ഇന്ഷുറന്സ് പരിരക്ഷക്ക് 24 മണിക്കൂര് ആശുപത്രി വാസം വേണമെന്നത് നിർബന്ധമാക്കാനാവില്ല. ഇത് ഉപഭോക്തൃ അവകാശ ലംഘനമാവുമെന്ന് ഉപഭോക്തൃ തര്ക്ക പരിഹാര കമ്മിഷന് വിധി. ആധുനിക ചികിത്സാ സംവിധാനങ്ങള് നിലവിലുള്ളപ്പോള് ഇന്ഷുറന്സ് പരിരക്ഷയ്ക്ക് 24 മണിക്കൂര് ആശുപത്രിവാസം ന്യായീകരിക്കാനാവില്ല. ഈ നബന്ധന ഉപഭോക്തൃ അവകാശങ്ങളുടെ ലംഘനമാണെന്നും കമ്മിഷന് വ്യക്തമാക്കി.
കിടത്തി ചികിത്സ ആവശ്യമുള്ളതും എന്നാല് ആധുനിക സാങ്കേതിക വിദ്യയുടെ സഹായത്തോടെ കുറഞ്ഞ സമയത്തില് ചികിത്സ അവസാനിക്കുകയും ചെയ്താല് ഇന്ഷുറന്സ് പരിരക്ഷയ്ക്ക് അര്ഹതയുണ്ടാകും.
ഇന്ഷുറന്സ് കമ്പനിയുടെ മേല് നടപടികള് പോളിസി ഉടമക്ക് നല്കേണ്ട സേവനത്തിന്റെ വീഴ്ചയാണെന്ന് കണ്ടെത്തി. ക്ലെയിം നിരസിക്കപ്പെട്ട ഉപഭോക്താവിന് നഷ്ടപരിഹാരമായി 57,720 രൂപ 30 ദിവസത്തിനകം നല്കാന് ഇന്ഷുറന്സ് കമ്പനിക്ക് ഉത്തരവ് നല്കി.
എറണാകുളം മരട് സ്വദേശി ജോണ് മില്ട്ടണ് തന്റെ മാതാവിന്റെ ഇടത് കണ്ണിന്റെ ശസ്ത്രക്രിയ എറണാകുളത്തെ സ്വകാര്യ ആശുപത്രിയില് ചെയ്തിരുന്നു. ആധുനിക സാങ്കേതികവിദ്യയുടെ സഹായത്തോടെ ഒരു ദിവസം പോലും ഹോസ്പിറ്റലില് കിടക്കാതെ തന്നെ ശസ്ത്രക്രിയ നടത്തുകയും ഡിസ്ചാര്ജ് ആവുകയും ചെയ്തു. തുടര്ന്ന് ചികിത്സയ്ക്ക് ചെലവായ തുക ലഭിക്കുന്നതിനു വേണ്ടി ഇന്ഷുറന്സ് കമ്പനിയെ സമീപിച്ചെങ്കിലും 24 മണിക്കൂര് ആശുപത്രിവാസം ഇല്ലാത്തതിനാല് ഒ.പി. ചികിത്സയായി കണക്കാക്കി ഇന്ഷുറന്സ് കമ്പനി ക്ലെയിം അപേക്ഷ നിരസിക്കുകയായിരുന്നു.
മയോപ്പിയ ചികിത്സയ്ക്ക് ഉപയോഗിക്കുന്ന പ്രത്യേക ഇഞ്ചക്ഷന് ഇന്ഷുറന്സ് പരിധിയില് ഉള്പ്പെടുമെന്ന ഇന്ഷൂറന്സ് റെഗുലേറ്ററി അതോററി (ഐ.ആര്.ഡി.എ.ഐ.)യുടെ സര്ക്കുലറും കോടതി പരിഗണിച്ചു. പരാതിക്കാരന്റെ ആവശ്യം നിലനില്ക്കെ മറ്റൊരു പോളിസി ഉടമയ്ക്ക് ഇതേ ക്ലെയിം ഇന്ഷുറന്സ് കമ്പനി അനുവദിച്ചതായും കോടതി കണ്ടെത്തി.
ജില്ലാ ഉപഭോക്തൃ തര്ക്ക പരിഹാര കമ്മീഷന് പ്രസിഡന്റ് ഡി.ബി. ബിനു, മെമ്പര്മാരായ വൈക്കം രാമചന്ദ്രന്, ടി.എന്. ശ്രീവിദ്യ എന്നിവരുടെ ബെഞ്ചാണ് പരാതിക്കാരന് അനുകൂലമായി ഉത്തരവിട്ടത്.
