കോണ്ഗ്രസ് എം.പി. രാഹുല് ഗാന്ധിക്കെതിരേ പഞ്ചാബ് മുഖ്യമന്ത്രി ഭഗവന്ത് മാന്.
രാഹുല് ഗാന്ധി എത്ര തവണ ഗുജറാത്ത് സന്ദര്ശിച്ചു. ഒരു തവണ. സംസ്ഥാനത്തെ ഒരു സന്ദര്ശനം കൊണ്ട് തിരഞ്ഞെടുപ്പ് വിജയിക്കണമെന്നാണ് അദ്ദേഹം ആഗ്രഹിക്കുന്നത്. സൂര്യന് അസ്തമിക്കുന്നിടത്താണ് (ഗുജറാത്ത്) തിരഞ്ഞെടുപ്പ് നടന്നത്. രാഹുല് ഗാന്ധി, അദ്ദേഹത്തിന്റെ പദയാത്ര (ഭാരത് ജോഡോ യാത്ര) ആരംഭിച്ചത് സൂര്യന് ആദ്യം ഉദിക്കുന്നിടത്ത് (കന്യാകുമാരി) നിന്നാണ്. അദ്ദേഹം ആദ്യം അദ്ദേഹത്തിന്റെ ടൈമിങ് ശരിയാക്കട്ടെ- ഭഗവന്ത് മാന് പറഞ്ഞു.
ഗുജറാത്ത് നിയമസഭാ തിരഞ്ഞെടുപ്പിലെ കോണ്ഗ്രസിൻ്റെ മോശം പ്രകടനത്തിനു പിന്നില് എ.എ.പി. വലിയ പങ്കുവഹിച്ചെന്ന രാഹുലിൻ്റെ പരാമര്ശമാണ് മുഖ്യമന്ത്രി ഭഗവന്ത് മാനെ പ്രകോപിപ്പിച്ചത്.
എം.എല്.എമാര് എതിര്പാര്ട്ടികളിലേക്ക് കൂറുമാറുന്ന നിസ്സഹായത നേരിടുന്ന കോൺഗ്രസ് അവസ്ഥയെ അദ്ദേഹം കളിയാക്കി. എതിര്പാര്ട്ടിക്കാര്ക്ക് സര്ക്കാര് രൂപവത്കരണത്തിന് ആവശ്യത്തിന് അംഗങ്ങള് ഇല്ലാത്ത സംസ്ഥാനങ്ങളില് സ്വന്തം എം.എല്.എമാരെ വില്ക്കുകയാണ് കോണ്ഗ്രസ്. ഇത് തുടരുന്നിടത്തോളം പാർട്ടി ദരിദ്രമായിക്കൊണ്ടിരിക്കും. കോണ്ഗ്രസ് കോമയിലാണ്. മഹാരാഷ്ട്രയിലും മധ്യപ്രദേശിലും കോണ്ഗ്രസാണ് സര്ക്കാര് രൂപവത്കരിച്ചത്. എന്നാല് ബി.ജെ.പിയാണ് നിലവില് ഈ രണ്ടു സംസ്ഥാനങ്ങളും ഭരിക്കുന്നത്, മാന് ഓർമ്മപ്പെടുത്തി.
