷണ ഉദ്യോഗസ്ഥന് മുന്നില് ഹാജരാകണം. അന്വേഷണസംഘത്തിന് വിശദമായി ചോദ്യംചെയ്യാം. മൊഴി രേഖപ്പെടുത്താം. എന്നാല് വ്യാഴാഴ്ച ജാമ്യഹര്ജി വീണ്ടും പരിഗണിച്ചശേഷമേ അറസ്റ്റിലേക്ക് നീങ്ങാനാകൂ എന്നും കോടതി വ്യക്തമാക്കി.
ബുധനാഴ്ച ദുബായില് നിന്ന് കൊച്ചിയിലെത്തുന്ന വിമാനത്തിലെ യാത്രക്കാരുടെ പട്ടികയില് നടനും നിര്മാതാവുമായ വിജയ് ബാബുവിന്റെ പേരുണ്ട്. രാവിലെ 9.15-നെത്തുന്ന എമിറേറ്റ്സ് വിമാനത്തിലാണ് വിജയ് ബാബുവും യാത്രക്കാരനായുള്ളത്.
