ബിബിസി ഓഫീസിൽ ആദായനികുതി ഉദ്യോഗസ്ഥർ പരിശോധന നടത്തുന്നു. ദില്ലിയിലെയും മുംബൈയിലെയും ഓഫീസുകളിലാണ് പരിശോധന നടക്കുന്നത്. ഗുജറാത്ത് കലാപവുമായി ബന്ധപ്പെട്ട ഡോക്യുമെൻററി വിവാദം നിലനിൽക്കുന്നതിനിടെയാണ് പരിശോധന. ഇന്ന് രാവിലെ 11:30 നാണ് ആദായനികുതി ഉദ്യോഗസ്ഥർ ബിബിസി ഓഫീസിൽ എത്തിയത്. ബിബിസി ജീവനക്കാരുടെ ഫോണുകൾ പിടിച്ചെടുത്തു. മുംബൈയിലെ ഓഫീസിലും ആദായ നികുതി വകുപ്പ് പരിശോധന നടത്തുന്നുണ്ട്.
അന്വേഷണ ഏജൻസികളെ ദുരുപയോഗം ചെയ്യുന്നത് സംബന്ധിച്ച കേന്ദ്ര ആഭ്യന്തര മന്ത്രിയുടെ നിഷേധത്തിന് തൊട്ടു പിറകെയാണ് മാധ്യമ സ്ഥാപനത്തിൽ റെയിഡ്. ഗുജറാത്ത് കലാപത്തിൽ നരേന്ദ്ര മോഡിയുടെ പങ്ക് വിവരിക്കുന്ന ഡോക്യൂമെൻ്ററി കേന്ദ്ര സർക്കാരിന് വലിയ പ്രതിഛായാ നഷ്ടം ഉണ്ടാക്കിയിരുന്നു. എട്ട് ഉദ്യോഗസ്ഥരാണ് അകത്ത് കടന്ന് പരിശോധന നടത്തിയത്. ബിസിനസ് പ്രവർത്തനങ്ങളുമായി ബന്ധപ്പെട്ട രേഖകളും അതിന്റെ ഇന്ത്യൻ ഭാഷ ചാനലുകളുടെ വരുമാന രേഖകളും പരിശോധിക്കുന്നു.
അപ്രഖ്യാപിത അടിയന്തരാവസ്ഥയെന്ന് കോൺഗ്രസ്
അപ്രഖ്യാപിത അടിയന്തരാവസ്ഥയെന്ന് കോൺഗ്രസ് നേതാവ് ജയറാം രമേശ് ആരോപിച്ചു. അദാനിയുടെ വിഷയത്തിൽ ജെപിസി അന്വേഷണം ആവശ്യപ്പെടുന്നു. എന്നാൽ സർക്കാർ ബിബിസിയിൽ പരിശോധന നടത്തുന്നുവെന്ന് ജയറാം രമേശ് ആഞ്ഞടിച്ചു. വിനാശ കാലേ വിപരീത ബുദ്ധിയെന്ന് കോൺഗ്രസ് വിമർശിച്ചു.
ഫോണുകളും ലാപ്ടോപ്പും പിടിച്ചെടുത്തു, വിശദീകരണം സർവ്വെ മാത്രമെന്ന്
അന്താരാഷ്ട്ര നികുതിയടക്കമുള്ള ക്രമക്കേടുകള് സംബന്ധിച്ച ആരോപണങ്ങളില് ‘സര്വേ’ നടത്തിയെന്നാണ് ആദായ നികുതി വകുപ്പ് അധികൃതര് നല്കുന്ന വിശദീകരണം.
റെയ്ഡിനിടെ ചില രേഖകള് പിടിച്ചെടുത്തു. ജേര്ണലിസ്റ്റുകളുടെ ലാപ്ടോപുകളും ഫോണുകളും ഉദ്യോഗസ്ഥര് എടുത്തുകൊണ്ടുപോയി. പരിശോധന പൂര്ത്തിയാകുന്നത് വരെ ഓഫീസുകള് സീല് ചെയ്തു. ഇത് റെയ്ഡല്ല സര്വെയാണ് നടത്തുന്നതെന്നാണ് നികുതി വകുപ്പ് ഉദ്യോഗസ്ഥരുടെ പ്രതികരണം.
ഡല്ഹിയിലെ ഓഫീസിലെ റെയ്ഡില് 20 ഓളം ആദായനികുതി വകുപ്പ് ഉദ്യോഗസ്ഥര് പങ്കെടുത്തുവെന്നാണ് വിവരം. റെയ്ഡ് നടക്കുമ്പോള് ഒരു വിവരങ്ങളും പുറത്തേക്ക് കൈമാറരുതെന്ന് ജീവനക്കാര്ക്ക് നിര്ദേശം നല്കിയിരുന്നു.
