മാധ്യമ പ്രവര്ത്തകന് കെ.എം ബഷീറിനെ കാറിടിച്ച് കൊലപ്പെടുത്തിയ കേസില് ശ്രീറാം വെങ്കിട്ടരാമന്റെ വിടുതല് ഹര്ജിയില് വാദം പൂര്ത്തിയായി. കേസില് തനിക്കെതിരേ ഒരു തെളിവുമില്ല. മദ്യപിച്ച് വാഹനം ഓടിച്ചുവെന്നതിന് ശാസ്ത്രീയമായ തെളിവുകള് കുറ്റപത്രത്തില് ഉള്പ്പെടുത്താന് പ്രോസിക്യൂഷന് സാധിച്ചിട്ടില്ല- എന്ന് ശ്രീറാം വാദിച്ചു.
ഉണ്ടായത് സാധാരണ വാഹനാപകടം മാത്രമാണ്. കെഎം ബഷീറിനെ കൊലപ്പെടുത്തുക എന്ന ഉദ്ദേശത്തോടെ വാഹനം ഓടിച്ചിട്ടില്ല. എതിരായ കാര്യങ്ങളിൽ തെളിയിക്കാന് പ്രോസിക്യൂഷന് സാധിച്ചിട്ടില്ല തുടങ്ങിയ വാദങ്ങളാണ് ശ്രീറാം മുന്നോട്ടുവച്ചത്. ശ്രീറാം തെളിവ് ശിപ്പിക്കാന് ശ്രമിച്ചുവെന്ന് പ്രോസിക്യൂഷനും വാദിച്ചു.
തെളിവ് നശിപ്പിച്ചെന്ന് പ്രോസിക്യൂഷൻ
മദ്യപിച്ചിരുവന്നുവെന്ന് തെളിയിക്കാന് രക്ത സാംപിളുകള് എടുക്കേണ്ടത് അത്യാവശമായിരുന്നു. എന്നാല് സംഭവം നടന്ന് 10 മണിക്കൂറിന് ശേഷം മാത്രമാണ് രക്ത സാംപിള് എടുക്കാന് ശ്രീറാം അനുവദിച്ചത്. ഇതുതന്നെ തെളിവ് നശിപ്പിക്കാനുള്ള നീക്കമായി വിലയിരുത്തേണ്ടി വരുമെന്ന് പ്രോസിക്യൂഷന് കോടതിയില് പറഞ്ഞു.
താനല്ല വഫ ഫിറോസാണ് വാഹനം ഓടിച്ചതെന്നാണ് ശ്രീറാം ആദ്യം പോലീസിന് നല്കിയ മൊഴി. അതും തെളിവ് നശിപ്പിക്കാനുള്ള നീക്കത്തിന്റെ ഭാഗമാണെന്നും പ്രോസിക്യൂഷന് വാദിച്ചു. കേസുമായി ബന്ധപ്പെട്ട യഥാര്ഥ കാരണങ്ങള് പുറത്തുവരാന് കൃത്യമായ വിചാരണ നടക്കേണ്ടതുണ്ടെന്നും പ്രോസിക്യൂഷന് കോടതിയെ അറിയിച്ചിട്ടുണ്ട്.
കേസില് രണ്ടാം പ്രതിയായ വഫയുടെ വിടുതല് ഹര്ജിയില് നേരത്തെ തന്നെ വാദം പൂര്ത്തിയായതാണ്. രണ്ടു പ്രതികളുടെയും വിടുതല് ഹര്ജിയില് ഉത്തരവ് പറയാന് ഹര്ജികള് ഒക്ടോബര് 19ന് വീണ്ടും കോടതി പരിഗണിക്കും.
2019 ഓഗസ്റ്റ് മൂന്ന് പുലര്ച്ചെ മ്യൂസിയം-വെള്ളയമ്പലം റോഡില് നടന്ന അപകടത്തിലാണ് സിറാജ് പത്രത്തിന്റെ ബ്യൂറോ ചീഫ് ആയിരുന്ന കെ.എം. ബഷീര് മരിച്ചത്. ഐ.എ.എസ്. ഉദ്യോഗസ്ഥനായ ശ്രീറാം വെങ്കിട്ടരാമന് അമിതമായി മദ്യപിച്ചശേഷം അതിവേഗത്തില് വാഹനമോടിച്ച് അപകടമുണ്ടാക്കിയതായാണ് പോലീസ് കേസ്.
