പ്രധാനമന്ത്രിക്കെതിരെ അപകീർത്തികരവും വസ്തുതാവിരുദ്ധവുമായ പ്രസ്താവന നടത്തിയെന്ന് ആരോപിച്ച് രാഹുൽ ഗാന്ധിക്കെതിരെ ലോക്സഭയിൽ ബിജെപി അവകാശ ലംഘന നോട്ടീസ് നൽകി. രാഹുലിൻ്റെ പ്രസംഗം രേഖകളിൽ നിന്ന് നീക്കണമെന്നും നടപടി വേണമെന്നും പാർലമെൻററി കാര്യമന്ത്രി പ്രഹ്ളാദ് ജോഷി ആവശ്യപ്പെട്ടു
നന്ദി പ്രമേയ ചർച്ചയ്ക്കിടെ അഴിച്ചു വിട്ട കൊടുങ്കാറ്റ്
രാജ്യത്തിന്റെ ബജറ്റും, നയങ്ങളും അദാനിക്ക് വേണ്ടി തയ്യാറാക്കി,അദാനിയുമായി എത്ര തവണ വിദേശ യാത്ര നടത്തി, ബിജെപിക്ക് അദാനി എത്ര തുക സംഭാവന നല്കിയ തുടങ്ങിയ ചോദ്യങ്ങള് പ്രധാനമന്ത്രിയോട് രാഹുൽ ഉന്നയിച്ചിരുന്നു. പ്രധാനമന്ത്രിയുടെ വിദേശ യാത്രകളും രാജ്യത്തിന്റെ വിദേശ നയവും അദാനിക്ക് വേണ്ടിയാണെന്ന് രാഹുല് ഗാന്ധി തുറന്നടിക്കയും ചെയ്തു.
പ്രധാനമന്ത്രി നരേന്ദ്ര മോഡി എത്തുന്നതിന് മുൻപ് വിദേശ രാജ്യങ്ങളിൽ അദാനി എത്തിയത് എന്തിനാണ്. പ്രധാനമന്ത്രി അവിടം വിടുമ്പോഴും പിന്നെ എന്താണ് ചെയ്യുന്നത് എന്നും രാഹുൽ ചോദിച്ചിരുന്നു.
ആവശ്യപ്പെട്ടത് തെളിവ്
മതിയായ തെളിവുകളില്ലാതെ മോദിയ്ക്കെതിരായി നടത്തിയ ആരോപണം അപകീര്ത്തികരവും ലജ്ജാകരവുമാണെന്ന് ദുബെ കുറ്റപ്പെടുത്തി. പ്രമേയ ചര്ച്ചയില് പങ്കെടുക്കവേ പ്രധാനമന്ത്രിക്കെതിരെ രാഹുല് ഗാന്ധി, ചില പ്രസ്താവനകള് നടത്തി. മുന്കൂര് നോട്ടീസ് നല്കാതെ നടത്തിയ പ്രസ്താവനകള് തീര്ത്തും അപകീര്ത്തികരവും തെറ്റിദ്ധാരണയുളവാക്കുന്നതും ‘അണ്പാർലമെന്ററി’യുമാണെന്ന് ദുബെ കത്തില് പറയുന്നു. മാന്യതയില്ലാത്ത ഈ പ്രസ്താവന സഭയുടേയും പ്രധാനമന്ത്രിയുടേയും അന്തസ്സിനെ ചോദ്യംചെയ്യുന്നതാണ്. മതിയായ തെളിവുകള് ഒന്നുമില്ലാതെയാണ് ഇത്തരത്തിലുള്ള ആരോപണം രാഹുല് ഉന്നയിച്ചത്, ദുബെ പറയുന്നു.
തന്റെ പ്രസ്താവനകള് സാധൂകരിക്കുന്ന ആധികാരികമായ ഒരു തെളിവും ഹാജരക്കാന് രാഹുല് ഗാന്ധിക്ക് കഴിഞ്ഞിട്ടില്ല. കൃത്യമായ രേഖകളില്ലാതെ സഭയെ തെറ്റിദ്ധരിപ്പിക്കാനാണ് രാഹുല് ശ്രമിച്ചത്. ഇത് വ്യക്തമായും സഭയെയും അംഗങ്ങളെയും അവഹേളിക്കലും അവകാശലംഘനവുമാണെന്നും നടപടി എടുക്കണമെന്നും കത്തില് ആവശ്യപ്പെടുന്നു.
സഭയിൽ രാഹുൽ ഉയർത്തിയത് ഇരുവരും ഇരിക്കുന്ന ചിത്രം
പ്രധാനമന്ത്രി നരേന്ദ്രമോദിയും സർക്കാരും ഗൗതം അദാനിക്ക് വിവിധ മേഖലകളിൽ കരാറുകളും പദ്ധതികളും ലഭിക്കാൻ നിയമങ്ങളും ചട്ടങ്ങളും മാറ്റിയെന്ന് രാഹുൽ ഗാന്ധി കഴിഞ്ഞദിവസം സഭയിൽ ആരോപിച്ചിരുന്നു. 2014-ൽ 800 കോടി ഡോളറായിരുന്ന (66,203 കോടി രൂപ) അദാനിയുടെ ആസ്തി 2022-ൽ 14,000 കോടി ഡോളറിലേക്ക് (11.58 ലക്ഷം കോടി രൂപ) വളർന്നത് മോദിയുടെ സഹായത്താലാണ്. സാധാരണജനങ്ങളുടെ പണം അദാനിയുടെ കമ്പനികളിൽ എൽ.ഐ.സി. ഉൾപ്പെടെ പൊതുമേഖലാ ധനകാര്യസ്ഥാപനങ്ങൾ നിക്ഷേപിച്ചത് മോദി-അദാനി കൂട്ടുകെട്ടിന്റെ ഉദാഹരണമാണെന്നും രാഹുൽ ആരോപിച്ചിരുന്നു. അദാനിയും നരേന്ദ്ര മോഡിയും ഒന്നിച്ചിരിക്കുന്ന ചിത്രവും ഉയർത്തി കാട്ടി. വരുമാനം പെരുപ്പിച്ചു കാട്ടിയ സംഭവത്തിൽ കമ്പനി തകർച്ച നേരിടുന്ന ഘട്ടത്തിലാണ് രാഹുൽ ആരോപണം ഉയർത്തുന്നത്.
