കുഞ്ചാക്കോ ബോബൻ നായകനായ “ന്നാ താൻ കേസ് കൊട്” എന്ന സിനിമക്ക് എതിരെ സൈബർ ആക്രമണം. സർക്കാരിൻ്റെ പ്രതിഛായ നശിപ്പിക്കാനുള്ള ശ്രമം എന്നാണ് വിമർശനം.
സൈബർ ക്യാമ്പെയിനെതിരെ രൂക്ഷവിമർശനവുമായി കൊല്ലം ഡി.സി.സി പ്രസിഡന്റ് ബിന്ദു കൃഷ്ണ രംഗത്ത് എത്തിയതോടെ സിനിമ പേരിൽ തന്നെ ഹിറ്റായി. മറുപടിയുമായി മന്ത്രി പി എ മുഹമ്മദ് റിയാസും മാധ്യമങ്ങളിൽ നിറഞ്ഞു.
ജനങ്ങൾ നേരിട്ട് അനുഭവിക്കുന്ന ഒരു ബുദ്ധിമുട്ട് വെറും പരസ്യത്തിന് വേണ്ടി മാത്രം, തമാശ രൂപേണ പോസ്റ്ററിൽ ഉപയോഗിച്ചപ്പോൾ ആ സിനിമ ബഹിഷ്കരിക്കാൻ തീരുമാനമെടുത്ത സഖാക്കന്മാരെല്ലാം ഏത് റോഡിലൂടെയാണ് യാത്ര ചെയ്യുന്നത് എന്നാണ് എത്ര ചിന്തിച്ചിട്ടും മനസ്സിലാകാത്തത് എന്ന് ബിന്ദു കൃഷ്ണ ഫെയ്സ്ബുക്കിൽ ചോദിച്ചു. അതോ സഖാക്കന്മാരുടെയെല്ലാം യാത്ര വിമാനത്തിലാണോ എന്നും അവർ പരിഹസിച്ചു.
കൊല്ലം ഡിസിസി ഓഫീസ് മന്ദിരത്തിൽ നിന്നും ന്നാ താൻ കേസ് കൊട് എന്ന ചിത്രം പ്രദർശിപ്പിക്കുന്ന രണ്ട് തിയേറ്ററുകളിലേക്കും പോകുന്ന വഴികളിൽ കുഴികളുണ്ട്. കൂടാതെ, മഴകൂടിയായിക്കഴിഞ്ഞാൽ ചെളിക്കുളങ്ങളുടെ തൃശ്ശൂർ പൂരമാണ്. എന്നിരുന്നാലും ഈ സിനിമ കാണാൻ തന്നെയാണ് തീരുമാനമെന്ന് അവർ എഴുതി. റോഡുകളിൽ കുഴികളുണ്ട് എന്ന് പറയുമ്പോൾ തിയേറ്ററിലേക്ക് പോകുന്ന റോഡുകളിൽ മാത്രമല്ല, കൊല്ലം ഭരണകൂട ആസ്ഥാന മന്ദിരമായ കളക്ട്രേറ്റിന് ചുറ്റിനും, കൊല്ലം കോർപ്പറേഷന് മുന്നിലും കുഴികളുടെ ഘോഷയാത്രയാണ്. എന്തിനേറെ പറയുന്നു പൊതുമരാമത്ത് വകുപ്പ് ജില്ലാ ആസ്ഥാന മന്ദിരത്തിന് മുന്നിൽ പോലും റോഡുകൾ ചെളിക്കുളമായിട്ട് മാസങ്ങളും, വർഷങ്ങളുമൊക്കെ പിന്നിടുകയാണെന്നും ബിന്ദു കൃഷ്ണ പറഞ്ഞു.
കുഞ്ചാക്കോ ബോബന് പ്രധാനവേഷത്തിലെത്തുന്ന ‘ന്നാ താന് കേസ് കൊട്’ എന്ന ചിത്രത്തിന്റെ റിലീസിനോടനുബന്ധിച്ച് മാധ്യമങ്ങളില് വന്ന പരസ്യം വലിയ ചർച്ചയാണ് ഉയർത്തിയത്. തീയേറ്ററുകളിലേക്കുള്ള വഴിയില് കുഴിയുണ്ട്, എന്നാലും വന്നേക്കണേ എന്നാണ് പരസ്യത്തിലുള്ളത്. കേരളത്തിലെ റോഡുകളിലെ കുഴികളെ പറ്റി ഈ മഴക്കാലത്ത് വിമര്ശനവും വാദപ്രതിവാദങ്ങളും നടക്കുന്ന സമയത്താണ് ഈ പരസ്യവാചകം ബോക്സ് ഓഫീസ് ഭേദിച്ചത്.
സമൂഹമാധ്യമങ്ങളില് ഈ പരസ്യത്തെ അനുകൂലിച്ചും പ്രതികൂലിച്ചും സംവാദങ്ങള് കയര്ക്കുകയാണ്. സിനിമയിലെ ട്രെയ്ലറിലും റോഡിലെ കുഴികളെക്കുറിച്ച് പരാമര്ശമുണ്ട്.
സിനിമയിലെ കുഞ്ചാക്കോ ബോബൻ്റെ ഡാൻസും ട്രോളും പ്രതിട്രോളുകളുമായി സോഷ്യൽ മീഡിയ ആഘോഷിച്ചിരുന്നു.
ഒരു മുഴം മുന്നിൽ നടന്ന് പ്രതിരോധിച്ച് മുഹമ്മദ് റിയാസ്
സൈബര് ആക്രമണങ്ങളില് പ്രതികരണവുമായി പൊതുമരാമത്ത് മന്ത്രി പി.എ.മുഹമ്മദ് റിയാസ്. വിമര്ശനങ്ങളും നിര്ദേശങ്ങളും സ്വീകരിക്കും. സിനിമയുടെ പരസ്യത്തെ ആ നിലയില് തന്നെ എടുത്താല് മതിയെന്ന് മന്ത്രി വ്യക്തമാക്കി.
സിനിമയ്ക്കെതിരെ നടക്കുന്ന സൈബര് ആക്രമണത്തെക്കുറിച്ച് തനിക്കറിയില്ല. പലകാലങ്ങളിലും പൊതുമരാമത്ത് വകുപ്പിനെക്കുറിച്ച് സിനിമകളില് ട്രോളുകള് ഉണ്ടായിട്ടുണ്ട്. ജനങ്ങളെ സംബന്ധിച്ച് കേരളത്തിന്റെ ദീര്ഘകാലത്തെ ഈ പ്രശ്നം പരിഹരിക്കപ്പെടണം. അതുതന്നെയാണ് വകുപ്പിന്റേയും അഭിപ്രായമെന്നും അദ്ദേഹം വ്യക്തമാക്കി.
സാമൂഹിക മാധ്യമങ്ങളില്കൂടി പരാതി അയച്ചാല് പോലും മന്ത്രിയുടെ ടീമിലുള്ളവര് അത് നോക്കി പരിഹാരണം കണ്ടെത്തുന്നുണ്ട്’ മന്ത്രി റിയാസ് കോഴിക്കോട് മാധ്യമങ്ങളോട് പ്രതികരിച്ചു.
