മഞ്ചേശ്വരം കോഴക്കേസില് ബിജെപി സംസ്ഥാന അധ്യക്ഷന് കെ.സുരേന്ദ്രനെതിരെ പോലീസ് ജാമ്യമില്ലാ വകുപ്പ് ചുമത്തി. പട്ടികജാതി-പട്ടിക വര്ഗം അതിക്രമം തടയല് വകുപ്പുകള് കൂടിയാണ് സുരേന്ദ്രനെതിരെ ചുമത്തിയത്.
കോഴക്കേസില് ക്രൈംബ്രാഞ്ച് സമര്പ്പിച്ച ഇടക്കാല റിപ്പോര്ട്ടിലാണ് ജാമ്യമില്ലാ വകുപ്പ് കൂടി ചേര്ത്തിട്ടുള്ളതായി വിവരം നൽകിയത്.
ദുര്ബലമായ വകുപ്പുകളാണ് ചുമത്തിയിട്ടുള്ളതെന്നും പട്ടികജാതി-പട്ടിക വര്ഗ വകുപ്പുകള് കൂടി ചേര്ക്കണമെന്നും നേരത്തെ സ്പെഷ്യല് പബ്ലക് പ്രോസിക്യൂട്ടര് അന്വേഷണ സംഘത്തോട് നിര്ദേശിച്ചിരുന്നു. ഇത് പരിഗണിച്ചാണ് വകുപ്പുകള് കൂട്ടിച്ചേര്ത്തിരിക്കുന്നത്.
മഞ്ചേശ്വരത്തെ ബിഎസ്പി സ്ഥാനാര്ഥിയായിരുന്ന സുന്ദരയ്ക്ക് സ്ഥാനാര്ഥിത്വം പിന്വലിക്കാന് രണ്ടരലക്ഷം രൂപയും സ്മാര്ട്ട്ഫോണും നല്കിയെന്നും ഭീഷണിപ്പെടുത്തിയെന്നുമാണ് കേസ്. കഴിഞ്ഞ വര്ഷം ജൂണിലാണ് കേസ് രജിസ്റ്റര് ചെയ്യുന്നത്.
തിങ്കളാഴ്ചയാണ് കേസിന്റെ ഇടക്കാല റിപ്പോര്ട്ട് ക്രൈംബ്രാഞ്ച് കോടതിയില് സമര്പ്പിച്ചത്. കേസില് സുരേന്ദ്രനും ബിജെപി നേതാക്കളും ഉള്പ്പടെ ആറ് പ്രതികളാണ് ഉള്ളത്. ഇതില് അഞ്ചു പേര്ക്കെതിരെയും ജാമ്യമില്ലാ വകുപ്പ് ചുമത്തും. കെ.സുരേന്ദ്രനാണ് കേസില് മുഖ്യപ്രതി.
