വേറിട്ട ശൈലിയുമായി നാല് പതിറ്റാണ്ടോളം നിറഞ്ഞു നിന്ന നടന് മാമുക്കോയ (76) അന്തരിച്ചു. മലയാളത്തിന്റെ കോഴിക്കോടൻ ശൈലിയുടെ നർമ്മവും നിഷ്കളങ്കതയും സിനിമയിൽ എടുത്ത നടനാണ് പൊതു ജനങ്ങൾക്ക് ഇടയിൽ നിൽക്കെ തന്നെ വിടവാങ്ങിയത്
ഫുട്ബോൾ മൈതാനിയിൽ
ഹൃദയാഘാതത്തോടൊപ്പം തലച്ചോറിലുണ്ടായ രക്തസ്രാവമാണ് മരണകാരണം. കാളികാവ് പൂങ്ങോടില് സെവന്സ് ഫുട്ബോള് ടൂര്ണമെന്റിന്റെ ഉദ്ഘാടനത്തിന് എത്തിയ മാമുക്കോയയെ ദേഹാസ്വാസ്ഥ്യത്തെ തുടര്ന്ന് വണ്ടൂരിലെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. തുടര്ന്ന് കോഴിക്കോട്ടെ ഒരു സ്വകാര്യ ആശുപത്രിയിലേക്ക് മാറ്റുകയായിരുന്നു. തിങ്കളാഴ്ച മുതല് തീവ്രപരിചരണ വിഭാഗത്തില് ചികിത്സയിലായിരുന്നു. ബുധനാഴ്ച ഉച്ചയ്ക്ക് ഒന്നേ അഞ്ചോടെയായിരുന്നു അന്ത്യം.
കുതിരവട്ടം പപ്പു അതിന് മുന്പ് അവതരിപ്പിച്ചതില് നിന്നും വ്യത്യസ്തമായി മുസ്ലിം സംഭാഷണശൈലിയാണ് മാമുക്കോയയുടെ സവിശേഷതയായിത്തീര്ന്നത്. വിദ്യാര്ഥിയായിരുന്ന കാലത്ത് തന്നെ നാടക പ്രവര്ത്തങ്ങളില് സജീവമായിരുന്നു.
മരക്കണക്കും നാടകവും
ചാലിക്കണ്ടിയില് മുഹമ്മദിന്റെയും ഇമ്പിച്ചി ആയിശയുടേയും മകനായി 1946-ല് കോഴിക്കോട് ജില്ലയിലെ പള്ളിക്കണ്ടിയിലാണ് ജനിക്കുന്നത്. ചെറുപ്പത്തിലേ മാതാപിതാക്കള് മരിച്ചതിനാല് ജ്യേഷ്ഠന്റെ സംരക്ഷണത്തിലാണ് വളര്ന്നത്. കോഴിക്കോട് എം. എം. ഹൈസ്കൂളില് പത്താംക്ലാസ് വരെയുള്ള പഠനം പൂര്ത്തിയാക്കിയത്. പഠനകാലത്തു തന്നെ സ്കൂളില് നാടകങ്ങള്ക്ക് നേതൃത്വം നല്കുകയുംഅഭിനയിക്കുകയും ചെയ്യുമായിരുന്നു.
സ്കൂള് വിദ്യാഭ്യാസത്തിന് ശേഷം കോഴിക്കോട് ജില്ലയിലെ കല്ലായിയില് മരം അളക്കലായിരുന്നു തൊഴില്. മരത്തിനു നമ്പറിടുക, ക്വാളിറ്റി നോക്കുക, അളക്കുക എന്നിവയെല്ലാത്തിലും വിദഗ്ധനായി. അതോടൊപ്പം നാടകവും ഒരുമിച്ചുകൊണ്ടുപോകാന് അദ്ദേഹം ശ്രദ്ധിച്ചു. മലബാര് ഭാഗത്തെ ഭാഗത്തെ നിരവധി നാടക- സിനിമാ പ്രവര്ത്തകരുമായി സൗഹൃദമുണ്ടായിരുന്നു. കെ.ടി. മുഹമ്മദ്, വാസു പ്രദീപ്, ബി. മുഹമ്മദ് (കവിമാഷ്), എ. കെ. പുതിയങ്ങാടി, കെ. ടി. കുഞ്ഞ്, ചെമ്മങ്ങാട് റഹ്മാന് തുടങ്ങിയവരുടെ നാടകങ്ങളില് ശ്രദ്ധേയമായ വേഷങ്ങള് ചെയ്തു.
സുഹൃത്തുക്കളെല്ലാവരും ചേര്ന്ന് ഒരു നാടകം സിനിമയാക്കിയതാണ് ചലച്ചിത്ര രംഗത്തേക്കുള്ള വഴി തുറന്നത്. നിലമ്പൂര് ബാലൻ സംവിധായകനായ ‘അന്യരുടെ ഭൂമി’ (1979) എന്ന ബ്ലാക്ക് ആന്ഡ് വൈറ്റ് ചിത്രത്തിലൂടെയായിരുന്നു അരങ്ങേറ്റം. 1982-ല് എസ്. കൊന്നനാട്ട് സംവിധാനം ചെയ്ത സുറുമയിട്ട കണ്ണുകള് എന്ന ചിത്രത്തില് വൈക്കം മുഹമ്മദ് ബഷീറിന്റെ ശുപാര്ശയില് ഒരു വേഷം ലഭിച്ചു. മമ്മൂട്ടിയെ നായകനാക്കി സാജന് സംവിധാനം ചെയ്ത സ്നേഹമുള്ള സിംഹമായിരുന്നു മൂന്നാമത്തെ ചിത്രം. സിനിമയില് തന്റേതായ ഇടം നേടിയെടുക്കുകയായിരുന്നു മാമുക്കോയ. പിന്നീട് സത്യന് അന്തിക്കാടിന്റെ ഗാന്ധിനഗര്, സെക്കന്റ് സ്ട്രീറ്റ്, സന്മനസ്സുള്ളവര്ക്ക് സമാധാനം തുടങ്ങിയ ചിത്രങ്ങളിലൂടെ തിരക്കേറിയ നടനായി മാറി. ദൂരെ ദൂരെ ഒരു കൂടു കൂട്ടാം എന്ന ചിത്രത്തിലെ അറബി മുന്ഷിയുടെ വേഷം വളരെയേറെ ശ്രദ്ധിക്കപ്പെട്ടു.
പെരുമഴക്കാലത്തിലെ അബ്ദു എന്ന കഥാപാത്രത്തിന് 2004 ല് കേരള സംസ്ഥാന ചലച്ചിത്ര പുരസ്കാരത്തില് പ്രത്യക ജൂറി പരാമര്ശം ലഭിച്ചു, ഇന്നത്തെ ചിന്താവിഷയത്തിലെ അഭിനയത്തിന് 2008 ല് മികച്ച ഹാസ്യനടനായി തിരഞ്ഞെടുക്കപ്പെട്ടു
സുഹ്റയാണ് മാമുക്കോയയുടെ ഭാര്യ. നിസാര്, ഷാഹിദ, നാദിയ, അബ്ദുള് റഷീദ് എന്നിവര് മക്കളാണ്.
ഭൗതികശരീരം വൈകിട്ട് 3ന് കോഴിക്കോട് ടൗൺഹാളിൽ പൊതുദർശനത്തിനു വയ്ക്കും. കബറടക്കം വ്യാഴാഴ്ച 10 ന് കണ്ണമ്പറമ്പ് പള്ളി ഖബറിസ്ഥാനിൽ
മറക്കാനാവാത്ത വേഷങ്ങൾ
നാടോടിക്കാറ്റിലെ തട്ടിപ്പുകാരന് ഗഫൂര്ക്ക, സന്ദേശത്തിലെ കെ. ജി. പൊതുവാള്, ചന്ദ്രലേഖയിലെ പലിശക്കാരന്, വെട്ടത്തിലെ ഹംസക്കോയ/ രാമന് കര്ത്താ, മഴവില്ക്കാവടിയിലെ കുഞ്ഞിഖാദര്, രാംജിറാവു സ്പീക്കിംഗിലെ ഹംസക്കോയ, വരവേല്പ്പിലെ ഹംസ, പ്രാദേശിക വാര്ത്തകളിലെ ജബ്ബാര്, കണ്കെട്ടിലെ ഗുണ്ട കീലേരി അച്ചു, ഡോക്ടര് പശുപതിയിലെ വേലായുധന് കുട്ടി, തലയണമന്ത്രത്തിലെ കുഞ്ഞനന്ദന് മേസ്തിരി, നരേന്ദ്രന് മകന് ജയകാന്തനിലെ സമ്പീശന്, കളിക്കളത്തിലെ പോലീസുകാരന്, ഹിസ് ഹൈനസ് അബ്ദുള്ളയില് ജമാല്, കൗതുക വാര്ത്തകളിലെ അഹമ്മദ് കുട്ടി, മേഘത്തിലെ കുറുപ്പ്, പട്ടാളത്തിലെ ഹംസ, മനസ്സിനക്കരയിലെ ബ്രോക്കര്, പെരുമഴക്കാലത്തിലെ അബ്ദു, ബ്യാരി എന്ന ചിത്രത്തിലെ കഥാപാത്രം, ഉസ്ദാത് ഹോട്ടലിലെ ഉമ്മര്, കെ.എല് 10 പത്തിലെ ഹംസകുട്ടി, ആട് 2 ലെ ഇരുമ്പ് അബ്ദുള്ള, മരയ്ക്കാര് അറബിക്കടലിലെ സിംഹത്തിലെ അബൂബക്കര് ഹാജി, കുരുതിയിലെ മൂസാ ഖാലിദ്, മിന്നല് മുരളിയിലെ ഡോക്ടര് നാരായണന് തുടങ്ങിയവയെല്ലാം ശ്രദ്ധേയകഥാപാത്രങ്ങളാണ്.
2001 ല് സുനില് സംവിധാനം ചെയ്ത കോരപ്പന് ദ ഗ്രേറ്റ്, ഇ.എം അഷ്റഫിന്റെ സംവിധാനത്തില് 2023 ല് പുറത്തിറങ്ങിയ ഉരു എന്നീ ചിത്രങ്ങളില് നായകനായി. മലയാളത്തിന് പുറമേ തമിഴ് ചിത്രങ്ങളിലും മാമുക്കോയ അഭിനയിച്ചിട്ടുണ്ട്. അരങ്ങേട്ര വേലൈ, കാസ്, കോബ്ര തുടങ്ങിയവയാണ് തമിഴ്ചിത്രങ്ങള്.
