പീഡന പരാതിയില് അറസ്റ്റിലായ പി.സി.ജോര്ജിന് ജാമ്യം. കര്ശന ഉപാധികളോടെ തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി ( ജെഎഫ്എംസി )യാണ് ജാമ്യം അനുവദിച്ചത്. ജാമ്യം അനുവദിക്കരുതെന്ന് റിമാന്ഡ് റിപ്പോര്ട്ടില് പൊലീസ് ആവശ്യപ്പെട്ടിരുന്നു. മണിക്കൂറുകള് നീണ്ട വാദ പ്രതിവാദങ്ങള്ക്കൊടുവിലാണ് കര്ശന ഉപാധികളോടെ ജാമ്യം അനുവദിച്ചത്
കള്ളക്കേസ് – പി സി ജോർജ്
സോളാര് കേസ് പ്രതിയുടെ രഹസ്യമൊഴിയില് മ്യൂസിയം പൊലീസാണ് മുന് എംഎല്എയെ അറസ്റ്റ് ചെയ്തത്. തിരുവനന്തപുരം ഗസ്റ്റ് ഹൗസില് വച്ച് ലൈംഗിക താത്പര്യത്തോടെ കടന്നുപിടിച്ചെന്നും, അശ്ലീല സന്ദേശങ്ങള് അയച്ചെന്നും സോളാര് കേസ് പ്രതി ആരോപിച്ചു. അതേസമയം ഒരു വൃത്തികേടും കാട്ടിയിട്ടില്ലെന്ന് പി.സി.ജോര്ജ് പറഞ്ഞു. ഇത് കള്ളക്കേസാണെന്നും താന് നിരപരാധിയെന്ന് തെളിയിക്കുമെന്ന് അദ്ദേഹം പ്രതികരിച്ചു.
വനിതയുടെ പരാതി
കന്റോണ്മെന്റ് അസി. കമ്മീഷണറുടെ നേതൃത്വത്തിലാണ് അറസ്റ്റ്. സ്ത്രീത്വത്തെ അപമാനിച്ചതിന് 154, 54 (എ) വകുപ്പുകള് ചേര്ത്താണ് ജോര്ജിനെതിരെ കേസെടുത്തിരിക്കുന്നത്. ഈ വര്ഷം ഫെബ്രുവരി 10ന് തിരുവനന്തപുരം ഗസ്റ്റ് ഹൗസില് വച്ച് ലൈംഗിക താത്പര്യത്തോടെ തന്നെ കടന്നുപിടിച്ചെന്നും അശ്ലീല സന്ദേശങ്ങള് അയച്ചെന്നും സോളാര് കേസ് പ്രതി രഹസ്യമൊഴി നല്കിയിരുന്നു. ഇതിന്റെ അടിസ്ഥാനത്തിലാണ് പൊലീസ് നടപടി.
മുഖ്യമന്ത്രിക്കെതിരായ ഗൂഢാലോചന കേസില് പി.സി.ജോര്ജിനെ ചോദ്യം ചെയ്യാനായി വിളിച്ച് വരുത്തിയിരുന്നു. ഈ കേസില് ക്രൈംബ്രാഞ്ചിന്റെ മൊഴിയെടുക്കല് പൂര്ത്തിയായതിന് ശേഷമാണ് ജോര്ജിനെ അറസ്റ്റ് ചെയ്തത്. ചോദ്യം ചെയ്യല് പൂര്ത്തിയായതോടെ മ്യൂസിയം പൊലീസ് പി.സി.ജോര്ജിനെ കസ്റ്റഡിയില് എടുത്ത് അറസ്റ്റ് രേഖപ്പെടുത്തുകയായിരുന്നു.
മാധ്യമങ്ങളോടും കയർത്ത്…..
അറസ്റ്റിലായ പിസി ജോർജിനോട് പ്രതികരണം തേടിയ വനിതാ മാധ്യമ പ്രവർത്തകയെ അധിക്ഷേപിച്ചതും വാർത്തയായി. പരാതി ശരിയായോ തെറ്റാണോ എന്നതിനപ്പുറത്തേക്ക് പരാതിക്കാരിയുടെ പേര് പറഞ്ഞത് തെറ്റാണോ എന്ന ചോദ്യത്തോട് ‘എന്നാൽ നിങ്ങളുടെ പേര് പറയാം’ എന്നാണ് പി.സി ജോർജ് മറുപടി നൽകിയത്
