തിരുവനന്തപുരം മെഡിക്കല് കോളേജിലെ യുവഡോക്ടര് ഷഹനയുടെ ആത്മഹത്യയില് ആരോപണ വിധേയനായ യുവാവിനെ പ്രതി ചേർത്തു.
കൂടെ പഠിച്ച ഡോ. ഇ.എ. റുവൈസിനെതിരെയാണ് നടപടി. ആത്മഹത്യാ പ്രേരണാക്കുറ്റവും സ്ത്രീധന നിരോധന നിയമവും ചുമത്തി.
ആവശ്യപ്പെട്ട സ്ത്രീധനം നല്കാന് കഴിയാത്തതിനാല് സുഹൃത്തായ യുവാവ് വിവാഹത്തില്നിന്ന് പിന്മാറിയതിനെ തുടര്ന്നുള്ള മനോവിഷമത്തെ തുടര്ന്നാണ് ഷഹ്ന ആത്മഹത്യ ചെയ്തതെന്നായിരുന്നു മരണ സമയത്ത് എഴുതി വെച്ച കുറിപ്പ്.
ഭീമമായ സ്ത്രീധനം ചോദിക്കുകയും അത് ലഭിക്കാതെ വന്നപ്പോള് വിവാഹത്തില്നിന്ന് പിന്മാറുകയും ചെയ്തുവെന്ന് ഷഹനയുടെ മാതാവും സഹോദരിയും പോലീസിന് മൊഴിയും നൽകി.
വിവാഹവുമായി ബന്ധപ്പെട്ട് സ്ത്രീധനം ചോദിച്ചതില് റുവൈസിന്റെ കുംടുംബത്തില് ആര്ക്കൊക്കെ പങ്കുണ്ടെന്ന കാര്യങ്ങളും പോലീസ് അന്വേഷിക്കും. സംഭവത്തിന് പിന്നാലെ റുവൈയ്സിനെ പിജി ഡോക്ടേഴ്സ് അസോസിയേഷന് പ്രസിഡന്റ് സ്ഥാനത്തുനിന്നും നീക്കി. അന്വേഷണത്തില് സുതാര്യത ഉറപ്പാക്കാനാണ് അന്വേഷണം അവസാനിക്കുന്നത് വരെ ഇയാളെ സ്ഥാനത്തുനിന്ന് നീക്കുന്നതെന്ന് കെ.എം.പി.ജി.എ സംഘടന അറിയിച്ചു.
ഷഹ്നയും റുവൈയ്സും തമ്മിലുള്ള വിവാഹം നേരത്തെ തീരുമാനിച്ചിരുന്നു. യുവാവിന്റെ വീട്ടുകാര് ഉയര്ന്ന സ്ത്രീധനമാണ് വിവാഹത്തിനായി ആവശ്യപ്പെട്ടത്. സ്ത്രീധനമായി 150 പവനും 15 ഏക്കര് ഭൂമിയും ബി.എം.ഡബ്ല്യൂ. കാറും വേണമെന്നായിരുന്നു ആവശ്യം.
എന്നാല്, അഞ്ചേക്കര് ഭൂമിയും ഒരു കാറും നല്കാമെന്ന് ബന്ധുക്കള് അറിയിച്ചു. അതുപോര കാര് ബി.എം.ഡബ്യൂ തന്നെ വേണമെന്നും ഒപ്പം സ്വര്ണവും വേണമെന്ന ആവശ്യത്തില് യുവാവിന്റെ വീട്ടുകാര് ഉറച്ചുനിന്നു. പക്ഷേ, ആവശ്യപ്പെട്ട അത്രയും സ്ത്രീധനം നല്കാന് ഷഹ്നയുടെ വീട്ടുകാര്ക്ക് കഴിഞ്ഞില്ല.
ഇതോടെ യുവാവും ബന്ധുക്കളും വിവാഹത്തില്നിന്ന് പിന്മാറി. ഇതിന്റെ മാനസികപ്രയാസം ഷഹ്നയെ അലട്ടിയിരുന്നു
തിരുവനന്തപുരം മെഡിക്കല് കോളേജിലെ സര്ജറി വിഭാഗം പി.ജി. വിദ്യാര്ഥിനിയായ ഷഹ്നയെ തിങ്കളാഴ്ച രാത്രിയാണ് മെഡിക്കല് കോളേജിനടുത്ത് താമസിച്ചിരുന്ന ഫ്ളാറ്റില് മരിച്ചനിലയില് കണ്ടെത്തിയത്. സ്ത്രീധനം നല്കാന് സാമ്പത്തികശേഷിയില്ലാത്തതിനാല് ജീവനൊടുക്കുന്നതായി രേഖപ്പെടുത്തിയ ആത്മഹത്യാക്കുറിപ്പും പോലീസ് കണ്ടെടുത്തിയിരുന്നു.
തുടക്കത്തിൽ പ്രതിയുടെ വിവരങ്ങൾ പൊലീസ് മറച്ചു വെച്ചിരുന്നു
