ലൈഫ് മിഷന് കോഴക്കേസില് എം. ശിവശങ്കറിന് ജാമ്യമില്ല. ഹൈക്കോടതി ജാമ്യാപേക്ഷ തള്ളി. കേസില് ഒന്പതാം പ്രതിയാണ് ശിവശങ്കര്. അറസ്റ്റിലായതിന് പിന്നാലെ കീഴ്ക്കോടതിയില് ജാമ്യാപേക്ഷ സമര്പ്പിച്ചെങ്കിലും അത് തള്ളിയിരുന്നു. ഇതിന് പിന്നാലെയാണ് ശിവശങ്കര് ഹൈക്കോടതിയെ സമീപിച്ചത്.
തനിക്ക് ശാരീരികമായ ബുദ്ധിമുട്ടുകളുണ്ടെന്നും തനിക്കെതിരേ കൃത്യമായ തെളിവുകളില്ലെന്നും ശിവശങ്കര് ജാമ്യാപേക്ഷയില് പറഞ്ഞിരുന്നു. മറ്റൊരു കേസില് (സ്വര്ണക്കടത്ത്) ജാമ്യം ലഭിച്ചിട്ടുണ്ട്. അതിനാല്തന്നെ തനിക്ക് ജാമ്യത്തിന് അര്ഹതയുണ്ടെന്നും ശിവശങ്കര് ചൂണ്ടിക്കാട്ടിയിരുന്നു.
എന്നാല് എന്ഫോഴ്സ്മെന്റ് ഡയറക്ടറേറ്റ് (ഇ.ഡി.) ഈ വാദഗതികളെ എതിര്ത്തു. ശിവശങ്കറിന് ജാമ്യം നല്കരുതെന്നും ജാമ്യം അനുവദിച്ചാല് സാക്ഷികളെ സ്വാധീനിക്കാന് സാധ്യതയുണ്ടെന്നും ഇ.ഡി. പറഞ്ഞു. സ്വര്ണക്കടത്ത് കേസും ലൈഫ് മിഷന് കേസും തമ്മില് വലിയ വ്യത്യാസമുണ്ടെന്നും ഇ.ഡി. പറഞ്ഞു. ഇ.ഡിയുടെ വാദങ്ങള് അംഗീകരിച്ച കോടതി ശിവശങ്കറിന്റെ ജാമ്യാപേക്ഷ തള്ളുകയായിരുന്നു.
