2023 വനിതാ ട്വന്റി 20 ലോകകപ്പില് ഇന്ത്യയ്ക്ക് വിജയത്തുടക്കം. ഗ്രൂപ്പ് ബിയില് പാകിസ്ഥാനെ തകര്ത്തു. ഏഴുവിക്കറ്റിനാണ് ഇന്ത്യയുടെ വിജയം. ട്വന്റി 20 ലോകകപ്പില് ചേസിങ്ങിലെ ഇന്ത്യയുടെ ഏറ്റവും വലിയ വിജയമാണിത്. ട്വന്റി 20 ലോകകപ്പിലെ ഏറ്റവും ഉയര്ന്ന രണ്ടാമത്തെ ചേസുമാണിത്.
പാകിസ്താന് ഉയര്ത്തിയ 150 റണ്സ് വിജയലക്ഷ്യം ഇന്ത്യ 19 ഓവറില് മറികടന്നു. സ്കോര്: പാകിസ്താന് 20 ഓവറില് നാലിന് 149. ഇന്ത്യ 19 ഓവറില് മൂന്നിന് 151
അര്ധസെഞ്ചുറി നേടി പുറത്താവാതെ നിന്ന ജെമീമ റോഡ്രിഗസിന്റെ തകര്പ്പന് പ്രകടനമാണ് ഇന്ത്യയ്ക്ക് തുണയായത്. ജെമീമ 38 പന്തുകളില് നിന്ന് എട്ട് ബൗണ്ടറിയുടെ സഹായത്തോടെ പുറത്താവാതെ 53 റണ്സെടുത്തു. വാലറ്റത്ത് അടിച്ചുതകര്ത്ത റിച്ച ഘോഷും മികച്ച പ്രകടനം പുറത്തെടുത്തു.
അവസാന ഓവറുകളില് റിച്ചയും ജെമീമയും നടത്തിയ പ്രകടനമാണ് ഇന്ത്യയ്ക്ക് അനായാസ വിജയം സമ്മാനിച്ചത്. റിച്ച ഘോഷ് 20 പന്തുകളില് നിന്ന് അഞ്ച് ബൗണ്ടറി സഹിതം 31 റണ്സെടുത്ത് പുറത്താവാതെ നിന്നു.
150 റണ്സ് വിജയലക്ഷ്യത്തിലേക്ക് ബാറ്റിങ് ആരംഭിച്ച ഇന്ത്യയ്ക്ക് വേണ്ടി ഓപ്പണര്മാരായ യസ്തിക ഭാട്ടിയയും ഷഫാലി വര്മയും മികച്ച തുടക്കം നല്കി. ആദ്യ വിക്കറ്റില് ഇരുവരും 38 റണ്സ് ചേര്ത്തു. എന്നാല് 17 റണ്സെടുത്ത യസ്തികയെ ഇന്ത്യയ്ക്ക് നഷ്ടമായി. മറുവശത്ത് ഷഫാലി തകര്പ്പന് ഷോട്ടുകളുമായി കളം നിറഞ്ഞു. താരം 25 പന്തില് 33 റണ്സെടുത്താണ് ക്രീസ് വിട്ടത്. മൂന്നാമതായി ക്രീസിലെത്തിയ ജെമീമ വളരെ ശ്രദ്ധയോടെ കളിച്ചാണ് ഇന്ത്യയ്ക്ക് വിജയം സമ്മാനിച്ചത്. നായക ഹര്മന് പ്രീത് സിങ് 16 റണ്സെടുത്ത് പുറത്തായി.
ഐമാന് അന്വര് ചെയ്ത 18-ാം ഓവര് ഇന്ത്യയുടെ വിജയത്തില് നിര്ണായക പങ്കുവഹിച്ചു. ഈ ഓവറില് റിച്ച ഘോഷ് മൂന്ന് ഫോറുകളടിച്ചുകൊണ്ട് വിജയലക്ഷ്യം രണ്ടോവറില് 14 റണ്സായി കുറച്ചു. തൊട്ടടുത്ത ഓവറില് വിജയം നേടിക്കൊണ്ട് ഇന്ത്യ ചരിത്രം കുറിച്ചു.
