പ്രമുഖ ഫാസ്റ്റ് ഫുഡ് ശൃംഘലയായ മക്ഡൊണാൾഡ്സിൻ്റെ ബർഗറുകൾ ചെറുതാവുന്നു എന്ന് ആരോപണം. മക്ഡൊണാൾഡ്സിൻ്റെ ഓസ്ട്രേലിയൻ ഔട്ട്ലറ്റുകൾക്കെതിരെയാണ് ആരോപണം ഉയരുന്നത്. നിരവധി ഉപഭോക്താക്കളാണ് ഈ ആരോപണവുമായി സമൂഹമാധ്യമങ്ങളിലൂടെ രംഗത്തെത്തിയത്. എന്നാൽ, മക്ഡൊണാൾഡ്സ് വക്താവ് ഈ ആരോപണങ്ങൾ തള്ളി. ബർഗറിൻ്റെ വലിപ്പം വ്യത്യാസപ്പെടുത്തിയിട്ടില്ലെന്നാണ് വാർത്താകുറിപ്പിലൂടെ മക്ഡൊണാൾഡ്സ് അറിയിച്ചത്.
ഇത് ആദ്യമായല്ല മക്ഡൊണാൾഡ് ഈ ആരോപണം നേരിടുന്നത്. ഈ വർഷാദ്യവും മക്ഡൊണാൾഡ്സിൻ്റെ ബർഗർ ചെറുതാവുന്നു എന്ന് ആരോപണങ്ങളുയർന്നിരുന്നു. ടിക്ടോകിൽ നിരവധി ആളുകൾ ഈ ആരോപണവുമായി വിഡിയോ പങ്കുവച്ചു. സിനിമാ താരങ്ങളടക്കമുള്ളവർ മക്ഡൊണാൾഡ്സിനെതിരെ രംഗത്തുവന്നു.
