തിരുവനന്തപുരം വിമാനത്താവള നടത്തിപ്പ് അദാനി ഗ്രൂപ്പിന് നല്കിയത് ചോദ്യംചെയ്ത കേരള സർക്കാർ ഹര്ജി സുപ്രീം കോടതി തള്ളി. വിമാനത്താവള കൈമാറ്റവുമായി ബന്ധപ്പെട്ട ടെണ്ടര് നടപടികളില് പങ്കെടുത്ത ശേഷം പിന്നീട് കൈമാറ്റത്തെ ചോദ്യംചെയ്യുന്നത് അംഗീകരിക്കാനാകില്ലെന്ന് സുപ്രീം കോടതി വ്യക്തമാക്കി.
വിമാനത്താവള ഭൂമിയുടെ അവകാശവുമായി ബന്ധപ്പെട്ട നിയമ നടപടികളുമായി ആവശ്യമെങ്കില് സര്ക്കാരിന് മുന്നോട്ടുപോകാമെന്ന് സുപ്രീം കോടതി വ്യക്തമാക്കി.
വിമാനത്താവളത്തിന് ആവശ്യമായ ഭൂമി ഏറ്റെടുത്ത് നല്കിയത് തങ്ങളാണെന്ന് സംസ്ഥാന സര്ക്കാര് സുപ്രീം കോടതിയില് വാദിച്ചു. ഇതിനായി ഒരു രൂപപോലും എയര്പോര്ട്ട് അതോറിറ്റിയില് നിന്ന് ലഭിച്ചിട്ടില്ല. ഈ സാഹചര്യത്തിൽ ഭൂമിയുടെ അവകാശം സംബന്ധിച്ച് കേസ് തുടരാം.
സംസ്ഥാന സര്ക്കാരും എയര്പോര്ട്ട് അതോറിറ്റി എംപ്ലോയീസ് യൂണിയനും നല്കിയ ഹര്ജികളാണ് ചീഫ് ജസ്റ്റിസ് യു.യു. ലളിത്, ബേല എം. ത്രിവേദി എന്നിവരടങ്ങിയ ബെഞ്ച് തള്ളിയത്.
തിരുവനന്തപുരം വിമാനത്താവള നടത്തിപ്പ് അദാനി ഗ്രൂപ്പിന് നല്കിയത് ചോദ്യംചെയ്ത് സര്ക്കാര് നല്കിയ ഹര്ജി കേരള ഹൈക്കോടതി തള്ളിയത് 2020 ഒക്ടോബര് 19-നാണ്. ഇതിനെതിരെ അതേവര്ഷം നവംബറില് നല്കിയ ഹര്ജിയാണ് സുപ്രീം കോടതി തിങ്കളാഴ്ച രണ്ട് മണിക്കൂറോളം വാദംകേട്ട് തള്ളിയത്.
