സര്വകലാശാലകളില് നടന്ന എല്ലാ ബന്ധു നിയമനങ്ങളെ കുറിച്ചും പരിശോധിച്ച് നടപടി എടുക്കാന് ഗവര്ണര് തയാറാകണമെന്ന് പ്രതിപക്ഷ നേതാവ് വി.ഡി സതീശന് ആവശ്യപ്പെട്ടു. സംസ്ഥാനത്തെ സര്വകലാശാലകളിലെ അധ്യാപക നിയമനങ്ങള് സി.പി.എമ്മുകാരുടെ ബന്ധുക്കള്ക്കായി സംവരണം ചെയ്തിരിക്കുകയാണ്. വിഷായധിഷ്ഠിതമായാണ് പ്രതിപക്ഷം സര്ക്കാരിനെയും ഗവര്ണറെയും വിമര്ശിക്കുന്നതെന്നും സതീശന് പറഞ്ഞു.
അനധികൃത നിയമനം മരവിപ്പിച്ച ചാന്സിലറുടെ നടപടിക്കെതിരെ കണ്ണൂര് സര്വകലാശാലയെക്കൊണ്ട് കേസ് കൊടുപ്പിക്കാനുള്ള സര്ക്കാരിന്റെ നീക്കം വിചിത്രവും നിയമവിരുദ്ധവുമാണ്. കണ്ണൂര് സര്വകലാശാല നിയമത്തിലെ ഏഴാം വകുപ്പ് അനുസരിച്ചാണ് ചാന്സിലര് കൂടിയായ ഗവര്ണര് നിയമനം റദ്ദാക്കിയത്. നിയമനം മരവിപ്പിക്കുക മാത്രമാണ് ഗവര്ണര് ഇപ്പോള് ചെയ്തിരിക്കുന്നത്. അല്ലാതെ നടപടി എടുത്തിട്ടില്ല. നോട്ടീസ് കൊടുത്ത് ഹിയറിങ് നടത്തി നടപടി എടുക്കാനിരിക്കെയാണ് ചാന്സിലര്ക്കെതിരെ കോടതിയെ സമീപിക്കുന്നത്.
19 കേസുള്ള ഫർസീനെതിരെ കാപ്പ എങ്കിൽ …
മുഖ്യമന്ത്രിക്കെതിരെ വിമാനത്തില് കരിങ്കൊടി കാട്ടിയതിന്റെ പേരില് യൂത്ത് കോണ്ഗ്രസ് നേതാവ് ഫര്സീന് മജീദിനെ കാപ്പ ചുമത്തി ജയിലില് അടയാക്കാനുള്ള തീരുമാനത്തെ ശക്തമായി പ്രതിരോധിക്കുമെന്ന് പ്രതിപക്ഷ നേതാവ് പറഞ്ഞു. ഫര്സീനെതിരെ 19 കേസുകളുണ്ടെന്നാണ് മുഖ്യമന്ത്രി നിയമസഭയില് പറഞ്ഞത്. എന്നാല് ഇതില് 12 കേസുകളും കോവിഡ് കാലത്തെ നിയന്ത്രണങ്ങള് ലംഘിച്ച് സമരം നടത്തിയതിനുള്ള നിസാര കേസുകളാണ്. അതില് പലതും അവസാനിച്ചു.
കാപ്പ എന്ന ഗുണ്ടാ നിയമം
കേരള ആന്റി-സോഷ്യല് ആക്ടിവിറ്റീസ് (പ്രിവെന്ഷന്) ആക്ട് ഇതാണ് കാപ്പയുടെ മുഴുവന് പേര്. സാമൂഹിക വിരുദ്ധ പ്രവര്ത്തനങ്ങള് തടയല് നിയമമാണ്. പൊതുസുരക്ഷയ്ക്കും സമാധാനത്തിനും ഭംഗം വരുത്തുന്നവര്, അറിയപ്പെടുന്ന ഗുണ്ടകള്, അനധികൃത മദ്യക്കച്ചവടക്കാര്, മദ്യക്കടത്തുകാര്, മദ്യവില്പനക്കാര്, വ്യാജ നോട്ട് നിര്മാതാക്കള് – വിതരണക്കാര്, മണല് മാഫിയ, വ്യാജ സിഡി നിര്മാതാക്കള് – വിതരണക്കാര്, ലഹരി മരുന്ന് ഉല്പാദകര് – കടത്തുകാര് – വില്പനക്കാര് എന്നിവരെല്ലാമാണ് പ്രധാനമായും നിയമത്തിന്റെ പരിധിയില് വരുന്നത്.
40 കേസുള്ള എസ് എഫ് ഐ നേതാവ്
അങ്ങനെയെങ്കില് 40 ക്രിമിനല് കേസുകളുള്ള എസ്.എഫ്.ഐ നേതാവിനെതിരെ കാപ്പ ചുമത്താന് സര്ക്കാര് തയാറാകുമോയെന്ന് വി.ഡി സതീശന് ചോദിച്ചു.
ഇയാള്ക്കെതിരായ 16 കേസുകളും ആയുധം ഉപയോഗിച്ച് മറ്റ് വിദ്യാര്ഥികളെ ആക്രമിച്ചതിനാണ്. മൂന്ന് കേസുകള് വധശ്രമത്തിനും ഒരോ കേസുകള് വീതം തട്ടിക്കൊണ്ട് പോകലിനും സ്ത്രീത്വത്തെ അപമാനിച്ചതിനുമാണ്. ഇത്രയും വലിയ ക്രിമിനല് കേസുകളുള്ള എസ്.എഫ്.ഐ നേതാവിനെതിരെ കാപ്പ ചുമത്താത്ത സര്ക്കാരാണ് നിസാരമായ പെറ്റി കേസുകളുള്ള ഫര്സീനെതിരെ കാപ്പ ചുമത്തുന്നത്. സംസ്ഥാനത്ത് വിഹരിക്കുന്ന പതിനാലായിരത്തിലധികം ഗുണ്ടകള്ക്കും കാല് വെട്ടി ബൈക്കില് കൊണ്ടു പോയവര്ക്കുമൊക്കെ എതിരെ കാപ്പ ചുമത്താന് തയാറാകാത്തവരാണ്.
കോണ്ഗ്രസുകാര്ക്കെതിരെ കാപ്പ ചുമത്താന് വന്നാല് അതേ ശക്തിയില് പ്രതിരോധിക്കുമെന്നും സതീശന് അറിയിച്ചു. ഈ പരിപാടി ഇവിടെ അവസാനിപ്പിക്കണം. കരിങ്കൊടി ഉയര്ത്തി പ്രതിഷേധിച്ചതിന്റെ പേരില് കാപ്പ ചുമത്തി അകത്തിടുമെങ്കില്, ഇത് സ്റ്റാലിന്റെ റഷ്യയല്ല, കേരളമാണെന്ന് മുഖ്യമന്ത്രിയെ ഓര്മ്മിപ്പിക്കുന്നു. ആ കളി ഞങ്ങളോട് വേണ്ടെന്നും സതീശന് പറഞ്ഞു.
