ആലപ്പുഴ കളക്ടറായി നിയമനം നൽകിയ ശ്രീറാം വെങ്കിട്ടരാമനെ മാറ്റിയത് പൗരസമൂഹത്തില് നിന്നുണ്ടായ എതിര്പ്പ് കണക്കിലെടുത്താണെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്.
സര്ക്കാരിൻ്റെ ഏതെങ്കിലും നടപടിയോടോ തീരുമാനത്തോടോ വിയോജിപ്പുണ്ടെങ്കില് അതില് ജനാധിപത്യപരമായി വിയോജിപ്പ് പ്രകടിപ്പിക്കുന്നതിനോട് എല്ഡിഎഫ് സര്ക്കാരിനോ മുഖ്യമന്ത്രിക്കോ മുന്നണിക്കോ അസഹിഷ്ണുതയില്ലെന്നും അദ്ദേഹം ലേഖനത്തിൽ വ്യക്തമാക്കി.
ദേശാഭിമാനി പത്രത്തില് എഴുതിയ ലേഖനത്തിലാണ് വിശദീകരണം. പത്രപ്രവര്ത്തകൻ കാറിടിച്ച് കൊല്ലപ്പെട്ട കേസില് പ്രതിയായ ഐഎഎസ് ഉദ്യോഗസ്ഥനാണ് ശ്രീറാം വെങ്കിട്ടരാമൻ. ഇദ്ദേഹത്തിൻ്റെ സുഹൃത്ത് റിഫ എന്ന യുവതി രണ്ടാം പ്രതിയുമാണ്.
നിയമം നിര്ബന്ധിച്ചതിനാലാണ് ശ്രീരാമിനെ സര്വീസില് തിരിച്ചെടുത്തത്. പിന്നീട് സര്വീസ് നടപടിക്രമങ്ങളുടെ ഭാഗമായി ആലപ്പുഴയില് കളക്ടറാക്കി. അതില് പൗരസമൂഹത്തില് എതിര്പ്പുണ്ടായി. ആ വികാരം കണക്കിലെടുത്താണ് നിയമനം സര്ക്കാര് റദ്ദാക്കിയത്.
ജനാധിപത്യപരമായ ന്യായമായ വിയോജിപ്പുകളെ അസഹിഷ്ണുതയോടെ തള്ളുന്ന സമീപനം എല്ഡിഎഫ് സര്ക്കാരിന് ഇല്ലെന്നതാണ് ഇതിലൂടെ വ്യക്തമാക്കുന്നത് എന്നും കോടിയേരി ചൂണ്ടികാട്ടി.
എന്നാല്, രാഷ്ട്രീയ ഗൂഢലക്ഷ്യത്തോടെയുള്ള സമരകോലാഹലങ്ങള്ക്കു മുന്നില് ഈ സര്ക്കാര് മുട്ടുമടക്കുകയുമില്ല. കെട്ടിച്ചമച്ച ആരോപണങ്ങളുടെ പേരില് മുഖ്യമന്ത്രിക്ക് എതിരെ കോണ്ഗ്രസ് നടത്തുന്ന സമരത്തില് ഒരു ന്യായവുമില്ല.
മോദിക്ക് എതിരെയല്ലേ കോണ്ഗ്രസ് നേതാക്കൾ ആദ്യം പ്രതിഷേധിക്കേണ്ടത്. മോദിക്കുനേരെ ഉയര്ത്താത്ത കരിങ്കൊടിയാണ് പിണറായിക്കുനേരെ പിടിക്കുന്നത്. അതില് തെളിയുന്നത് കോണ്ഗ്രസിന്റെ കമ്യൂണിസ്റ്റ് വിരുദ്ധതയും ജനാധിപത്യനിഷേധവുമാണ്. അതിനൊപ്പം എല്ഡിഎഫ് വിരുദ്ധതയില് കേരളത്തിലെ കോണ്ഗ്രസും മോദിഭരണക്കാരും തമ്മിലുള്ള ഒക്കച്ചങ്ങാതി നയവുമാണെന്നും കോടിയേരി ലേഖനത്തില് ചൂണ്ടികാട്ടി.
