മൂന്നാര് കുണ്ടള എസ്റ്റേറ്റിന് സമീപം വെള്ളിയാഴ്ച രാത്രിയുണ്ടായ ഉരുള്പൊട്ടലില് നിരവധി കുടുംബങ്ങൾ തലനാരിഴയ്ക്ക് രക്ഷപ്പെട്ടു. 141 കുടുംബങ്ങൾ താമസിക്കുന്ന മേഖലയിലേക്ക് പൊട്ടി കുതിച്ചെത്തിയ ഉരുൾ അരുവിയിലെ കരിങ്കൽ കെട്ടിൽ തങ്ങി നിന്നതാണ് രക്ഷയായത്.
ഉരുള്പൊട്ടി വന്ന് മൂന്നാര്-വട്ടവട പാതയിലേക്ക് തങ്ങി നില്ക്കുകയും താഴോട്ട് പതിക്കാതിരിക്കുകയും ചെയ്യുകായിരുന്നു. നിരവധി എസ്റ്റേറ്റുകളാണ് താഴെയുണ്ടായിരുന്നത്. രണ്ട് കടകളും ഒരു ക്ഷേത്രവും മണ്ണിനടിയിലായിട്ടുണ്ട്.
രാത്രി ഇതുവഴി വാഹനത്തില് വന്ന ആളുകൾ ഉരുള്പൊട്ടി റോഡിലേക്ക് പതിച്ചിരിക്കുന്നത് കണ്ട് കുടുംബങ്ങളെ പൂര്ണമായും അടുത്തുള്ള സ്കൂളുകളിലേക്കും മറ്റും മാറ്റി. സ്ഥലത്തെ രണ്ട് കടകളും ക്ഷേത്രവും പൂര്ണമായും മണ്ണിനടിയിലായിട്ടുണ്ടെന്നും ആളപായമില്ലെന്നും ദേവികുളം എം.എല്.എ എ രാജ പറഞ്ഞു.
വട്ടവട-മൂന്നാര് റോഡില് മണ്ണും കല്ലും വന്ന് നിറഞ്ഞതിനാല് റോഡ് പൂര്ണമായും ഇല്ലാതായിട്ടുണ്ട്. ഇതോടെ വട്ടവട പൂര്ണമായും ഒറ്റപ്പെട്ട നിലയിലാണ്. മണ്ണ് നീക്കാനുള്ള നടപടി ആരംഭിച്ചതായും റോഡിന്റെ അവസ്ഥ ഇതിന് ശേഷം മാത്രമേ പറയാന് കഴിയുകയുള്ളൂവെന്നും എം.എല്.എ അറിയിച്ചു.
പെട്ടിമുടി ദുരന്തത്തിന്റെ രണ്ടാം വാര്ഷികത്തിലാണ് ഒരു വലിയ ദുരന്തം ഒഴിവായത്. എല്ലാവരും നല്ല ഉറക്കസമയത്തായതിനാല് ഉരുള്പൊട്ടിയ കാര്യം ആരും അറിഞ്ഞിരുന്നില്ല. 2020 ഓഗസ്റ്റ് 6-ന് രാത്രിയിലായിരുന്നു മലമുകളില് നിന്നും ഇരച്ചെത്തിയ ഉരുള് പെട്ടിമുടിക്ക് മേല് പതിച്ചത്. നാല് ലയങ്ങളില് ഉറങ്ങിക്കിടന്ന കുഞ്ഞുങ്ങളും ഗര്ഭിണികളുമടക്കം 70 പേരുടെ ജീവന് നഷ്ടപ്പെട്ടു. 12 പേര് മാത്രമാണ് ദുരന്തത്തെ അതിജീവിച്ചത്.
