ഭീമ കൊറെഗാവ് കേസില് മനുഷ്യാവകാശ പ്രവര്ത്തകന് ഫാദര് സ്റ്റാന് സ്വാമിയെ കുടുക്കിയതിന് പിന്നിൽ ആരുടെ താത്പര്യമായിരുന്നു. സ്റ്റാൻ സ്വാമിയുടെ മരണവുമായി ബന്ധപ്പെട്ട് പോലും നിലനിൽക്കുന്ന ദുരൂഹതകൾ ഇനി ഭരണകൂട ബാധ്യതയാവും. ലാപ്ടോപ്പ് ഹാക്ക് ചെയ്ത് എതിരായ തെളിവുകൾ സ്ഥാപിക്കയായിരുന്നു എന്നാണ് അമേരിക്കന് ഫോറന്സിക് സ്ഥാപനം വെളിപ്പെടുത്തുന്നത്.
ആഴ്സണല് കണ്സല്ട്ടിങ് ആണ് ഇതുസംബന്ധിച്ച റിപ്പോര്ട്ട് പുറത്തുവിട്ടത്. കേസില് കുടുക്കാനായി ഫാ. സ്റ്റാന് സ്വാമിയുടെ ലാപ്ടോപ്പില് ഹാക്കിങിലൂടെ രേഖകള് സ്ഥാപിച്ചുവെന്നാണ് കണ്ടെത്തൽ. ഈ രേഖകള് എന്ഐഎ കുറ്റപത്രത്തില് എഴുതിച്ചേര്ത്തുവെന്നും റിപ്പോര്ട്ടില് പറയുന്നു. എന്തിനായിരുന്നു ഇത്. ഈ കണ്ടെത്തലുകൾ അടിസ്ഥാന രഹിതമാണെങ്കിൽ എന്ത് പരിശോധനയുടെ അടിസ്ഥാനത്തിലാണ് അത്. പുതിയ വിവാദങ്ങൾ ഉടലെടുക്കുകയാണ്.
‘മാവോവാദികളുടെ കത്തുകള് എന്ന നിലയില് പ്രചരിപ്പിച്ചവയടക്കം 44 രേഖകളാണ് ലാപ്ടോപ്പില് സ്ഥാപിച്ചത്. 2014 മുതല് 2019 ജൂണ് 11 വരെ ഹാക്കിങ് നടന്നു’ – അമേരിക്കന് ഫോറന്സിക് സ്ഥാപനം ആരോപിക്കുന്നു.
ആരാണ് ഹാക്ക് ചെയ്തത് എന്ന് കണ്ടെത്താതിരിക്കാനും ഹാക്കര്മാര് ശ്രമിച്ചിട്ടുണ്ട്. ജൂണ് 12നാണ് പുനെ പോലീസ് സ്റ്റാന് സ്വാമിയുടെ ലാപ്ടോപ്പ് കസ്റ്റഡിയില് എടുത്തത്. കേസില് പ്രതിചേര്ക്കപ്പെട്ട റോണ വില്സിന്റേയും സുരേന്ദ്ര ഗാഡ്ലിങിന്റേയും ലാപ്ടോപ്പുകളില് ഹാക്കിങ് നടന്നതായും കണ്ടെത്തിയിരുന്നു. മൂന്ന് പേരുടേയും ലാപ്ടോപ്പ് ഹാക്ക് ചെയ്തത് ഒരാളാണെന്നും അമേരിക്കന് സ്ഥാപനത്തിന്റെ റിപ്പോര്ട്ടില് പറയുന്നു.
ഭീമ കൊറേഗാവ് കേസില് വിചാരണ കാത്തുകഴിയുന്നതിനിടെ ഫാദര് സ്റ്റാന് സ്വാമി മരിച്ചിരുന്നു. ജയിലില് കഴിയവേ ആരോഗ്യനില മോശമായ അദ്ദേഹത്തെ മുംബൈയിലെ സ്വകാര്യ ആശുപത്രിയില് പ്രവേശിപ്പിച്ചു. പിന്നീട് ഹൃദയസ്തംഭനംമൂലം മരിക്കുകയും ചെയ്തു. ആവശ്യമായ ചികിത്സ നൽകിയില്ല. സൌകര്യങ്ങൾ നിഷേധിച്ചു എന്നിങ്ങനെ ആരോപണങ്ങൾ നിലനിൽക്കുന്നുണ്ട്.
ഭീമ കൊറേഗാവ് യുദ്ധത്തിന്റെ ഇരുന്നൂറാം വാര്ഷികത്തില് 2018 ജനുവരി ഒന്നിനുണ്ടായ സംഘര്ഷങ്ങളുമായും അതിനു മുന്നോടിയായിനടന്ന എല്ഗാര് പരിഷദ് എന്ന ദളിത് സംഗമവുമായും ബന്ധപ്പെടുത്തിയാണ് കേസുകൾ ചാർജ് ചെയ്തത്. മാവോവാദി സംഘടനകളുമായും ദളിത് സംഘടനകളുമായും ബന്ധമുണ്ട് എന്ന് ആരോപിച്ചാണ് സ്റ്റാന് സ്വാമിയെ റാഞ്ചിയില്നിന്ന് എന്.ഐ.എ. അറസ്റ്റു ചെയ്തത്. 2020 ഒക്ടോബറില് ആയിരുന്നു അറസ്റ്റ്. റാഞ്ചിയില് ആദിവാസികള്ക്കിടയില് സ്വാമി പ്രവര്ത്തിച്ചിരുന്നു.
ആരോഗ്യപ്രശ്നങ്ങള് ചൂണ്ടിക്കാണിച്ചുനല്കിയ ഹര്ജി ഹൈക്കോടതിയുടെ പരിഗണനയിലിരിക്കെയാണ് അദ്ദേഹം മരിച്ചത്. സ്റ്റാന് സ്വാമി ഉത്കൃഷ്ടനായ വ്യക്തിയായിരുന്നുവെന്ന് അദ്ദേഹത്തിന്റെ മരണശേഷം ബോംബെ ഹൈക്കോടതി പറഞ്ഞിരുന്നു. അദ്ദേഹത്തിന്റെ പ്രവര്ത്തനങ്ങളോട് ബഹുമാനമുണ്ടായിരുന്നെന്നും കോടതി പറഞ്ഞു. എല്ഗര് പരിഷദ്- മാവോവാദി ബന്ധം സംബന്ധിച്ച് സ്റ്റാന് സ്വാമി സമര്പ്പിച്ച ഹര്ജികളില് അദ്ദേഹത്തിന്റെ മരണത്തിനു ശേഷം വാദം കേള്ക്കവെ ആയിരുന്നു കോടതിയുടെ പരാമര്ശം.
