ആനക്കൊമ്പ് കേസില് കീഴ് കോടതിയിൽ ഹാജരാവുന്നതിൽ നിന്നും രക്ഷപ്പെടാൻ സർക്കാരിനെ കൂട്ടുപിടിച്ചുള്ള നടൻ മോഹന്ലാലിൻ്റെ നീക്കം ഹൈക്കോടതി തള്ളി.
മോഹന്ലാലിനെതിരേ കേസില് സമര്പ്പിച്ച കുറ്റപത്രത്തില് കേസ് നിലനില്ക്കില്ലെന്നും കേസ് എഴുതി തള്ളണമെന്നും ആവശ്യപ്പെട്ട് സര്ക്കാര് പെരുമ്പാവൂര് മജിസ്ട്രേറ്റ് കോടതിയില് അപേക്ഷ നല്കിയിരുന്നു. എന്നാല് കോടതി അതിന് തയ്യാറായില്ല.
മോഹന്ലാലിനോട് മജിസ്ട്രേറ്റ് കോടതി നേരിട്ട് ഹാജരാകാന് ആവശ്യപ്പെട്ടിരുന്നു. എന്നാൽ ഹാജരായില്ല. സർക്കാരും നടനെ പിന്തുണച്ചു.
കേസിന് എതിരായ സർക്കാർ നിലപാട് തള്ളിയ പെരുമ്പാവൂര് മജിസ്ട്രേറ്റ് കോടതിയുടെ ഉത്തരവിനെ ചോദ്യം ചെയ്താണ് മോഹന്ലാല് ഹൈക്കോടതിയില് ഹര്ജി നല്കിയത്.
സര്ക്കാറിന്റെ അപേക്ഷ തള്ളിയതില് മോഹന്ലാലിന് എങ്ങനെ ഹര്ജി നല്കാന് കഴിയുമെന്ന് ഹൈക്കോടതി ചോദിച്ചു. സര്ക്കാറാണ് ഹര്ജി നല്കേണ്ടതെന്നും മോഹന്ലാലിന് അതിനുള്ള അവകാശമില്ലെന്നും ജസ്റ്റിസ് മേരി ജോസഫ് പറഞ്ഞു.
മോഹന്ലാലിന്റെ നീക്കത്തില് ഹൈക്കോടതി സര്ക്കാറിനോട് വിശദീകരണം ആവശ്യപ്പെട്ടു. കീഴ്ക്കോടതിയില് ഹാജരാകുന്നതില് നിന്ന് താല്ക്കാലികമായി ഒഴിവാക്കി തരണമെന്ന മോഹന്ലാലിന്റെ ആവശ്യവും ഇതോടൊപ്പം നിരസിച്ചു.
