ലോക്സഭയിലും രാജ്യസഭയിലും ഉപയോഗിക്കാന് അനുമതിയില്ലാത്ത അണ്പാര്ലമെന്ററി വാക്കുകളുടെയും പ്രയോഗങ്ങളുടെയും പട്ടിക പുറത്തിറക്കി. ലോക്സഭാ സെക്രട്ടേറിയേറ്റാണ് പട്ടിക തയ്യാറാക്കിയിരിക്കുന്നത്. ഇംഗ്ലീഷ്, ഹിന്ദി ഭാഷകളിലുള്ള വാക്കുകളാണ് പട്ടികയില് ഉള്പ്പെടുത്തിയിരിക്കുന്നത്.
അണ്പാര്ലമെന്ററി വാക്കുകളുടെ പട്ടികയില് ഉൾപ്പെടുത്തിയ വാക്കുകൾ സംബന്ധിച്ച് വിമര്ശനം ഉന്നയിച്ച് തൃണമൂല് കോണ്ഗ്രസ് എം.പി. മഹുവാ മോയിത്ര ഉള്പ്പെടെയുള്ളവര് രംഗത്തെത്തി.അടിസ്ഥാനപരമായി, ബി.ജെ.പി. എങ്ങനെയാണ് ഇന്ത്യയെ തകര്ക്കുന്നത് എന്ന് വിവരിക്കാന് പ്രതിപക്ഷം ഉപയോഗിക്കുന്ന എല്ലാ വാക്കുകളും സര്ക്കാര് വിലക്കിയിരിക്കുകയാണെന്ന് മഹുവ ട്വീറ്റില് വിമര്ശിച്ചു. ലോക്സഭയ്ക്കും രാജ്യസഭയ്ക്കും വേണ്ടിയുള്ള അണ്പാര്ലമെൻ്ററി വാക്കുകളുടെ പുതിയ പട്ടികയില് സംഘി എന്ന വാക്ക് ഉള്പ്പെടുത്തിയിട്ടില്ലെന്ന് പരിഹസിക്കയും ചെയ്തു
അണ്പാര്ലമെന്ററിയായി പട്ടികയിൽ ഉൾപ്പെടുത്തയി ഇംഗ്ലീഷ് പദങ്ങളില് മുഖ്യമായവ ഇവയൊക്കെയാണ്-
bloodshed (രക്തച്ചൊരിച്ചില്), betrayed (ഒറ്റിക്കൊടുക്കുക), abused (അപമാനിക്കപ്പെട്ട), cheated (വഞ്ചിക്കുക), corrupt (അഴിമതിക്കാരി/ അഴിമതിക്കാരന്), coward (ഭീരു), ക്രിമിനല്, crocodile tears ( മുതലക്കണ്ണീര്), donkey (കഴുത), disgrace (കളങ്കം), drama (നാടകം), mislead (തെറ്റിദ്ധരിപ്പിക്കുക), lie (നുണ), untrue (അസത്യം), covid spreader (കോവിഡ് പരത്തുന്നയാള്), incompetent (അയോഗ്യത).
ഹിന്ദിയിൽ നിന്നുള്ള വാക്കുകൾ
ഗദ്ദാര് (ചതിയന്), കാലാദിന് (കറുത്തദിനം), ദാദാഗിരി (വിരട്ടല്), നികമ്മ (പ്രയോജനമില്ലാത്തത്), ശകുനി, ഖലിസ്ഥാനി
ജൂലൈ 18-നാണ് പാര്ലമെന്റിന്റെ മണ്സൂണ് സെഷന് ആരംഭിക്കുന്നത്. ഇതിന് മുന്നോടിയായാണ് പുതിയ വാക്കുകള് കൂടി ഉള്പ്പെടുത്തി അണ്പാര്ലമെന്ററി വാക്കുകളുടെ പട്ടിക പുതുക്കിയിരിക്കുന്നത്. എല്ലാ കൊല്ലവും അണ്പാര്ലമെന്ററി വാക്കുകളുടെ പട്ടിക പുതുക്കുകയും സഭാംഗങ്ങള്ക്ക് നല്കുകയും ചെയ്യാറുണ്ട്. കഴിഞ്ഞ കൊല്ലം പുതുക്കിയ പട്ടികയാണ് ഇപ്പോള് അംഗങ്ങള്ക്ക് വിതരണം ചെയ്തിരിക്കുന്നത്.
