ചലച്ചിത്ര അക്കാദമി ചെയര്മാന് രഞ്ജിത്തും നടന് ദിലീപും ഒരേ വേദിയില്. ഫിയോക് ബൈലോ കമ്മിറ്റി യോഗത്തിലാണ് ഇരുവരും വേദി പങ്കിട്ടത്. ഈ കൂട്ടായ്മയിലെ ആജീവനാന്ത ചെയര്മാന്, വൈസ് ചെയര്മാന് പദവികള് ഒഴിവാക്കുന്ന കാര്യം ഇന്ന് ചേരുന്ന യോഗത്തില് ചര്ച്ച ചെയ്യാൻ തീരുമാനിച്ചിരുന്നു.
രഞ്ജിത്തിനെ വേദിയിലിരുത്തി പുകഴ്ത്തിയ ദിലീപ് ചലച്ചിത്ര അക്കാദമി ചെയര്മാന് സ്ഥാനത്തിരിക്കാന് രഞ്ജിത്ത് യോഗ്യനാണെന്ന് പറഞ്ഞു. ഫിയോകിന്റെ ആജീവനാന്ത ചെയര്മാനാണ് ദിലീപ്. ആന്റണി പെരുമ്പാവൂരാണ് വൈസ് ചെയര്മാന്. ആന്റണി പെരുമ്പാവൂര് ഇന്നത്തെ യോഗത്തില് പങ്കെടുത്തില്ല. ഈ പദവികളാണ് ചർച്ച ചെയ്യേണ്ടിയിരുന്നത്
തിരുവനന്തപുരത്ത് നടന്ന സംസ്ഥാന ചലച്ചിത്രമേള ഉദ്ഘാടന വേദിയില് ഭാവന അതിഥിയായി എത്തിയപ്പോള് രഞ്ജിത്താണ് സ്വീകരിച്ചത്. പോരാട്ടത്തിന്റെ പെണ്പ്രതീകമെന്ന് വിശേഷിപ്പിച്ച് കൊണ്ടായിരുന്നു രഞ്ജിത് ഭാവനയെ വേദിയിലേക്ക് ക്ഷണിച്ചത്. എന്നാൽ ഇതിന് തുടർച്ചയായി നടിയെ ആക്രമിച്ച കേസില് ദിലീപ് ജയിലിലായിരുന്നപ്പോള് രഞ്ജിത്ത് കാണാന് പോയ സംഭവത്തെ വിമര്ശിച്ച് നിരവധി പേര് രംഗത്തെത്തിയിരുന്നു.
ഭരണഘടന ഭേദഗതിയിൽ ഉൾപ്പെടെ തീരുമാനം എടുക്കാനാണ് സംസ്ഥാനത്തെ തിയറ്ററുടമകളുടെ സംഘടനയായ ഫിയോക്കിന്റെ (FEOUK) ജനറൽ ബോഡി ഇന്ന് കൊച്ചിയിൽ ചേർന്നത്. നിലവില് ഫിയോക്കിന്റെ ആജീവനാന്ത ചെയര്മാനായ ദിലീപിനെയും(DILEEP) വൈസ് ചെയര്മാനായ ആന്റണി പെരുമ്പാവൂരിനെയും (ANTONY PERUMBAVOOR)സ്ഥാനങ്ങളിൽ നിന്ന് നീക്കാനുള്ള ഭരണഘടന ഭേദഗതിക്കാണ് ഫിയോക് ഒരുങ്ങുന്നത്. ഈ സ്ഥാനങ്ങളിലേക്ക് തെരഞ്ഞെടുപ്പ് പാടില്ലെന്ന ചട്ടം നീക്കം ചെയ്യേണ്ടിവരും എന്ന കടമ്പ കടക്കാനുണ്ട്.
ദിലീപിൻ്റെ വീട്ടിൽ ചായ കുടിക്കാനല്ല പോയത്
ദിലീപിന്റെ വീട്ടില് ചായകുടിക്കാനല്ല പോയതെന്ന് സംവിധായകന് രഞ്ജിത്ത്. ഫിയോക്കിന്റെ പ്രതിനിധികള് ക്ഷണിച്ചിട്ടാണ് പോയത്. യോഗത്തിൽ പങ്കെടുത്തതാണ്. ദിലീപ് കയറിയ വിമാനത്തിൽ കയറിക്കൂടെന്നില്ല. അതിൽ നിന്നും ചാടാനാവില്ല. പ്രവർത്തന സ്വാതന്ത്ര്യം സർക്കാരിൽ നിന്നും വാങ്ങിയിട്ടുണ്ട്. എന്നും രഞ്ജിത്ത് പ്രതികരിച്ചു.
എന്താണ് സംഘടനയിൽ ഇനി
മറ്റ് സംഘടനകളിൽ അംഗങ്ങളായവർ തെരഞ്ഞെടുപ്പിൽ മത്സരിക്കരുതെന്ന ചട്ടം ഏർപ്പെടുത്താനും നീക്കമുണ്ട്. ഇതും ദിലീപിനെയും ആന്റണി പെരുമ്പാവൂരിനും തിരിച്ചടിയാകും. ഇക്കാര്യത്തിൽ അന്തിമ തീരുമാനം ഈ മാസം 31 ന് ചേരുന്ന ഫിയോക് വാർഷിക ജനറൽ ബോഡി യോഗത്തിൽ എടുക്കും. 2017 ൽ സംഘടന രൂപീകരണത്തിന് മുൻകൈ എടുത്തവരെന്ന നിലയിലാണ് ദിലീപിനെ ആന്റണി പെരുമ്പാവൂരിനെയും ആജീവനാന്ത ഭാരവാഹികളാക്കിയിരുന്നത്.
സംസ്ഥാനത്തെ തിയറ്റർ ഉടമകളുടെ സംഘടനയായ ഫിയോക്കിൽ അടുത്തിടെ ഉണ്ടായ ഭിന്നത വ്യക്തമാക്കുന്നതാണ് നിലവിലെ നീക്കങ്ങൾ. 2017ല് ഫിലിം എക്സിബിറ്റേഴ്സ് ഫെഡറേഷന് പിളര്ന്നാണ് തിയറ്ററുടമകളുടെ ഇന്നത്തെ സംഘടനയായ ഫിയോക് രൂപികരിക്കുന്നത്. അന്ന് സംഘടന രൂപീകരണത്തിന് മുൻകൈ എടുത്തവരെന്ന നിലയിലാണ് ദിലീപിനെ ആന്റണി പെരുമ്പാവൂരിനെയും ആജീവനാന്ത ഭാരവാഹികളാക്കിയിരുന്നത്.
ഈ രണ്ട് സ്ഥാനങ്ങളിലേക്കും തിരഞ്ഞെടുപ്പ് പാടില്ലെന്നും ഫിയോക്കിന്റെ ഭരണഘടനയില് എഴുതിച്ചേര്ത്തിരുന്നു. ഈ ചട്ടം പൊളിച്ചെഴുതാനാണ് ഫിയോക് പ്രസിഡന്റ് വിജയകുമാറിന്റെ നേതൃത്വത്തില് നീക്കം നടക്കുന്നത്.
മോഹന്ലാല് ചിത്രമായ മരക്കാറിന്റെ റിലീസിങുമായി ബന്ധപ്പെട്ട് ആന്റണി പെരുമ്പാവൂരും ഫിയോക്കുമായുണ്ടായ അഭിപ്രായഭിന്നതയുടെ തുടര്ച്ചയാണ് നിലവിലെ നീക്കത്തിലെത്തി നില്ക്കുന്നത്. നേരത്തെ ചെയര്മാനായ ദിലിപ് മുഖേന സംഘടനയ്ക്ക് ആന്റണി പെരുമ്പാവൂര് രാജി നല്കിയിരുന്നെങ്കിലും അതേകുറിച്ച് അറിവില്ലെന്നാണ് ഫിയോക് പ്രസിഡന്റ് വിജയകുമാര് മാധ്യമങ്ങളെ അറിയിച്ചത്.
