‘ഒരുമിക്കുന്ന ചുവടുകള് ഒന്നാകുന്ന രാജ്യം’ എന്ന മുദ്രാവാക്യം ഉയര്ത്തി രാഹുല് ഗാന്ധി നയിക്കുന്ന ഭാരത് ജോഡോ യാത്ര ഞായറാഴ്ച കേരളത്തിൽ പ്രവേശിക്കും. വാദ്യമേളം, കേരളീയ കലാരൂപങ്ങള് എന്നിവയുടെ അകമ്പടിയോടെ പാറശാലയില് രാഹുല് ഗാന്ധിയേയും പദയാത്രികരേയും സ്വീകരിക്കും. കേരളത്തില് നിന്നുള്ള പദയാത്രികരും യാത്രയ്ക്കൊപ്പം അണിചേരും.
സെപ്റ്റംബര് ഏഴിന് കന്യാകുമാരിയില് നിന്നാണ് ജോഡോ യാത്ര ആരംഭിച്ചത്. ഞായറാഴ്ച രാത്രിയോടെ യാത്ര കേരള അതിര്ത്തിയായ പാറശാല ചേരുവരകോണത്തെത്തും. സെപ്റ്റംബര് 11-ന് രാവിലെ ഏഴിന് പാറശാലയില് നിന്നും കെപിസിസി പ്രസിഡന്റ് കെ. സുധാകരന്, പ്രതിപക്ഷനേതാവ് വിഡി സതീശന്, എഐസിസി ജനറല് സെക്രട്ടറി താരീഖ് അന്വര്, മുന്മുഖ്യമന്ത്രി ഉമ്മന്ചാണ്ടി, മുന് പ്രതിപക്ഷനേതാവ് രമേശ് ചെന്നിത്തല, കെ.മുരളീധരന് എംപി, യുഡിഎഫ് കണ്വീനര് എംഎം ഹസ്സന്, ഭാരത് ജോഡോ യാത്ര സംസ്ഥാന കോ-ഓഡിനേറ്റര് കൊടിക്കുന്നില് സുരേഷ്, ശശി തരൂര്, അടൂര് പ്രകാശ്, എം വിന്സന്റ് എംഎല്എ, തുടങ്ങിയവര് ചേര്ന്ന് ജാഥയെ സ്വീകരിക്കും.
കേരളത്തിൽ ഏഴ് ജില്ലകളിൽ
കേരളത്തില് ഏഴുജില്ലകളിലൂടെയാണ് ജോഡോ യാത്ര കടന്നുപോകുന്നത്. തിരുവനന്തപുരം മുതല് തൃശ്ശൂര് വരെ ദേശീയ പാതവഴിയും തുടര്ന്ന് നിലമ്പൂര്വരെ സംസ്ഥാന പാത വഴിയുമായിരിക്കും പദയാത്ര. രാവിലെ 7 മുതല് 11 വരെയും വൈകുന്നേരം 4 മുതല് 7 വരെയുമാണ് യാത്രയുടെ സമയക്രമം.
ഇതിനിടെയുള്ള സമയത്തില് വിവിധ മേഖലയിലുള്ള തൊഴിലാളികള്, കര്ഷകര്, യുവാക്കള്, സാംസ്കാരിക പ്രമുഖര് തുടങ്ങിയവരുമായി ജാഥ ക്യാപ്റ്റന് രാഹുല് ഗാന്ധി കൂടിക്കാഴ്ച നടത്തും.
ഭാരത് ജോഡോ വഴി ക്രമം
ഭാരത് ജോഡോ യാത്രയില് മുന്നൂറ് പദയാത്രികരാണുള്ളത്. തിരുവനന്തപുരം ജില്ലയില് 11,12,13,14 തീയതികളില് പര്യടനം നടത്തി 14-ന് ഉച്ചയ്ക്ക് കൊല്ലം ജില്ലയില് പ്രവേശിക്കും. 15,16 തീയതികളില് കൊല്ലം ജില്ലയിലൂടെ കടന്നുപോകുന്ന യാത്ര 17,18,19,20 തീയതികളില് ആലപ്പുഴയിലും 21,22-ന് എറണാകുളം ജില്ലയിലും 23,24,25 തീയതികളില് തൃശൂര് ജില്ലയിലും 26-നും 27-ന് ഉച്ചവരെയും പാലക്കാട് ജില്ലയിലും പര്യടനം പൂര്ത്തിയാക്കും. 28,29-നും മലപ്പുറം ജില്ലയിലൂടെ കടന്ന് കേരളത്തിലെ പര്യടനം പൂര്ത്തിയാക്കി, തമിഴ്നാട്ടിലെ ഗൂഡല്ലൂര് വഴി കര്ണ്ണാടകത്തില് പ്രവേശിക്കും.
150 ദിവസം നീളുന്ന പദയാത്ര 12 സംസ്ഥാനങ്ങളിലൂടെയാണ് കടന്നുപോവുക. 3570 കിലോമീറ്റര് പിന്നിട്ട് 2023 ജനുവരി 30-നു സമാപിക്കും. 22 നഗരങ്ങളില് റാലികള് സംഘടിപ്പിക്കും.
